Revelesõn 2:1-29
2 “Ñan enjel̦ eo an eklejia eo ilo Epesõs, kwõn je men in: Eo im iju ko jimjuon rej pãd ituanbwijmaroñin pein im ej etetal iol̦apen jurõn l̦aam̦ gold ko jimjuon, ej ba men kein:
2 ‘Ijel̦ã kõn kõm̦m̦an ko am̦ im am̦ jerbal im kijenmej, im bwe kwõjjab anlo̦ke ri-nana ro, im kwõj mãlejjoñe ro rej ba er rijjilõk, ak ilo m̦ool rejjab, im em̦õj am̦ lo bwe armej rein rej ri-riab.
3 Kwõj bareinwõt kwal̦o̦k am̦ kijenmej, im kwaar kijejeto kõn wõt eta im kwaar jab m̦õk.
4 Meñe ãindein, ak ewõr n̦otaam̦ ippa bwe kwaar el̦l̦o̦k jãn yokwe eo am̦ kar m̦okta.
5 “‘Kõn men in, kwõn keememej ijo kwaar buñ jãne, im kwõn ukel̦o̦k im kõm̦m̦ani men ko kwokõn kõm̦m̦ani m̦okta. El̦aññe kwõjjab ukel̦o̦k, inaaj iwõj ñan ippam̦ im jol̦o̦k jurõn l̦aam̦ eo am̦ jãn ijo jikin.
6 Ijoke, ewõr juon men em̦m̦an kõn kwe: eñin bwe kwõj dike kõm̦m̦an ko an ro doon Nikolas, ko ij bareinwõt diki.
7 Eo ewõr lo̦jilñin, en roñjake men eo jetõb kwõjarjar* ej ba ñan eklejia ko: Ñan eo ej bõk anjo̦, inaaj kõtl̦o̦k an m̦õñã jãn leen wõjke in mour eo ej pãd ilo pedetaij eo an Anij.’
8 “Im ñan enjel̦ eo an eklejia eo ilo Smõrna, kwõn je men in: Eo ‘ej M̦oktata im eo Ãliktata’ im ear mej im bar mour, ej ba men kein:
9 ‘Ijel̦ã am̦ eñtaan im jeram̦õl, ijoke kwõm̦weiie. Ibar jel̦ã kõn naanin jum̦ae ko n̦ae eok jãn ro rej ba er ri-Ju ak ilo m̦ool rejjab. Rein rej jarin armej ro doon Setan.
10 Kwõn jab mijak men ko kwõj pojakin eñtaan kaki. Roñjake m̦õk! Tepil̦ eo enaaj wõnm̦aanl̦o̦k wõt im jol̦o̦k jet iaami ilo kalbuuj bwe kom̦win lukkuun pãd ilo mãlejjoñ, im bwe kom̦win eñtaan ium̦win joñoul raan. Kwõn kwal̦o̦k am̦ tiljek ñan mej, im inaaj lewaj ñan kwe kũrawũn in mour.
11 Eo ewõr lo̦jilñin, en roñjake men eo jetõb kwõjarjar* ej ba ñan eklejia ko: Eo ej bõk anjo̦ eban jorrããn ilo mej eo kein karuo.’
12 “Ñan enjel̦ eo an eklejia eo ilo Pergemõm, kwõn je men in: Eo im jãje eo ekkañ, eaetok im ruo mejãn ej pãd ippãn, ej ba men kein:
13 ‘Ijel̦ã bwe ijo kwõj jokwe ie ej ijo tũroon eo an Setan epãd ie; mekarta ak kwõj wõnm̦aanl̦o̦k wõt im tiljek kõn eta, im kwaar jab kaarmejjeteik tõmak eo am̦ ilo ña, ãinwõt ilo kar bar raan ko an Antipas, aõ ri-kam̦ool etiljek, eo kar m̦ane n̦a iturum̦, eñin ijo Setan ej pãd ie.
14 “‘Meñe ãindein ak ewõr jet men ewõr n̦otaam̦ ippa kaki, eñin bwe ewõr armej ijen̦e ippam̦ rej l̦oore katak ko an Beleam, eo ear katakin Belak ñan kõm̦m̦an an ro nejin Israel jerawiwi* bwe ren m̦õñã men ko kar katok kaki ñan ekjab, im bwe ren l̦õñ.*
15 Ãindein, ewõr bar ippam̦ armej ro rej l̦oore katak ko an ro doon Nikolas.
16 Innem, kwõn ukel̦o̦k. El̦aññe kwõjjab, inaaj m̦õkaj waj ñan ippam̦, im inaaj tarin̦aeik er kõn jãje eo eaetok me ej diwõjtok jãn lo̦ñiũ.
17 “‘Eo ewõr lo̦jilñin, en roñjake men eo jetõb kwõjarjar* ej ba ñan eklejia ko: Ñan eo ej bõk anjo̦, inaaj lel̦o̦k ñane jet iaan manna ko ren̦ojak, im inaaj lel̦o̦k ñane juon dekã emouj em̦õj je juon ãt ekããl ioon im ejjel̦o̦k en̦ ejel̦ã kake, ijello̦kun wõt eo kar lel̦o̦k ñane.’
18 “Ñan enjel̦ eo an eklejia eo ilo Thaietaira, kwõn je men in: Nejin Anij, eo iju in mejãn eurur ãinwõt kijeek im neen rej ãinwõt kõba ko relukkuun erreo, ej ba men kein:
19 ‘Ijel̦ã kõn kõm̦m̦an ko am̦, yokwe eo am̦, tõmak eo am̦, jerbal ko am̦, im kab am̦ kijenmej, im ijel̦ã bwe jerbal ko am̦ kiiõ rel̦l̦apl̦o̦k jãn kar jerbal ko am̦ m̦okta.
20 “‘Meñe ãindein ak ewõr n̦otaam̦ ippa, eñin bwe kwõj anlo̦ke kõrã n̦e Jezebel, eo ej make ba e ri-kanaan, im ej katakin im tõlpilouk ri-karejar ro aõ bwe ren l̦õñ* im m̦õñã men ko kar katok kaki ñan ekjab.
21 Im iar lel̦o̦k iien bwe en ukel̦o̦k ak ejjab kõn̦aan ukel̦o̦k im bõjrak jãn an l̦õñ.*
22 Ipojakin kõm̦m̦an bwe kõrã n̦e en lukkuun nañinmej, im bwe ro rej lejãn* ippãn ren iioon el̦ap eñtaan, ijoke eban ãindein el̦aññe rej ukel̦o̦k jãn kõm̦m̦an ko an kõrã in.
23 Inaaj m̦an ro nejin kõn juon nañinmej ekauwõtata, kõnke aolep eklejia ko ren jel̦ã bwe ña eo ij etale im lale l̦õmn̦ak* ko im bũruon armej, im inaaj lewaj ñan kom̦ kajjojo ekkar ñan kõm̦m̦an ko ami.
24 “‘Bõtab ñan ro jet rej pãd ilo Thaietaira, aolep ro rejjab l̦oore katak in, ro ejjel̦o̦k aer jel̦ã kõn men ko rej n̦aetaer “men ko rem̦wilal̦ an Setan,” ij ba ñan kom̦ men in: Iban likũt ioomi bar jabdewõt men eddo.
25 Men in wõt, kom̦win dãpij wõt men eo ewõr ippemi m̦ae iien eo inaaj iwõj.
26 Im ñan eo ej bõk anjo̦ im ej l̦oore kõm̦m̦an ko aõ ñan jem̦l̦o̦kin, inaaj lel̦o̦k ñane maroñ ioon aelõñ ko,
27 im enaaj juon jabõt ñan armej ro im enaaj kõjerbal juon jokon̦ aen bwe ren maroñ pedakilkil ñan elõñ m̦õttan, ãinwõt jãpe ko kõm̦m̦an jãn kũl̦e, eñin ejja maroñ eo wõt Jema ear letok ñan ña.
28 Bareinwõt, inaaj lel̦o̦k ñane iju in raan.
29 Eo ewõr lo̦jilñin, en roñjake men eo jetõb kwõjarjar* ej ba ñan eklejia ko.’
Footnotes
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Kajin Grik, “ñan likũt juon kein tipñõl im̦aan ro nejin Israel.”
^ Lale “L̦õñ” ilo Kõmel̦el̦e Ko.
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Lale “L̦õñ” ilo Kõmel̦el̦e Ko.
^ Naan eo ilo kajin Grik ej por·nei′a. Lale “L̦õñ” ilo Kõmel̦el̦e Ko.
^ Lejãn ej ñe juon eo em̦õj an m̦are ej babu ak pãd ippãn juon eo me ejjab pãleen.
^ Ak “eñjake ko rem̦wilal̦tata.” Kajin Grik, “kidney.”
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
