Revelesõn 13:1-18
13 Innem ear* jutak wõt ioon bokin parijet.
Im iar lo juon menninmour awiia jimjuon bõran ej wal̦o̦ktok jãn lo̦meto im ewõr joñoul an doon, im joñoul kũrawũn rej pãd ioon doon kein, bõtab ilo bar ko bõran em̦õj je ãt ko rej kõnono n̦ae Anij.
2 Im menninmour awiia eo iar loe ear ãinwõt juon leopard, bõtab neen ear ãinwõt neen bear, im lo̦ñiin ear ãinwõt lo̦ñiin l̦aiõn. Im menninmour awiia in ear bõk tũroon eo an, kajoor eo an, im maroñ eo an el̦ap jãn dragon eo.
3 Iar lo bwe juon iaan bar ko bõran ear ãinwõt ñe kar kakinejneje im eitõn mej, bõtab kinej in ear itõn mej kake ear mo, im aolepen lal̦ in ear l̦oore menninmour in eawiia im rar kwal̦o̦k aer kautieje.
4 Im rar kabuñ ñan dragon eo kõnke ear lel̦o̦k maroñ ñan menninmour awiia eo, im rar kabuñ ñan menninmour awiia eo im ba naan kein: “Wõn ej ãinwõt menninmour awiia in, im wõn emaroñ tarin̦aeiki?”
5 Im kar lel̦o̦k ñane maroñ ñan kõnono kõn men ko rej menin utiej bõro im naan ko renana n̦ae Anij, im bwe en kõm̦m̦an ñan an kõn̦aan ium̦win 42 allõñ.
6 Im ear kõpel̦l̦o̦ke lo̦ñiin im kwal̦o̦k naan ko renana n̦ae Anij ñan kõnanaik etan im ijo jikin, aet ro rej jokwe ilañ.
7 Im kar kamãlimi an tarin̦aeik ro rekkwõjarjar im anjo̦ ioer, im kar lel̦o̦k ñane maroñ ioon bwij otemjej, armej, kajin* im aelõñ otemjej.
8 Im aolep ro rej jokwe ioon lal̦ renaaj kabuñ ñane. Bwe jãn jinoin lal̦,* ejjel̦o̦k juon iaan ãt ko etaer kar jei ilo bokin mour eo an L̦aam̦ eo kar m̦ane.
9 Jabdewõt eo ewõr lo̦jilñin, en roñjake.
10 El̦aññe jabdewõt ej aikuj del̦o̦ñ ilo kalbuuj, innem en del̦o̦ñ ilo kalbuuj. El̦aññe jabdewõt enaaj m̦anm̦an kõn jãje,* enaaj aikuj in mej kõn jãje. Kõn men in, ro rekkwõjarjar rej aikuj in kijenmej im tõmak.
11 Innem iar lo bar juon menninmour awiia ej wanlõñtak jãn lal̦, im ear wõr ruo an doon ãinwõt doon ko an juon koon in jiip, bõtab ear jino kõnono ãinwõt juon dragon.
12 Ej kõjerbale aolepen maroñ eo an menninmour awiia eo kein kajuon im̦aan mejãn. Im ej kõm̦m̦an bwe lal̦ im ro rej jokwe ie ren kabuñ ñan menninmour awiia eo kein kajuon, eo ear itõn mej kõn kar kinej eo an ak ear mo.
13 Im ej kõm̦m̦ani menin bwilõñ* ko rel̦l̦ap im̦aan mejãn armej ro, joñan ej kõm̦m̦an bwe kijeek en wanlal̦tak jãn lañ ñan lal̦.
14 Ej m̦on̦e ro rej jokwe ioon lal̦ kõn menin bwilõñ ko kar kamãlimi ñan an kõm̦m̦ani im̦aan mejãn menninmour awiia eo. Bareinwõt, ej jiroñl̦o̦k ro rej jokwe ioon lal̦ ñan kõm̦m̦ane juon ekjabin* menninmour eo eawiia, eo kar kakinejneje kõn jãje bõtab ear mour wõt.
15 Im kar kamãlimi bwe en lel̦o̦k menono in mour* ñan ekjabin menninmour awiia eo kõnke en maroñ kõnono im kõm̦m̦an bwe en mej ro otemjej rej m̦akoko in kabuñ ñane.
16 Ej jiped armej otemjej—ro rettã im ro reutiej, ro rem̦weiie im ro rejeram̦õl, ro ri-anemkwõj im ro ri-kõm̦akoko—bwe en wõr kõkal̦l̦e ioon tuanbwijmaroñin peier ak ioon dem̦aer,
17 im bwe ejjel̦o̦k en maroñ wia ak wiakake ijello̦kun wõt armej ro ewõr kõkal̦l̦e in ippãer, kõkal̦l̦e in ej etan ak nõm̦ba eo an menninmour eo eawiia.
18 Innem emenin aikuj ñan kwal̦o̦k mãlõtlõt: Eo ewõr lol̦o̦kjen̦ ippãn en bwine im etale nõm̦ba eo an menninmour eo eawiia, bwe ej nõm̦ba an armej, im nõm̦ba eo an ej 666.
Footnotes
^ Mel̦el̦ein, dragon eo.
^ Kajin Grik, “lo.”
^ Ej jitõñl̦o̦k ñan tõre ko an ajri ro nejin Adam im Iv.
^ Ak emaroñ, “naaj m̦ane kõn jãje.”
^ Kajin Grik, “kõkal̦l̦e.”
^ Kajin Grik, “ekjab ñan.”
^ Naan eo ilo kajin Grik ej pneu′ma. Lale “Pneu′ma” ilo Kõmel̦el̦e Ko.
