Galetia 1:1-24
1 Ña Paul, juon rijjilõk eo im ejjab kããlõt in armej, bõtab ej kããlõt in Jesus Christ im Anij, eo ej Jemãdwõj im ear kõjerkak Christ jãn mej.
2 Ña im aolep ro jeid im jatid rej pãd ippa, kõmij jejewaj ñan eklejia ko ilo Galetia:
3 Jouj eo el̦ap im aenõm̦m̦an eo jãn Anij, eo ej Jemãdwõj, im jãn Irooj Jesus Christ, en pãd ippemi.
4 Ear lel̦o̦k mour eo an make kõn jerawiwi ko ad bwe en maroñ lo̦mo̦o̦ren kõj jãn jukjukun pãd* in enana. Men in ej ekkar ñan ankilaan Anij, eo ej Jemãdwõj,
5 im eo ej tõllo̦kũn bõk nõbar ñan indeeo im indeeo. Amen.
6 Ikanooj in bwilõñ kõn an m̦õkaj ami el̦l̦o̦k jãn Eo ear kũr kom̦ ikijjeen jouj eo el̦ap an Christ bwe kom̦win bõk bar juon kain ennaan em̦m̦an.
7 Ejjab mel̦el̦ein bwe ebar wõr juon ennaan em̦m̦an, bõtab ewõr jet rej kapañ kom̦ im rekõn̦aan ukot ennaan eo em̦m̦an kõn Christ.
8 Eo ej kwal̦o̦k juon ennaan em̦m̦an im eoktak jãn ennaan eo em̦m̦an kõmar kwal̦o̦k ñan kom̦, eokwe en lia jekdo̦o̦n ñe ej juon iaam ak juon enjel̦ jãn lañ.
9 Ãinwõt ammim kar ba m̦oktal̦o̦k, ij bar ba kiiõ, Jabdewõt eo ej kwal̦o̦k ñan kom̦ juon ennaan em̦m̦an im eoktakl̦o̦k jãn ennaan eo kom̦ar tõmake, eokwe armej in en lia.
10 Ij kajjioñ in kareel wõn, armej ke ak Anij? Ke ta, ij kajjioñ kabuñbũruon armej? El̦aññe ij kabuñbũruon armej ñan kiiõ, innem iban kar ri-karejeran* Christ.
11 Ro jeiũ im jatũ, ikõn̦aan bwe kom̦win jel̦ã bwe ennaan eo em̦m̦an iar kwal̦o̦k ñan kom̦ ejjab jãn armej,
12 kõnke iar jab bõke jãn armej im ejjab armej men eo ear katakin eõ kake, bõtab Jesus Christ eo ear kwal̦o̦ke ñan ña.
13 Ejjel̦o̦k pere bwe em̦õj ami kar roñ kõn kõm̦m̦an ko aõ m̦okta ke iar pãd ilo kabuñ eo an ri-Ju ro, kõn aõ kar lukkuun* kaeñtaan im ko̦kkure eklejia eo an Anij.
14 Bareinwõt, el̦apl̦o̦k aõ kar kõm̦m̦an wõnm̦aanl̦o̦k ilo kabuñ eo an ri-Ju ro jãn elõñ iaan ro detta wõt ilo aelõñ eo aõ, im ear l̦apl̦o̦k aõ kijejeto kõn m̦anit ko an ro jim̦m̦aõ.*
15 Bõtab Anij, eo ear kõm̦m̦an bwe in l̦otak, im ear kũr eõ ikijjeen jouj eo an el̦ap, ear l̦õmn̦ak ej juon men em̦m̦an
16 bwe en kõjerbal eõ ñan kwal̦o̦k kõn Nejin, kõnke in kwal̦o̦k kõn ennaan eo em̦m̦an kõn e ñan ri-aelõñ ko. Bõtab, iar jab m̦õkaj im etal im kajjitõk jipañ jãn jabdewõt armej.*
17 Bareinwõt, iar jab wanlõñl̦o̦k ñan Jerusalem ñan ippãn ro rar rijjilõk m̦oktal̦o̦k jãn ña, ak iar ilo̦k ñan Arebia, innem jepl̦aak ñan Damaskõs.
18 Jilu iiõ tokãlik, iar wanlõñl̦o̦k ñan Jerusalem bwe in lol̦o̦k Sipas* im iar pãd ippãn ium̦win 15 raan.
19 Bõtab iar jab loe rijjilõk ro jet ijello̦kun wõt Jemes, eo jatin Irooj.
20 Kiiõ ikijjeen men kein ij jejewaj kaki ñan kom̦, ij kallim̦ur ñan kom̦ im̦aan mejãn Anij bwe ijjab riab.
21 Tokãlik, iar ilo̦k ñan jikin ko ilo Siria im Silisia.
22 Bõtab eklejia ko an Christ ilo Judia rar jaje kajjieõ.
23 Men eo wõt rar roñ kõn ña ej eñin: “Em̦m̦aan eo ekõn kaeñtaan kõj im ko̦kkure eklejia ko* ej kiiõ kwal̦o̦k kõn ennaan eo em̦m̦an.”
24 Kõn men in, rar jino nõbar Anij kõn wõt ña.
Footnotes
^ Lale “Jukjukun pãd” ilo Kõmel̦el̦e Ko.
^ Ak “ri-kõm̦akoko an.”
^ Kajin Grik, “kõn an kar l̦e jãn joñan aõ.”
^ Kajin Grik, “ro jema.”
^ Kajin Grik, “kanniõk im bõtõktõk.”
^ Ãt eo juon etan Piter.
^ Kajin Grik, “tõmak eo.”
