Revelesõn 10:1-11
10 Innem iar lo bar juon enjel̦ ekajoor ej wanlal̦tak jãn lañ, im elibobo kõn kõdo̦ im juon iia ej pãd ilõñin bõran im turin mejãn ãinwõt al̦, im ne ko neen rej ãinwõt jurõn kijeek,
2 im ilo pein epãd juon bok lemlem edik im epel̦l̦o̦k. Im ear likũt neen tuanmoon̦ ilo̦meto, im ne eo ituanmiiñ ear likũti ioon ãne,
3 im ear lam̦õj ilo juon ainikien el̦ap ãinwõt ainikien l̦aiõn. Im ke ear lam̦õj, ear wal̦o̦k ainikien an jourur ko jimjuon kõnono.
4 Innem ke jourur ko jimjuon rar kõnono, iar pojakin jeje, bõtab iar roñ juon ainikien jãn lañ ej ba: “Kwõn jiil̦i* men ko jourur ko jimjuon rej kõnono kaki, im kwõn jab jei.”
5 Enjel̦ eo iar loe an jutak ilo̦meto im ioon ãne ear kotake pein ituanmoon̦ ñan lañ,
6 im ear kallim̦ur ilo etan Eo ej mour ñan indeeo im indeeo, eo ear kõm̦anm̦an lañ im men ko ie, im lal̦ in im men ko ie, im lo̦jet kab men ko ie, ear ba: “Ejjãmin bar wõr iien kõttar.
7 Bõtab, ilo raan ko enjel̦ eo kein kajimjuon ej itõn ukwi jilel eo ippãn, men eo ettino im eokkwõjarjar an Anij enaaj lukkuun jejjet kũtien. Men in ej ennaan eo em̦m̦an ear kwal̦o̦k kake ñan ri-kanaan ro karejeran.”
8 Im iar roñ an ainikien eo jãn lañ bar kõnono ñan ña im ba: “Kwõn ilo̦k im bõke bok lemlem en̦ epel̦l̦o̦k im ej pãd ilo pein enjel̦ en̦ ej jutak ilo̦meto im ioon ãne.”
9 Innem, iar ilo̦k ñan ippãn enjel̦ eo im ba ñane bwe en letok ñan ña bok lemlem eo edik, im ear jiroñ eõ im ba: “Kwõn bõke im kañe, im enaaj kõm̦m̦an an metak* lo̦jiem̦, bõtab enaaj tõñal ñan lo̦ñiim ãinwõt honey.”
10 Innem iar bõke bok lemlem eo edik jãn pein enjel̦ eo im kañe, im ear tõñal ñan lo̦ñiũ ãinwõt honey, bõtab ear metak* lo̦jiõ.
11 Im kar ba ñan eõ: “Kwõn bar kanaan kõn armej ro, aelõñ ko, kajin* ko, im kõn elõñ kiiñ ro.”
