Revelesõn 4:1-11
4 Ãlikin men in, iar reilo̦k im lo juon kõjãm epel̦l̦o̦k ilañ, im ainikien eo jinointata iar roñ an kõnono ñan ña ear ãinwõt ainikien jilel, im ej ba: “Kwõn wanlõñtak im inaaj kwal̦o̦k ñan eok men ko renaaj aikuj in wal̦o̦k.”
2 Ãlikin wõt men in, em̦õkaj an jetõb kwõjarjar* itok ioõ, im lo juon tũroon ej pãd ilañ im ewõr juon eo ej jijet ioon tũroon in.
3 Im Eo ej jijet ejjatõltõl ãinwõt dekã jasper im sardius,* im ewõr juon iia ej kaapool̦e tũroon eo im unokan ej ãinwõt dekã eo eaorõk etan emerald.
4 Ewõr 24 tũroon rar kaapool̦e tũroon in, im 24 elder* rej jijet ioon tũroon kein im rej nuknuk mouj, im rej kõn̦ak kũrawũn gold ioon bõraer.
5 Ear ejjaromrom im jourur im wal̦o̦k ainikien ko jãn tũroon eo; im im̦aan tũroon eo ear wõr jimjuon l̦aam̦ reurur kõn kijeek, im men kein rej jutak kõn jetõb ko jimjuon an Anij.
6 Im im̦aan tũroon eo ear pãd juon men ãinl̦o̦kwõt juon lom̦al̦o me jekjekin wõt kilaaj, ãinwõt dekã eo eaorõk etan crystal.
Ilo iol̦apl̦ap, ijo tũroon eo epãd ie* im ipel̦aakin tũroon in, ewõr emãn enjel̦ robrak kõn mãj itum̦aan im itulik.
7 Enjel̦ eo kein kajuon ãinwõt l̦aiõn, im enjel̦ eo kein karuo ãinwõt kau kom̦aan, im enjel̦ eo kein kajilu turin mejãn ãinwõt armej, im enjel̦ eo kein kãmen ear ãinwõt eagle ko rej ekkãke.
8 Kajjojo iaan enjel̦ rein emãn ear wõr jiljino pein aer ekkãke; im ioon im ium̦win peier robrak kõn mãj. Im raan im boñ ejjab bõjrak aer ba: “Eokkwõjarjar, eokkwõjarjar, eokkwõjarjar Jeova* Anij, eo Ekajoor Bõtata, eo ej m̦okta, eo ej kiiõ im eo ej itok.”
9 Jabdewõt iien ñe enjel̦ ro rej lel̦o̦k nõbar im aiboojoj im kam̦m̦oolol ñan Eo ej jijet ioon tũroon eo, Eo ej mour ñan indeeo im indeeo,
10 elder ro 24 rej bukwelõlõ im kabuñ im̦aan Eo ej jijet ioon tũroon eo, Eo ej mour ñan indeeo im indeeo, im rej jol̦o̦k kũrawũn ko aer ñan im̦aan tũroon eo im ba:
11 “Jeova* amwõj Anij, ej tõllo̦kũn am̦ bõk nõbar im aiboojoj im kajoor, kõnke kwaar kõm̦anm̦an men otemjej, im kõn wõt ankilaam̦ rar wal̦o̦k im kwaar kõm̦anm̦ani.”
Footnotes
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Ak “juon dekã eaorõk im ebũrõrõ unokan.”
^ Ak “em̦m̦aan ro rerũtto im rej tõl.”
^ Ak “ilo iol̦apl̦ap iturin tũroon eo.”
^ Lale “Jeova” ilo Kõmel̦el̦e Ko.
^ Lale “Jeova” ilo Kõmel̦el̦e Ko.
