Epesõs 4:1-32
4 Innem ña, ri-kalbuuj an Irooj, ij akwel̦ap ñan kom̦ bwe kom̦win etetal ekkar ñan kũr eo em̦õj kũr kom̦ kake,
2 ilo ettã bõro* im ineem̦m̦an iien otemjej, meanwõd, im kijenmej ippãn doon ilo yokwe,
3 bwe kom̦win maroñ kate kom̦ ñan dãpij wõt bõrokuk eo kom̦ij bõke ikijjeen jetõb kwõjarjar* kõn aenõm̦m̦an eo ej lukwõj kom̦ ippãn doon.
4 Ewõr juon wõt ãnbwin im juon wõt jetõb kwõjarjar,* ãinwõt an wõr juon wõt kõjatdikdik, eo em̦õj kũr kom̦ ñane.
5 Ewõr juon wõt Irooj, juon wõt tõmak, juon wõt peptaij,
6 im juon wõt Anij, eo ej Jemãn armej otemjej, eo ewõr an maroñ ioon aolep, im ej kõjerbal aolep ñan kõm̦m̦an elõñ men, im ej jerbal ilo kõj aolep.
7 Kiiõ kar letok ñan kõj kajjojo jouj eo el̦ap ekkar ñan an kar Christ ajeje menin letok in ejjel̦o̦k on̦ããn.
8 Bwe em̦õj kar je im ba: “Ke ear wanlõñl̦o̦k ñan ijo eutiej, ear karõl̦o̦k ro rar kalbuuj; im ear letok ro eoktak kapeel ko aer jãn doon ãinwõt menin letok ko.”
9 Kiiõ ta mel̦el̦ein an ba “ear wanlõñl̦o̦k?” Ej mel̦el̦ein bwe ear wanlal̦tak ñan jikin ko rettã, mel̦el̦ein lal̦ in.
10 Eo ear wanlal̦tak, eñin ejja eo wõt ear wanlõñl̦o̦k ñan ilõñin aolep lañ ko bwe en maroñ kajejjet kũtien men otemjej.
11 Im ear letok jet bwe ren rijjilõk, jet bwe ren ri-kanaan, jet bwe ren ri-kwal̦o̦k kõn ennaan eo em̦m̦an, jet bwe ren jabõt im jet bwe ren ri-katakin.
12 Ear letok rein bwe ren kajim̦we* ro rekkwõjarjar, im bwe ren jipañ ro jet, im ñan kalõk ãnbwinnin Christ,
13 m̦ae iien kõj aolep jej juon wõt* ilo tõmak im ilo jel̦ãl̦o̦kjen̦ eo ejim̦we kõn Nejin Anij, bwe jen maroñ erom juon eo erũtto im lukkuun tõpar joñan eo an Christ.
14 Innem jen jab bar ãinwõt ajri, im n̦o ko ren jab bar iuunto iuuntak kõj im kõto ko ren jab bar uukto uuktak kõj ikijjeen aolep katak ko armej rej m̦on̦e ro jet kaki im ilo aer riab im etao.
15 Bõtab ilo ad kõnono m̦ool,* jen rũttol̦o̦k ilo men otemjej kõn yokwe ilo ad juon wõt ippãn Christ, eo ej bõran ãnbwin eo.
16 Kõn e, aolepen ãnbwin eo ej koba ippãn doon im ej bõrokuk ippãn doon ikijjeen jerbal ko an aolep mo̦kwõj ko. El̦aññe kajjojo iaan m̦õttan ko em̦m̦an aer jerbal ilo yokwe, enaaj em̦m̦an an ãnbwin eo eddekl̦o̦k.
17 Innem men eo ij ba in im kwal̦o̦k kake ilo etan Irooj, ej bwe kom̦win jab bar etetal ãinwõt ri-aelõñ ko, ilo aer etetal ekkar ñan l̦õmn̦ak ko aer rewaan.*
18 L̦õmn̦ak ko aer remarok im rein rejenolo̦k jãn mour eo jãn Anij kõn aer jajel̦o̦kjen̦, im kõn an kijñeñe bũrueer.*
19 Joñan an jako aer kile men ko rem̦m̦an, rej kõtl̦o̦k bwe er make ren peran in kõm̦m̦ani men ko renana* im jabdewõt men ko rettoon, im rejjab kõn̦aan bõjrak ñan jidik.
20 Bõtab kom̦ar katak bwe ejjab ãindein Christ,
21 el̦aññe em̦ool bwe kom̦ar roñ im katak ekkar ñan m̦ool eo Jesus ear katakin kake.
22 Kom̦ar katak bwe kom̦win utũk mour eo m̦okta, eo kom̦ kõn mour kake im ejorrããn kõn wõt kõn̦aan ko retao.
23 Im kom̦ij aikuj wõnm̦aanl̦o̦k wõt im kõkããl l̦õmn̦ak ko ami,*
24 im kom̦ij aikuj kõn̦ak mour eo ekããl, eo kar kõm̦anm̦ane ekkar ñan ankilaan Anij, im ej pedped ioon wãnõk eo em̦ool im tiljek eo em̦ool.
25 Innem kiiõ ke em̦õj ami jol̦o̦k etao, kajjojo iaami en kõnono m̦ool ñan eo ri-turin,* kõnke kõj aolep jej m̦õttan ko ilo juon ãnbwin.
26 Kom̦win illu, ak kom̦win jab jerawiwi; al̦ en jab tulo̦k ioon ami illu.
27 Kom̦win jab n̦ajikin Tepil̦ eo.*
28 Eo ekõn ko̦o̦t en jab bar ko̦o̦t, ijoke en kate e kõm̦m̦ani jerbal ko rem̦m̦an kõn pein bwe en wõr men ko ippãn ñan an maroñ jipañl̦o̦k ro rej pãd ilo aikuj.
29 En ejjel̦o̦k naan enana ej diwõjtok jãn lo̦ñiimi, en naan ko wõt rem̦m̦an im rej kõketak ekkar ñan aikuj, bwe ro rej roñjake ren bõk tokjãn.
30 Bareinwõt, kom̦win jab kabũrom̦õj jetõb kwõjarjar* eo an Anij, eo kar jiil̦i kom̦ kake ñan raan eo naaj karõl̦o̦k kom̦ ikijjeen juon on̦ããn.
31 Kom̦win jol̦o̦k jãn kom̦ meo̦ otemjej, illu, kwi, bũroñ, naan ko reddo, im aolep men ko jet rej kõm̦m̦an jorrããn.
32 Bõtab kom̦win kwal̦o̦k jouj ñan doon, tũriam̦o, im m̦õn̦õn̦õ in jeorl̦o̦k an doon bõd ãinwõt an kar Anij m̦õn̦õn̦õ in jeorl̦o̦k ami bõd ikijjeen Christ.
Footnotes
^ Ak “l̦õmn̦ak ko rettã.”
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Ak “kammineneik.”
^ Ak “bõrokuk.”
^ Ak “ilo ad m̦ool.”
^ Ak “ejjel̦o̦k kobbaer; ejjel̦o̦k tokjãer.”
^ Kajin Grik, “ejjel̦o̦k eñjake ilo bũrueer.”
^ Naan eo ilo kajin Grik ej a·selʹgei·a, ej jitõñl̦o̦k ñan juon eo ej lukkuun rupe kien ko an Anij im ejjab jook im kea ñan jidik.
^ Ak “maroñ eo ej kõjbwebweik l̦õmn̦ak ko ami.”
^ Ilo kajin Grik, naan eo “ri-turin” emaroñ jitõñl̦o̦k ñan jabdewõt armej.
^ Ak “lel̦o̦k iien em̦m̦an ñan Tepil̦ eo.”
^ Ak “kajoor.” Lale “Jetõb kwõjarjar” ilo Kõmel̦el̦e Ko.
