Revelesõn 5:1-14
5 Innem iar reilo̦k im loe juon bok lemlem em̦õj jeje itum̦aan im itulikin im ej pãd ilo pein anbwijmaroñin Eo ej jijet ioon tũroon eo, im kar lukkuun jiil̦i kõn jimjuon jiil̦.
2 Im iar loe juon enjel̦ ekajoor ej kwal̦o̦k ilo juon ainikien el̦ap im ba: “Wõn eo ej tõllo̦kũn bwe en kõpel̦l̦o̦ke bok lemlem in im jiil̦ ko ie?”
3 Bõtab, ejjel̦o̦k jabdewõt jãn ilañ ak ijin ioon lal̦ ak ium̦win lal̦ ear maroñ kõpel̦l̦o̦ke bok lemlem in ak lale ilowaan.
4 Kõn men in, ear lukkuun l̦ap aõ jañ kõnke ejjel̦o̦k en̦ rar lo bwe ej tõllo̦kũn ñan an kõpel̦l̦o̦ke bok lemlem in ak lale ilowaan.
5 Ijoke juon iaan elder ro ear ba ñan eõ: “En bõjrak am̦ jañ. Lale m̦õk! L̦aiõn eo jãn bwijjin Juda, eo ej okran* Devid, ear bõk anjo̦, innem ekkar bwe en kõpel̦l̦o̦ke bok lemlem in im jiil̦ ko jimjuon ie.”
6 Im iar lo juon l̦aam̦ iturin* tũroon eo ilo iol̦apen enjel̦ ro emãn im elder ro, im ej jutak ãinwõt ñe em̦õj kar m̦ane, im ewõr an jimjuon doon im ewõr jimjuon mejãn, im mãj kein rej mel̦el̦ein jetõb* ko jimjuon an Anij me kar jilkinl̦o̦ki ñan aolepen lal̦.
7 Innem, ear etal ñan im̦aan im bõke bok lemlem eo jãn pein anbwijmaroñin Eo ej jijet ioon tũroon eo.
8 Im ke ej bõke bok lemlem eo, enjel̦ ro emãn im elder ro 24 rar bukwelõlõ im̦aan L̦aam̦ eo, im kajjojo iaaer ear wõr ippãer juon arp im bowl gold ko robrak kõn kaijurjur. (Menin kaijurjur kein rej mel̦el̦ein jar ko an ro rekkwõjarjar.)
9 Im rej al kõn juon al ekããl, eo ej ba: “Kwe eo ej tõllo̦kũm̦ ñan am̦ bõk bok lemlem in im kõpel̦l̦o̦ke jiil̦ ko ie, bwe kar m̦an eok im kõn bõtõktõkũm̦ kwaar wiaik armej ro ñan Anij jãn bwij otemjej, kajin,* im jãn armej otemjej im aelõñ otemjej,
10 im kwaar kõm̦m̦an bwe ren erom juon aelõñ im bũrij ñan adwõj Anij, im rein renaaj kiiñ im tõl lal̦ in.”
11 Innem iar lo im roñ ainikien elõñ enjel̦ ro rej kaapool̦e tũroon eo, im enjel̦ ro emãn im elder ro, im oraer ej joñoul to̦ujin alen joñoul to̦ujin, im elõñ to̦ujin alen elõñ to̦ujin,
12 im ilo juon ainikien el̦ap, rej ba: “L̦aam̦ eo kar m̦ane ej tõllo̦kũn bõk maroñ, m̦weiie, mãlõtlõt, kajoor, nõbar, aiboojoj, im wũjtak.”
13 Innem iar roñ an menin kõm̦anm̦an ko otemjej ilañ im ioon lal̦ im ium̦win lal̦ im ilo lo̦jet kab aolep men ko ie ba naan kein: “Ñan Eo ej jijet ioon tũroon eo im ñan L̦aam̦ eo, en ilo̦k nõbar, aiboojoj, wũjtak im maroñ ñan indeeo im indeeo.”
14 Im enjel̦ ro emãn rar ba: “Amen!” im elder ro rar bukwelõlõ im kabuñ ñan Anij.
Footnotes
^ Ak “nejin.”
^ Kajin Grik, “iol̦apl̦apin.”
^ Ak “kajoor.” Lale “Jetõb kwõjarjar” ilo Kõmel̦el̦e Ko.
^ Kajin Grik, “lo.”
