Revelesõn 19:1-21
19 Ãlikin men in, iar roñ juon ainikien ãinwõt ainikien juon jarlepju ilañ. Rar ba: “Nõbar Jah!* Lo̦mo̦o̦r im aiboojoj im kajoor rej an adwõj Anij,
2 kõnke wãween an ekajet ejim̦we im m̦ool. Bwe ear ekajete im kaje kõrã eo ekijoñ im ebuñbuñ, eo ear kattoon lal̦ in kõn an l̦õñ,* im Ear idenon̦e kõn bõtõktõkin ri-karejar ro an me kõrã in ear kato̦o̦rl̦o̦k kõn pein.”
3 Im ilo alen eo kein karuo, rar m̦õkaj im ba: “Nõbar Jah!* Im baat eo jãn Babil̦on ej wanlõñl̦o̦k ñan indeeo im indeeo.”
4 Im elder ro 24 kab enjel̦ ro emãn rar bukwelõlõ im kabuñ ñan Anij, eo ej jijet ioon tũroon eo, im rar ba: “Amen! Nõbar Jah!”*
5 Bareinwõt, juon ainikien jãn tũroon eo ear ba: “Kom̦win nõbar adwõj Anij, kom̦ aolep ro ri-karejeran, ro rej mijake, ro rettã im ro reutiej.”
6 Im iar roñ juon ainikien ãinwõt ainikien juon jarlepju im ãinwõt ainikien dãn ko rel̦l̦ap im jourur ko rel̦l̦ap. Rar ba: “Nõbar Jah,* kõnke Jeova* adwõj Anij, eo Ekajoor Bõtata, em̦õj an jino tõl im kiiñ!
7 Jen m̦õn̦õn̦õ im kanooj lañlõñ im lel̦o̦k nõbar ñane, kõnke iien m̦are eo an L̦aam̦ eo emoottok im lio pãleen em̦õj an kõpooj e make.
8 Aet, kar kõtl̦o̦k bwe liin pãleen en kõn̦ak nuknuk* ekanooj em̦m̦an, ebbõl, im erreo—bwe nuknuk eo ekanooj em̦m̦an ej jutak kõn kõm̦m̦an ko rewãnõk an ro rekkwõjarjar.”
9 Innem enjel̦ eo ear ba ñan ña, “Kwõn je men in: Em̦õn̦õn̦õ ro em̦õj kũrtok er ñan kõjota in m̦are eo an L̦aam̦ eo.” Bareinwõt, ear ba ñan eõ: “Erkein naan ko rem̦ool an Anij.”
10 Innem, iar bukwelõlõ im̦aan neen bwe in kabuñ ñane. Bõtab, ear ba ñan eõ: “Kwõn kõjparok! Kwõn jab ãindein! Ña ij juon ri-karejar ãinwõt kwe im ro jeim̦ im jatũm̦, kom̦ ro rej jerbal im kwal̦o̦k kõn Jesus. Kwõn kabuñ ñan Anij! Bwe unin kanaan ko ej ñan kwal̦o̦k kõn Jesus.”
11 Im iar lo an lañ pel̦l̦o̦k im lo juon kidia emouj. Im ãt eo etan eo ej jijet ioon ej Tiljek im M̦ool, im ilo wãnõk ej ekajet im tarin̦ae.
12 Iju in mejãn eurur ãinwõt kijeek, im elõñ kũrawũn ko ioon bõran. Ewõr juon etan em̦õj je, ijoke ejjel̦o̦k en̦ ejel̦ã kake ijello̦kun wõt e,
13 im ej kõn̦ak juon nuknuk emããr* kõn bõtõktõk, im kar n̦aetan Naan eo an Anij.
14 Bareinwõt, jarin tarin̦ae ko ilañ rar l̦oorel̦o̦k kõn kidia ko remouj im rar kõn̦ak nuknuk* ko rekanooj em̦m̦an, remouj im rerreo.
15 Im ear wal̦o̦ktok jãn lo̦ñiin juon jãje eaetok im ekkañ bwe en jol̦o̦k aelõñ ko, im enaaj juon jabõt ñan armej ro ilo an kõjerbal juon jokon̦ aen. Bareinwõt, ej jujuuri kũreep ko ilowaan jikin kõm̦m̦an wain* in illu eo el̦ap an Anij, eo Ekajoor Bõtata.
16 Im ioon nuknuk eo an itulõñin bukwien neen, em̦õj je ãt in etan, Kiiñ ioon kiiñ ro im Irooj ioon irooj ro.
17 Iar lo bar juon enjel̦ ej jutak ilo al̦, im ilo juon ainikien el̦ap ear lam̦õj im ba ñan aolep bao ko rej kãke imejatoto: “Kom̦win itok im kweilo̦ktok ippãn doon ñan kõjota eo el̦ap an Anij,
18 bwe kom̦win maroñ kañ kanniõkin kiiñ ro, kapen in jarin tarin̦ae ro, em̦m̦aan ro rekajoor, kidia ko im ro rej uwe ioer, im kanniõkin aolep, ro ranemkwõj kab ri-kõm̦akoko ro im ro rettã im ro reutiej.”
19 Im iar lo an menninmour eo eawiia kab kiiñ ro an lal̦ im jarin tarin̦ae ko aer koba ippãn doon bwe ren ilen tarin̦aeik eo ej uwe ioon kidia eo im jarin tarin̦ae eo an.
20 Innem rar jibwe menninmour awiia eo kab ri-kanaan eo eriab me ear kõm̦m̦an menin bwilõñ* ko im̦aan mejãn ñan m̦on̦e ro rar bõk kõkal̦l̦e eo an menninmour awiia eo, im ro rar kabuñ ñan ekjab eo ekjabin. Im ke erro ej mour wõt, kar jol̦o̦k erro jim̦or ñan lom̦al̦o in kijeek eo ej bwil kõn sulfur.*
21 Bõtab kar m̦an ro jet kõn jãje eo eaetok ej wal̦o̦ktok jãn lo̦ñiin eo ej uwe ioon kidia eo. Im aolep bao ko rar mat kõn kanniõkier.
Footnotes
^ Ak “Hallelujah!” Ãt in “Jah” ej kõkkaddudu in etan Jeova.
^ Naan eo ilo kajin Grik ej por·neiʹa. Lale “L̦õñ” ilo Kõmel̦el̦e Ko.
^ Ak “Hallelujah!” Ãt in “Jah” ej kõkkaddudu in etan Jeova.
^ Ak “Hallelujah!” Ãt in “Jah” ej kõkkaddudu in etan Jeova.
^ Ak “Hallelujah!” Ãt in “Jah” ej kõkkaddudu in etan Jeova.
^ Lale “Jeova” ilo Kõmel̦el̦e Ko.
^ Ak “linen.”
^ Ak emaroñ, “em̦õj kabbũtũktũki.”
^ Ak “linen.”
^ Ak “jouneak wain.” Lale “Jikin kõm̦m̦an wain” ilo Kõmel̦el̦e Ko.
^ Kajin Grik, “kõkal̦l̦e.”
^ Juon kain bo̦uta elukkuun kajoor an bwil im ekajoor bwiin ñe ej bwil.
