Revelesõn 9:1-21
9 Enjel̦ eo kein kal̦alem ear uuki jilel eo ippãn, innem iar lo juon iju ear wõtlo̦k jãn lañ ñan ioon lal̦ in, im kar lel̦o̦k ñane ki in ro̦ñin abyss* eo.
2 Im ear kõpel̦l̦o̦ke ro̦ñin abyss* eo, im ear baatat lõñtak jãn ro̦ñ eo ãinwõt an baat wal̦o̦ktok jãn juon um̦ ekilep, im al̦ im mejatoto rar marok kõn wõt an baatat jãn ro̦ñ eo.
3 Im ear wal̦o̦ktok locust ko jãn baat eo im pãd ioon lal̦ in, im kar lel̦o̦k maroñ ñan er, ejja maroñ eo wõt ewõr ippãn mãdepep ko an lal̦.
4 Im kar jiroñ er bwe ren jab ko̦kkure ujooj ko ioon lal̦, ak jabdewõt menin eddek emmaroro ak jabdewõt wõjke, ijello̦kun wõt armej ro ejjel̦o̦k jiil̦ eo an Anij ioon dem̦aer.
5 Ear jab mãlim an locust kein m̦an er, bõtab kar kamãlim er ñan kaeñtaan er ium̦win l̦alem allõñ, im aer eñtaan ear ãinwõt an juon armej eñtaan ñe juon mãdepep ej kiji.
6 Ilo naaj tõre en̦, armej renaaj pukot kilen aer mej bõtab rejjãmin loe, im renaaj kõn̦aan mej bõtab mej enaaj ko jãn er.
7 Im jekjekin locust ko rar ãinwõt kidia ko rej pojak ñan tarin̦ae; im ioon bõraer ear wõr juon men ãinwõt kũrawũn gold, im turin mejãer ãinwõt mejãn armej,
8 bõtab kool̦an bõraer ear ãinwõt kool̦an bõran kõrã. Im ñier ear ãinwõt ñiin l̦aiõn,
9 im ear wõr aer penjãn ob ãinwõt penjãn ob ko kõm̦m̦an jãn aen. Im ainikien aer ekkãke ear ãinwõt ainikien an kidia im jariot ko ettõr in ilen tarin̦ae.
10 Bareinwõt, teel̦ier ear ãinwõt teel̦in mãdepep ko rebaijin, im kõn teel̦ier ewõr aer maroñ ñan kõmetak armej ro ium̦win l̦alem allõñ.
11 Im ewõr juon aer kiiñ, eo ej enjel̦ in abyss* eo. Ilo kajin Hibru etan in Abaddon,* ak ilo kajin Grik etan in Apollyon.*
12 Jerata eo kein kajuon emootl̦o̦k. Roñjake m̦õk! Ebar wõr ruo jerata rej pojakin wal̦o̦k ãlikin men in.
13 Enjel̦ eo kein kajiljino ear ukwi jilel eo ippãn. Innem iar roñ juon ainikien jãn doon ko ilo lokatok gold eo ej pãd im̦aan Anij,
14 im ej ba ñan enjel̦ eo kein kajiljino epãd jilel eo ippãn im ba: “Kwõn karõl̦o̦k enjel̦ ro emãn em̦õj liãpe er ilo reba eo el̦ap etan Upretis.”
15 Innem kar karõl̦o̦k enjel̦ ro emãn, ro kar kõpooj er ñan awa eo, raan eo, allõñ eo, im iiõ eo, bwe ren m̦an juon m̦õttan jilu in armej ro.
16 Iar roñ joñan oran rũttarin̦ae ro rej uwe ioon kidia ko, oraer ej 20,000 alen 10,000.*
17 Im ãindein aõ kar lo kidia ko im ro rej uwe ioer ilo pijen eo: Penjãn ob ko aer rekõl̦ar bũrõrõ ãinwõt kijeek im rekõl̦ar blue eddo im yellow, im bõran kidia ko rar ãinwõt bõran l̦aiõn, im kijeek im baat im sulfur* rej diwõjl̦o̦k jãn lo̦ñier.
18 Juon m̦õttan jilu in armej ro rar mej jãn menin kaeñtaan kein jilu rar diwõjl̦o̦k jãn lo̦ñiin kidia ko, kijeek, baat, im sulfur.
19 Maroñ eo an kidia kein epãd ilo lo̦ñier im ilo teel̦ier, im teel̦ier rej ãinwõt jineik ko im bareinwõt ewõr bõraer, im rej kõjerbal teel̦ier ñan kõjorrããn armej.
20 Bõtab armej ro jet me rar jab mej jãn menin kaeñtaan kein, rar jab ukel̦o̦k jãn jerbal ko an peier; rar jab bõjrak jãn aer kabuñ ñan jetõb ko rettoon,* im ekjab ko kõm̦m̦an jãn gold, jelba, kõba, dekã im al̦al̦, ko rejjab maroñ lol̦o̦kjen̦, roñl̦o̦kjen̦ ak etetal,
21 im rar jab ukel̦o̦k jãn aer uror, anijnij, l̦õñ* im ko̦o̦t.
Footnotes
^ Mel̦el̦ein, “juon ro̦ñ elukkuun m̦wilal̦.” Lale “Abyss” ilo Kõmel̦el̦e Ko.
^ Mel̦el̦ein, “juon ro̦ñ elukkuun m̦wilal̦.” Lale “Abyss” ilo Kõmel̦el̦e Ko.
^ Mel̦el̦ein, “juon ro̦ñ elukkuun m̦wilal̦.” Lale “Abyss” ilo Kõmel̦el̦e Ko.
^ Mel̦el̦ein, “Ko̦kkure.”
^ Mel̦el̦ein, “ri-Ko̦kkure.”
^ Mel̦el̦ein, 200,000,000.
^ Juon kain bo̦uta elukkuun kajoor an bwil im ekajoor bwiin ñe ej bwil.
^ Naan eo ilo kajin Grik ej dai·mo′ni·on, ej jitõñl̦o̦k ñan enjel̦ ro renana.
^ Naan eo ilo kajin Grik ej por·nei′a. Lale “L̦õñ” ilo Kõmel̦el̦e Ko.
