Revelesõn 3:1-22
3 “Ñan enjel̦ eo an eklejia eo ilo Sardis, kwõn je men in: Eo im jetõb ko jimjuon an Anij im iju ko jimjuon rej pãd ippãn, ej ba men in: ‘Ijel̦ã kõn kõm̦m̦an ko am̦ im ebuñbuñ bwe kwõmour, bõtab ilo m̦ool kwõmej.
2 Innem, kwõn ekkõl im kõkajoor men ko rej pãdwõt ippam̦ im renañin kar mej wõt jidik, kõnke iar jab lo an lukkuun dedel̦o̦k* jerbal ko am̦ im̦aan mejãn aõ Anij.
3 Kõn men in, en jab bõjrak am̦ l̦õmn̦ak kõn* men eo kar lewaj ñan eok im kõn wãween am̦ kar roñ kake, im kwõn kõjparoke wõt, im kwõn ukel̦o̦k. El̦aññe kwõjjab ruj, inaaj iwõj ãinwõt juon ri-ko̦o̦t im kwõjjãmin jel̦ã ñan jidik awa eo inaaj iwõj ñan ippam̦.
4 “‘Meñe ãindein ak ewõr jejjo armej* ippam̦ ilo Sardis im rar jab kattoone nuknuk ko aer, rein renaaj etetal ippa ilo aer kõn̦ak nuknuk ko remouj, kõnke men in ej tõllo̦kier.
5 Eo ej bõk anjo̦, enaaj kõn̦ak nuknuk ko remouj im ijjãmin jol̦o̦k* etan jãn bokin mour, bõtab inaaj kwal̦o̦k etan ñan Jema im ñan enjel̦ ro an.
6 Eo ewõr lo̦jilñin, en roñjake men eo jetõb kwõjarjar* ej ba ñan eklejia ko.’
7 “Ñan enjel̦ eo an eklejia eo ilo Philadelphia, kwõn je men in: Eo im eokkwõjarjar, em̦ool, im epãd ippãn ki eo an Devid, im ñe ej kõpel̦l̦o̦ke ejjel̦o̦k emaroñ kilõke, im ñe ej kilõke ejjel̦o̦k emaroñ kõpel̦l̦o̦ke, ej ba men kein:
8 ‘Ijel̦ã kõn kõm̦m̦an ko am̦—roñjake m̦õk! Iar likũt im̦aam̦ juon kõjãm epel̦l̦o̦k im ejjel̦o̦k en̦ emaroñ kilõke, im ijel̦ã bwe jidik wõt am̦ kajoor, im bwe kwaar kõjparok wõt naan eo aõ im kwaar jab kaarmejjeteik eta ñan jidik.
9 Kwõn roñjake! Inaaj kõm̦m̦an bwe ro jãn jarin armej ro doon Setan, ro rej riab im ba er ri-Ju meñe rejjab—inaaj kõm̦m̦an bwe ren iwõj im badikdik* im̦aan neem̦ im kõm̦m̦an bwe ren jel̦ã bwe ij yokwe eok.
10 Kõnke kwaar etale men ko kwaar roñ kõn aõ kar kijenmej,* inaaj bareinwõt kõjparok eok ilo awa in mãlejjoñ eo enaaj itok ioon aolepen lal̦, ñan mãlejjoñe ro rej jokwe ie.
11 Ij iwõj ilo m̦õkaj. Innem, kwõn dãpij wõt men eo ewõr ippam̦ bwe ejjel̦o̦k en maroñ bõk kũrawũn eo am̦.
12 “‘Ñan eo ej bõk anjo̦—inaaj kõm̦m̦an bwe en juon joor ilo tampel̦ eo an Anij eo aõ, im ejjãmin bar jako jãne. Im inaaj je ãt eo etan aõ Anij n̦a ioon im etan jikin eo an Anij eo aõ, Jerusalem eo Ekããl, eo ej wanlal̦tak jãn lañ jãn ippãn aõ Anij, im inaaj bareinwõt je ãt eo eta ekããl n̦a ioon.
13 Eo ewõr lo̦jilñin, en roñjake men eo jetõb kwõjarjar* ej ba ñan eklejia ko.’
14 “Ñan enjel̦ eo an eklejia eo ilo Leodisia, kwõn je men in: Eo ej Amen im ri-kõnnaan etiljek im m̦ool im ej menin kõm̦anm̦an eo an Anij m̦oktata, ej ba men kein:
15 ‘Ijel̦ã kõn kõm̦m̦an ko am̦ bwe kwõjjab m̦õl̦o im kwõjjab bwil. Ijoke ikõn̦aan bwe kwõn kar juon iaaer, m̦õl̦o ñe eaab bwil.
16 Innem kõnke jidik wõt am̦ mããn̦ãn̦ im kwõjjab bwil ak m̦õl̦o, ipojakin em̦m̦õjel̦o̦k eok jãn lo̦ñiũ.
17 Kwõj ba, “Ña ri-m̦weiie im iar koorl̦o̦k elõñ m̦weiuk im ijjab aikuj jabdewõt men ñan jidik,” bõtab kwõjaje bwe kwõlukkuun jerata, kabũrom̦õjm̦õj, jeram̦õl, pilo, im keelwaan.
18 Eñin unin ij rõjañ eok ñan wia gold jãn ña, gold em̦õj karreoiki kõn kijeek bwe kwõn maroñ oktak im m̦weiie, im bareinwõt nuknuk mouj ñan am̦ kõn̦aki bwe kwõn jab jook kõn an wal̦o̦k am̦ keelwaan, im kwõn bar wia jãn eõ uno in mãj ñan am̦ unoik mejam̦ kake bwe kwõn maroñ lol̦o̦kjen̦.
19 “‘Aolep ro ij yokwe er, ij kauweik er im kajim̦we er. Innem, kwõn ukel̦o̦k im kijejeto.
20 Roñjake m̦õk! Ij jutak imejãn kõjãm im kal̦l̦al̦l̦al̦. El̦aññe jabdewõt ej roñ ainikiõ im kõpel̦l̦o̦ke kõjãm eo, inaaj del̦o̦ñ ñan m̦weo im̦õn im kõjota ippãn im enaaj kõjota ippa.
21 Ñan eo ej bõk anjo̦, inaaj kõtl̦o̦k an jijet ippa ilo tũroon eo aõ, ãinwõt aõ kar bõk anjo̦ im jijet ippãn Jema ilo tũroon eo an.
22 Eo ewõr lo̦jilñin, en roñjake men eo jetõb kwõjarjar* ej ba ñan eklejia ko.’”
Footnotes
^ Ak “tõprak.”
^ Ak “keememej.”
^ Kajin Grik, “jejjo ãt.”
^ Ak “jeere.”
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Ak “kwal̦o̦k kautiej.”
^ Ak emaroñ, “kwaar l̦oore joñak eo aõ kõn kijenmej.”
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
