Revelesõn 15:1-8
15 Im iar loe bar juon men ejejuwaan* ear wal̦o̦k ilañ im ekanooj em̦m̦an: Jimjuon enjel̦ im jimjuon menin kaeñtaan ko ippãer. Errein menin kaeñtaan ko ãliktata kõnke naaj bõktok jem̦l̦o̦kin illu eo an Anij ikijjeen men kein.
2 Im iar loe juon men ãinwõt juon lom̦al̦o in kilaaj im men ko ie rekãre ippãn kijeek. Im ro rar bõk anjo̦ ioon menninmour awiia eo im ekjab eo ekjabin im nõm̦ba eo an, eo ej ãt eo etan, rar jutak iturin lom̦al̦o eo ej ãinwõt kilaaj im rej jibwe arp ko an Anij.
3 Rar al kõn al eo an Moses, ri-karejeran Anij, im al eo an L̦aam̦ eo. Im rar al im ba:
“Jeova* Anij, eo Ekajoor Bõtata, ekanooj in l̦ap im em̦m̦an jerbal ko am̦. Kiiñ eo ej Kiiñ in indeeo, ewãnõk im m̦ool ial̦ ko am̦.
4 Wõn eban mijak eok Jeova,* im kaiboojoje etam̦, bwe kwe wõt kwõtiljek? Ri-aelõñ otemjej renaaj itok im kabuñ im̦aam̦, kõnke em̦õj an alikkar bwe am̦ ekajet ewãnõk.”
5 Ãlikin men in, iar loe an pel̦l̦o̦k jikin eo eokkwõjarjar* ilañ ilo im̦õn kõppãd in kam̦ool eo,*
6 im enjel̦ ro jimjuon epãd menin kaeñtaan ko jimjuon ippãer, rar diwõjtok jãn jikin eo eokkwõjarjar, im rej kõn̦ak nuknuk* ko rerreo im rõbbõl, im ewõr aer kañũr gold ej kaapool̦e ubeer.
7 Juon iaan enjel̦ ro emãn ear lel̦o̦k jimjuon bowl gold ñan enjel̦ ro jimjuon, im bowl kein robrak kõn illu an Anij, eo ej mour ñan indeeo im indeeo.
8 Im ear baatat aolepen jikin eo eokkwõjarjar kõn aiboojoj eo an Anij im kajoor eo an, im ejjel̦o̦k jabdewõt ear maroñ del̦o̦ñe jikin in eokkwõjarjar m̦ae iien ear jem̦l̦o̦k menin kaeñtaan ko jimjuon an enjel̦ ro jimjuon.
Footnotes
^ Kajin Grik, “kõkal̦l̦e.” Men in ej jitõñl̦o̦k ñan juon men ewõr mel̦el̦ein.
^ Lale “Jeova” ilo Kõmel̦el̦e Ko.
^ Lale “Jeova” ilo Kõmel̦el̦e Ko.
^ Mel̦el̦ein, Jikin eo Eokkwõjarjar Otem Kwõjarjar ilo tampel̦ eo.
^ Mel̦el̦ein, “Im̦õn kõppãd eo an Anij.”
^ Ak “linen.”
