Galetia 3:1-29
3 Kom̦ ri-Galetia ro, kom̦ lukkuun jajel̦o̦kjen̦! Kom̦ ro me kar lukkuun kõmel̦el̦eik er kõn aer kar dilaik Jesus Christ ilo jurõn al̦al̦, wõn ear m̦on̦e kom̦?*
2 Ewõr juon men ikõn̦aan kajjitõk ippemi:* Kom̦ar bõk jetõb kwõjarjar* ikijjeen ami kõm̦m̦ani men ko kien eo ej ba ke ak ikijjeen ami tõmak ilo men eo kom̦ar roñ kake?
3 Kom̦ lukkuun jajel̦o̦kjen̦ ke? Kom̦ar jino etetal ilo juon ial̦ ekããl ilo ami atartar ioon jetõb kwõjarjar,* im kiiõ kom̦ij kõjem̦l̦o̦k ial̦ in ilo ami atartar ioon kanniõk ke?
4 Ta ejjel̦o̦k tokjãn ami kar iioon elõñ mãlejjoñ ke? El̦ap aõ jel̦ã ke ejjab jejtokjãn.
5 Kõn men in, eo ear jipañ kom̦ bwe kom̦win bõk jetõb kwõjarjar* im kõm̦m̦ani jerbal ko rekabwilõñlõñ ibwiljimi, ear kõm̦m̦ani men kein kõn wõt ami l̦oor kien ke? Ke ta, ear kõm̦m̦ani kõn wõt ami tõmak ilo men eo kom̦ar roñ kake?
6 Ejja ãinwõt an kar Ebream “likũt an tõmak ilo Jeova,* im kar watõke bwe ej juon eo ewãnõk.”
7 Innem, kom̦ kanooj in jel̦ã bwe ro rej kwal̦o̦k aer tõmak rej nejin Ebream.
8 Kiiõ, jeje ko rar kwal̦o̦k m̦oktal̦o̦k bwe Anij enaaj kõwãnõk ri-aelõñ ko ikijjeen aer tõmak. Innem, ear kwal̦o̦k m̦oktal̦o̦k kõn ennaan eo em̦m̦an ñan Ebream ilo an ba: “Aolep ri-aelõñ ko renaaj jeraam̦m̦an kõn wõt kwe.”
9 Kõn men in, ro rej kwal̦o̦k aer tõmak rejeraam̦m̦an ãinwõt Ebream, eo ear bareinwõt tõmak.
10 Ro otemjej rej atartar ioon ta ko kien eo ej ba relia kõnke em̦õj je: “Elia jabdewõt eo ejjab wõnm̦aanl̦o̦k wõt im kõm̦m̦ani aolep men ko em̦õj jei ilo bok lemlem in Kien* eo.”
11 Bareinwõt, elukkuun alikkar bwe Anij ejjab kõwãnõk armej ikijjeen kien eo, kõnke juon “eo ewãnõk enaaj mour kõn wõt an tõmak.”
12 Kien eo ejjab pedped ioon tõmak, bõtab “jabdewõt eo ej kõm̦m̦ane men ko Kien eo ej ba, enaaj mour ikijjeen men ko Kien eo ej ba.”
13 Christ ear kõl̦l̦ãik on̦ããn ad rõl̦o̦k jãn ad lia kõn Kien eo. Ear kõm̦m̦ane men in ikijjeen an kar kõm̦m̦an bwe e eo en lia im jab kõj, bwe em̦õj je: “Elia jabdewõt eo ej toto ilo jurõn al̦al̦.”
14 Unin ej kõnke ri-aelõñ ko ren maroñ bõk jeraam̦m̦an ko an Ebream ikijjeen Christ Jesus, im bwe jen maroñ bõk jetõb kwõjarjar,* eo kar kallim̦ur kake kõn wõt ad tõmak.
15 Ro jeiũ im jatũ, in kwal̦o̦k juon waanjoñak im ej wal̦o̦k ilo mour ko an armej: Ñe em̦õj kapene juon bujen, meñe armej men eo ej kõm̦m̦ane, ak ejjel̦o̦k juon emaroñ rupe ak kakkobabatok ñane.
16 Ke kar kwal̦o̦k kallim̦ur ko ñan Ebream im ñan eo nejin,* kar jab ba, “im ñan ro bwijjim̦,”* ñan jitõñl̦o̦k ñan elõñ armej, bõtab kar ba, “ñan eo nejũm̦,”* im ej jitõñl̦o̦k ñan juon wõt armej, eo ej Christ.
17 Bareinwõt ij ba men in: Kien eo ear wal̦o̦k 430 iiõ ko tokãlik, meñe ãindein ak ejjab kõm̦m̦an an jako bujen eo Anij ear kõm̦m̦ane im ejjab rupe kallim̦ur eo an.
18 El̦aññe menin jolõt eo ej pedped ioon kien eo, innem mel̦el̦ein bwe ejako an pedped ioon kallim̦ur eo. Ilo m̦ool, Anij ear m̦õn̦õn̦õ in lel̦o̦k men in ñan Ebream ikijjeen an kar kõm̦m̦ane juon kallim̦ur.
19 Innem kar ta unin Kien eo? Kar kobaiktok ñan kaalikkar jerawiwi ko an armej, im ear jerbal m̦ae iien eo nejin* ear itok, eo kar kõm̦m̦ane kallim̦ur eo ñane. Bareinwõt kar kõjerbal enjel̦ ro bwe ren lel̦o̦k Kien eo ñan juon ri-kõllaajrak bwe en lel̦o̦k ñan armej ro.
20 Ejjab menin aikuj bwe en wõr ri-kõllaajrak ñan juon bujen el̦aññe ej kitibuji juon wõt armej. Ãindein ippãn Anij, e wõt ear kõm̦m̦ane bujen eo.
21 Kõn men in, mel̦el̦ein ke bwe Kien eo ej jum̦aik kallim̦ur ko an Anij? Ejjab ñan jidik! Kõnke el̦aññe ewõr juon kien emaroñ kar letok mour, innem mel̦el̦ein bwe juon emaroñ kar wãnõk ikijjeen kien.
22 Bõtab Jeje ko rar liaakel̦o̦k men otemjej bwe ren pãd ium̦win jerawiwi, kõnke ro rej tõmak ren maroñ bõk jeraam̦m̦an ko kar kallim̦ur kaki ñan ro rej kwal̦o̦k aer tõmak ilo Jesus Christ.
23 Bõtab m̦okta jãn an kar tõmak eo itok, kien eo ear liãpe kõj im jaar pãd ium̦win kien eo im kõttar an tõmak eo wal̦o̦k.
24 Innem Kien eo ear ãinwõt juon ri-kõjparok* kõj im ear tõll̦o̦k kõj ñan Christ bwe jen maroñ wãnõk kõn wõt tõmak.
25 Ak kiiõ ke em̦õj an itok tõmak eo, ejako ad pãd ium̦win juon ri-lale.*
26 Ilo m̦ool, kom̦ij aolep nejin Anij ikijjeen tõmak eo ami ilo Christ Jesus.
27 Bwe aolep ro rar peptaij ilo Christ, rej anõke Christ.
28 Kõnke kom̦ij aolep juon wõt ippãn Christ Jesus, ejjel̦o̦k oktak ikõtaan ri-Ju im ri-Grik, im ri-kõm̦akoko im ri-anemkwõj, kab em̦m̦aan im kõrã.
29 El̦aññe kom̦ij doon Christ, innem kom̦ij lukkuun ro nejin* Ebream, im kom̦ naaj ri-jolõt ekkar ñan kallim̦ur eo.
Footnotes
^ Kajin Grik, “wõn n̦e ear ko̦o̦le kom̦?”
^ Kajin Grik, “katak jãn kom̦.”
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Lale “Jeova” ilo Kõmel̦el̦e Ko.
^ Ej jitõñl̦o̦k ñan Kien Moses.
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Kajin Grik, “ineen.”
^ Kajin Grik, “ineem̦.”
^ Kajin Grik, “ineem̦.”
^ Kajin Grik, “ineen.”
^ Ak “ri-katakin.”
^ Ak “ri-katakin.”
^ Kajin Grik, “ineen.”
