Revelesõn 22:1-21
22 Innem enjel̦ eo ear kwal̦o̦k ñan ña reba in dãnnin mour, eo erreo ãinwõt dekã crystal. Im jãn tũroon eo an Anij im an L̦aam̦ eo, dãn in ej to̦o̦r lal̦l̦o̦k
2 ilo iol̦apen ial̦leplep eo ilo jikin in. Im ilo jait ko ruo iturin reba in, elõñ wõjke in mour, im rej kalle leer 12 alen ilo juon iiõ. Im bwilikõn wõjke kein rej ñan kãjmour aelõñ ko.
3 Im ejjãmin bar wõr jabdewõt naanin kalia n̦ae jikin in. Bwe tũroon eo an Anij im an L̦aam̦ eo enaaj pãd ilo jikin in, im ri-karejar ro An renaaj kabuñ ñane;
4 im renaaj loe turin mejãn, im etan enaaj pãd ioon dem̦aer.
5 Bareinwõt, ejjãmin bar wõr boñ, im rejjãmin aikuj meramin l̦aam̦ ak meramin al̦ bwe Jeova* Anij enaaj rome er, im renaaj tõl im kiiñ ñan indeeo im indeeo.
6 Im enjel̦ eo ear ba ñan ña: “Naan kein rem̦ool im armej remaroñ lõki,* aet, Jeova,* Anij eo ear kõm̦akũt ri-kanaan ro, ear jilkintok enjel̦ eo an bwe en kwal̦o̦k ñan ri-karejar ro an men ko epaak aer naaj wal̦o̦k.
7 Im Jesus ej ba: ‘Ij iwõj wõt kiiõ. Em̦õn̦õn̦õ jabdewõt eo ej l̦oori naanin kanaan ko ilo bok lemlem in.’”
8 Ña Jon, iar roñ im loi men kein. Ke iar roñ im loi, iar bukwelõlõ bwe in kabuñ im̦aan neen enjel̦ eo ear kwal̦o̦ktok men kein ñan ña.
9 Bõtab ear ba ñan eõ: “Kwõn kõjparok! Kwõn jab ãindein! Ña bar juon ri-karejar ãinwõt kwe im ri-kanaan ro jeim̦ im jatũm̦, im ro otemjej rej pokaki naan ko ilo bok lemlem in. Kwõn kabuñ ñan Anij.”
10 Ear bareinwõt ba ñan ña: “Kwõn jab jiil̦i* naanin kanaan ko ilo bok lemlem in, bwe epaaktok iien eo em̦õj karõke.
11 Eo ejjab wãnõk en wõnm̦aanl̦o̦k wõt ilo men ko rejjab wãnõk, im eo ettoon en wõnm̦aanl̦o̦k wõt ilo men ko rettoon; bõtab eo ewãnõk en wõnm̦aanl̦o̦k wõt ilo wãnõk, im eo eokkwõjarjar en wõnm̦aanl̦o̦k wõt ilo kwõjarjar.
12 “Anij ej ba: ‘Ij iwõj wõt kiiõ, im jinõkjeej eo ij lel̦o̦k epãd ippa, bwe ij n̦aon̦ããn kajjojo ekkar ñan jerbal ko aer.
13 Ña Alpha im Omega,* m̦oktata im ãliktata, jinoin im jem̦l̦o̦kin.
14 Em̦õn̦õn̦õ ro rej kwal̦ nuknuk ko aer bwe ren maroñ etal ñan wõjke ko wõjke in mour, im bwe ren maroñ del̦o̦ñe kõjãm ko an jikin in.
15 Inabõjin jikin in elõñ kidu ko,* ri-anijnij, ri-l̦õñ,* ri-uror, ri-kabuñ ñan ekjab, im aolep ro em̦m̦an ippãer riab im mejl̦o̦kier riab.’
16 “Jesus ej ba: ‘Ña Jesus, iar jilkinwaj enjel̦ eo aõ bwe en kwal̦o̦k ñan kom̦ men kein ñan jipañ eklejia ko. Ña ij okran* im nejin Devid im iju in raan eo el̦ap an meram.’”
17 Im jetõb kwõjarjar* im kõrã eo ej pojakin m̦are rej wõnm̦aanl̦o̦k wõt im ba: “Itok!” im jabdewõt eo ej roñ en ba, “Itok!” im jabdewõt eo emaro en itok; im jabdewõt eo ekõn̦aan en bõk dãnnin mour ejjel̦o̦k on̦ããn.
18 “Jesus ej ba: ‘Ij kwal̦o̦k ñan aolep ro rej roñ kõn naanin kanaan ko ilo bok lemlem in: El̦aññe jabdewõt ej kakkobaba ñan men kein kar jei, Anij enaaj lel̦o̦k ñane menin kaeñtaan ko kar jei ilo bok lemlem in;
19 im el̦aññe ewõr rej jol̦o̦k jabdewõt jãn naanin kanaan ko ilo bok lemlem in, Anij enaaj bõk ãjinkõj eo an ilo wõjke ko wõjke in mour im ilo jikin eo eokkwõjarjar, erkein men ko kar jei ilo bok lemlem in.’
20 “Eo ej kwal̦o̦ki men kein ej ba, ‘Aet, ij iwõj wõt kiiõ.’”
“Amen! Kwõn itok Irooj Jesus.”
21 Jouj eo el̦ap an ad Irooj Jesus en pãd ippãn ro rekkwõjarjar.
Footnotes
^ Lale “Jeova” ilo Kõmel̦el̦e Ko.
^ Ak “retiljek.”
^ Lale “Jeova” ilo Kõmel̦el̦e Ko.
^ Ak “n̦ooje.”
^ Naan kein Alpha im Omega rej lõta ko m̦oktata im ãliktata ilo alphabet ko ilo kajin Grik.
^ Mel̦el̦ein, ro rej kõm̦m̦ani m̦anit ko rekajjõjõ im̦aan mejãn Anij.
^ Lale “L̦õñ” ilo Kõmel̦el̦e Ko.
^ Ak “bwijjin.”
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
