Revelesõn 21:1-27
21 Im iar lo juon lañ ekããl im juon lal̦ ekããl; bwe lañ eo m̦okta im lal̦ eo m̦okta rar jako im lo̦meto ear bareinwõt jako.
2 Im iar bareinwõt lo jikin eo eokkwõjarjar, eo ej Jerusalem eo Ekããl, im ej wanlal̦tak jãn lañ jãn ippãn Anij im em̦õj kõpooje ãinwõt juon kõrã ej pojakin m̦are im elõtlõt ñan l̦eo pãleen.
3 Innem iar roñ juon ainikien el̦ap jãn tũroon eo ej ba: “Im̦õn kõppãd an Anij ej pãd ippãn armej ro. Enaaj jokwe ippãer im renaaj armej ro an. Im Anij enaaj pãd ippãer.
4 Im enaaj kõm̦õrãik jãn mejãer dãnnin kõmjaal̦al̦ otemjej im enaaj ejjel̦o̦k bar mej, bũrom̦õj, lim̦õ im eñtaan. Men ko m̦okta rejako.”
5 Im Eo ej jijet ioon tũroon eo ej ba: “Roñjake! Ij kõm̦m̦an men otemjej bwe ren kããl.” Im ej bar ba: “Kwõn je men in, kõnke naan kein rem̦ool im armej remaroñ lõki.”*
6 Im ear ba ñan ña: “Em̦õj an naan kein jejjet! Ña Alpha im Omega,* jinoin im jem̦l̦o̦kin. Jabdewõt eo emaro, inaaj lel̦o̦k limen jãn unin dãnnin mour eo ejjel̦o̦k on̦ããn.
7 Jabdewõt eo ej bõk anjo̦, enaaj jolõte men kein, im inaaj an Anij im enaaj nejũ.
8 Bõtab, ikijjeen ro repikõt, ro ejjel̦o̦k aer tõmak, ro rekajjõjõ kõn aer ettoon, ro rej uror, l̦õñ,* anijnij,* kabuñ ñan ekjab, im ri-riab otemjej, kõj eo aer ej lom̦al̦o eo ebwil kõn kijeek im sulfur.* Eñin ej mej eo kein karuo.”
9 Juon iaan enjel̦ ro jimjuon im ewõr jimjuon bowl ippãer me robrak kõn menin kaeñtaan ko jimjuon ãliktata, ear itok im ba ñan ña: “Itok, im inaaj kwal̦o̦k ñan eok kõrã eo ej pojakin m̦are, lio pãleen L̦aam̦ eo.”
10 Innem, ear bõkl̦o̦k ña ikijjeen kajoorin jetõb kwõjarjar* ñan juon tol̦ ekilep im utiej, im ear kwal̦o̦k an jikin eo eokkwõjarjar, Jerusalem, wanlal̦tak jãn lañ jãn ippãn Anij,
11 im aiboojoj eo an Anij ej pãd ilo jikin in. Im ejjatõltõl in wõt juon dekã elukkuun aorõk, ãinwõt dekã jasper an lukkuun ejjatõltõl.
12 Wõrwõr eo wõrwõrin ear lukkuun l̦ap im utiej, im ewõr 12 kõjãm ko ie im 12 enjel̦ rej pãd ilo kõjãm kein, im ioon kõjãm kein kar je etan bwij ko 12 bwijjin l̦õm̦aro nejin Israel.
13 Im ilo wõrwõr in, ewõr jilu kõjãm iturearin, im jilu kõjãm ituiõñin, im jilu kõjãm iturõkin, im jilu kõjãm iturilikin.
14 Bareinwõt, ewõr 12 dekã ko raorõk im rej pedpedin wõrwõr eo an jikin in, im ioer epãd ãt ko 12 etan rijjilõk ro 12 an L̦aam̦ eo.
15 Eo ear kõnono ñan ña ear jibwe juon kein joñjoñ kõm̦m̦an jãn gold bwe en joñe jikin in im kõjãm ko ie, im wõrwõr eo ie.
16 Im jikin in ear jekjekin wõt jukweea, im aetokin im depakpakin joñaer wõt juon. Im ear joñe jikin in kõn kein joñjoñ eo ippãn, joñan aetokin, depakpakin im utiejen ej 12,000 stadia,* bwe aolepeer rej joñaer wõt juon.
17 Ear bareinwõt joñe wõrwõr eo, joñan kilepin ej 144 cubit* ekkar ñan kein joñjoñ an armej, eo ej bareinwõt kein joñjoñ an enjel̦.
18 Wõrwõr in ear kõm̦m̦an jãn jasper, im jikin in ear kõm̦m̦an jãn gold ekanooj erreo ãinwõt kilaaj erreo.
19 Im pedped eo pedpedin wõrwõr eo ear inõknõk kõn elõñ kain dekã aorõk: dekã eo kein kajuon ilo pedped eo ej jasper, kein karuo sapphire, kein kajilu chalcedony, kein kãmen emerald,
20 kein kal̦alem sardonyx, kein kajiljino sardius, kein kajimjuon chrysolite, kein karalitõk beryl, kein karatimjuon topaz, kein kajoñoul chrysoprase, kein kajoñoul juon hyacinth, im eo kein kajoñoul ruo ej amethyst.
21 Bareinwõt, kõjãm ko 12 rej 12 pearl; bwe kajjojo kõjãm ear kõm̦m̦an jãn pearl. Im ial̦leplep eo ilo jikin in ej gold erreo ãinwõt kilaaj erreo.
22 Iar jab ellolo tampel̦ ie kõnke tampel̦ eo an jikin in ej Jeova* Anij, eo Ekajoor Bõtata, im bareinwõt L̦aam̦ eo.
23 Im jikin in ear jab aikuj al̦ im allõñ ñan rome ioon, kõnke aiboojoj eo an Anij ej rome, im kein kameram eo ej L̦aam̦ eo.
24 Meramin jikin in enaaj kameram ial̦an an aelõñ ko etetal, im kiiñ ro an lal̦ renaaj bõktok aiboojoj eo aer ñan jikin in.
25 Im kõjãm ko ie rejjãmin kilõk ñan jidik ilo raan, kõnke enaaj ejjel̦o̦k boñ ilo jikin in.
26 Im renaaj bõktok nõbar im aiboojoj eo an aelõñ ko ñan jikin in.
27 Bõtab, jabdewõt men ettoon im jabdewõt eo ej kõm̦m̦ani men ko rekajjõjõ im retao, rejjãmin del̦o̦ñ ñan jikin in; ro wõt em̦õj je etaer ilo bokin mour eo an L̦aam̦ eo renaaj del̦o̦ñ.
Footnotes
^ Ak “retiljek.”
^ Naan kein Alpha im Omega rej lõta ko m̦oktata im ãliktata ilo alphabet ko ilo kajin Grik.
^ Lale “L̦õñ” ilo Kõmel̦el̦e Ko.
^ Ak “kajjetõbtõb.”
^ Juon kain bo̦uta elukkuun kajoor an bwil im ekajoor bwiin ñe ej bwil.
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Enañin 1,379 m̦ail̦. Tarrin juon stadium ej 606.95 ne.
^ Enañin 210 ne.
^ Lale “Jeova” ilo Kõmel̦el̦e Ko.
