Pailimõn 1:1-25
1 Jãn ña Paul, ri-kalbuuj kõn Christ Jesus, im jãn jeid im jatid Timote, ñan Pailimõn, ri-jerbal eo m̦õttad ejitõnbõro,
2 im ñan Appia kõrã eo jeid im jatid, im ñan Arkippos, rũttarin̦ae n̦e m̦õttad, im ñan eklejia n̦e ilo m̦õn̦e im̦õm̦:
3 Jouj eo el̦ap im aenõm̦m̦an eo jãn Anij, eo ej Jemãdwõj, im jãn Irooj Jesus Christ, en pãd ippemi.
4 Iien otemjej ij kam̦m̦oolol aõ Anij ñe ij kwal̦o̦k kõn kwe ilo jar ko aõ,
5 ãinwõt ke ejjab bõjrak aõ roñ kõn tõmak n̦e am̦ im kõn yokwe eo am̦ ñan Irooj Jesus im ñan aolep ro rekkwõjarjar.
6 Ij jar bwe am̦ pãd ilo tõmak en maroñ kõm̦akũt eok ñan kile aolep men ko rem̦m̦an ewõr ippãd kõn wõt Christ.
7 El̦ap aõ lañlõñ im aenõm̦m̦an kõn aõ roñ kõn yokwe eo am̦, bwe kõn kwe, jatũ, bũruon* ro rekkwõjarjar rej bõk kõkajoor.
8 Eñin unin, ãinwõt juon rijjilõk an Christ, meñe ewõr aõ maroñ in kõnono ilo peran ñan jiroñ eok bwe kwõn kõm̦m̦ane men eo ekkar,
9 bõtab em̦m̦anl̦o̦k ippa ñe ij akwel̦ap ñan kwe ilo kilaan wõt yokwe, bwe ña Paul, ilukkuun rũtto im kiiõ ij juon ri-kalbuuj kõn wõt Christ Jesus.
10 Ij akwel̦ap ñan eok kõn nejũ Onesimõs, eo iar erom jemãn ilo kalbuuj.*
11 Ear juon eo ejjel̦o̦k tokjãn ñan kwe m̦okta, ak kiiõ ej juon eo ewõr tokjãn ñan kwe im ña.
12 Ij kõjepl̦aakwaj e ñan ippam̦, aet, in el̦ap aõ yokwe.
13 Ikõn̦aan bwe en pãdwõt ije ippa bwe en bõk jikũm̦ im jipañ eõ ilo iien in ij kalbuuj kõn ennaan eo em̦m̦an.
14 Ijoke ijjab kõn̦aan kõm̦m̦an jabdewõt men ñe kwõjjab errã kake, kõnke ijjab kõn̦aan bwe kwõn kõm̦m̦ane men in itok wõt jãn aõ kajjitõk, bõtab ej aikuj in itok jãn jokãlõt n̦e am̦ make.
15 Bõlen unin an kar jako ium̦win jidik iien* jãn ippam̦, ej bwe kwõn bar bõke bwe en pãd ippam̦ ñan indeeo,
16 ejjab ãinwõt juon ri-kõm̦akoko, bõtab ãinwõt juon eo el̦apl̦o̦k jãn ri-kõm̦akoko, juon jeid im jatid eo ejitõnbõro, el̦aptata ñan ña, ak ilo m̦ool enaaj l̦apl̦o̦k an jitõnbõro ippam̦ ilo kanniõk im ilo Irooj jim̦or.
17 El̦aññe kwõj watõk ña jeram̦, innem kwõn karwaineneiki waj ilo ejja wãween eo wõt kwõnaaj kar kõm̦m̦ane ñan ña.
18 Bareinwõt, el̦aññe ewõr men en̦ enana ear kõm̦m̦ane ñan kwe ak em̦uri ippam̦ kõn jabdewõt, kwõn kam̦uriik eõ kake.
19 Ña Paul, ij je waj men in kõn el̦tan peiũ make: Inaaj kõl̦l̦ãikiwaj—bõtab ilo m̦ool, kom̦uri ñan ña kõn mour n̦e am̦.
20 Innem, jatũ, ãinwõt ke kõjro ej ri-karejeran Irooj, jouj im jipañ eõ ilo men in; kõkajoor bũruõ* ilo am̦ juon wõt ippãn Christ.
21 El̦ap aõ tõmak bwe kwõnaaj kõm̦m̦ane men in ij ba. Kõn men in, ij jejewaj kõnke ijel̦ã bwe kwõnaaj kõm̦m̦an el̦apl̦o̦k jãn men in ij kajjitõk kake.
22 Ejjab men in wõt, ak kwõn bareinwõt kõpooj juon jikin aõ pãd, kõnke ij kõjatdikdik bwe ikijjeen jar kan̦e am̦, naaj bar kõjepl̦aakwaj ña ñan ippam̦.*
23 Epapras, eo ej bar kalbuuj ippa kõn wõt Christ Jesus, ej lewaj an naanin yokyokwe,
24 bareinwõt ri-jerbal rein m̦õtta, Mark, Aristarkõs, Dimas, im Luk.
25 Jouj eo el̦ap an Irooj Jesus Christ en pãd ippemi ilo ami kwal̦o̦k wãween* ko rem̦m̦an.
Footnotes
^ Ak “yokwe eo an.”
^ Kajin Grik, “ke kar lukwõj eõ.”
^ Kajin Grik, “juon awa.”
^ Ak “yokwe in aõ.”
^ Ak “kanemkwõj ña ñan kwe.”
^ Naan eo ilo kajin Grik ej pneu′ma. Lale “Pneu′ma” ilo Kõmel̦el̦e Ko.
