Galetia 4:1-31
4 Kiiõ ij jiroñ kom̦ bwe ñe ri-jolõt eo ej juon ajri jidikdik wõt, innem ejjab oktak jãn juon ri-karejar, meñe e eo ej irooj ioon men otemjej,
2 kõnke ej pãdwõt ium̦win maroñ eo an ro rej bõk eddon im ri-karejar ro m̦ae iien ejejjet raan eo jemãn ear karõke.
3 Ãindein bareinwõt kõj, ke jaar ajri wõt, jekõn ri-kõm̦akoko ñan l̦õmn̦ak ko an lal̦ in.
4 Bõtab ke ear jejjet iien eo em̦õj karõke, Anij ear jilkintok Nejin, eo ear l̦otak jãn juon kõrã, im ear pãd ium̦win kien,
5 bwe en kanemkwõj ro rej pãd ium̦win kien kõn juon on̦ããn, im bwe Anij en bõk kõj bwe jen ro nejin.
6 Kiiõ ke kom̦ij ro nejin Anij, ear jilkintok jetõb kwõjarjar,* eo ear lel̦o̦k ñan Nejin, bwe en pãd ilo bũruod, im men in ej kõm̦akũt kõj bwe jen kũri im ba: “Abba,* Jema!”
7 Kõn men in, ejako ami ri-kõm̦akoko ak kom̦ij ro nejin. Innem el̦aññe kom̦ij nejin Anij, enaaj bareinwõt kõm̦m̦an bwe kom̦win ri-jolõt.
8 Bõtab, ke kom̦ar jab jel̦ã kajjien Anij, kom̦ar ri-kõm̦akoko ñan anij ko rewaan.
9 Ak kiiõ ke em̦õj ami jel̦ã kajjien Anij, ak jen ba, kiiõ ke em̦õj an Anij jel̦ã kajjiemi, innem etke kom̦ij bar ro̦o̦llikl̦o̦k ñan men ko rem̦õjn̦o̦ im ejjel̦o̦k tokjãer an lal̦ in im kõn̦aan bar ri-kõm̦akoko ñani?
10 Elukkuun l̦ap ami kautieji raan ko, allõñ ko, iien ko, im iiõ ko.
11 Ikkõl ñe ejejtokjãn aõ kar kate eõ kõn kom̦.
12 Ro jeiũ im jatũ, ij akwel̦ap ñan kom̦ bwe kom̦win ãinwõt ña kõnke ikar ãinwõt kom̦ m̦okta. Ejjel̦o̦k men en̦ enana kom̦ar kõm̦m̦ane ñan ña.
13 Kom̦ jel̦ã bwe unin aõ kar maroñ kwal̦o̦k ennaan eo em̦m̦an ñan kom̦ ilo iien eo jinointata, ej kõn wõt aõ kar nañinmej.
14 Im meñe nañinmej eo aõ ear kõm̦m̦an bwe en pen ñan kom̦ ak kom̦ar jab kõjekdo̦o̦n eõ ak jõjõik eõ,* bõtab kom̦ar kõm̦m̦an ñan ña ãinwõt juon enjel̦ an Anij, ak ãinwõt Christ Jesus.
15 El̦e ial̦o̦k m̦õn̦õn̦õ eo ami kar m̦okta? Ij ba ñan kom̦ bwe ñe en kar wõr ami maroñ, kom̦ naaj kar itũki mejãmi im litok ñan ña.
16 Ak kiiõ, ta em̦õj aõ erom ami ri-kõjdat kõn wõt aõ kwal̦o̦k m̦ool ñan kom̦ ke?
17 Armej ran̦e rej lukkuun kate er bwe kom̦win rejetake er, bõtab ejjab kõn juon un em̦m̦an. Rekõn̦aan kattol̦o̦k kom̦ jãn ña bwe kom̦win kõn̦aan l̦oor er.
18 Bõtab, ejjel̦o̦k jorrããn ñe juon ej lukkuun kate e bwe kom̦win rejetake kõn un ko rem̦m̦an, ijoke en jab ilo iien ko wõt ij pãd ippemi.
19 Ro nejũ, ejjel̦o̦k jorrããn ilo men in. Ij bar eñtaan kõn kom̦ ãinwõt an juon kõrã eñtaan ñe ej pojakin kõl̦l̦otak, im enaaj ãindein m̦ae iien kom̦ naaj kwal̦o̦k wãween ko an* Christ.
20 Yokwe bwe in kar pãd ippemi kiiõ im kõnono ilo juon wãween eoktakl̦o̦k kõnke ekanooj in l̦o̦kjenaõ kõn kom̦.
21 Kom̦ ro rekõn̦aan pãd ium̦win kien eo, ba m̦õk ñan ña, Ta kom̦ij jab jel̦ã ta eo Kien eo ej ba ke?
22 Ñan waanjoñak, kar je im ba bwe ear wõr ruo nejin Ebream l̦addik, juon ñan ippãn kõrã eo ej ri-kõm̦akoko im juon ñan ippãn kõrã eo eanemkwõj.
23 Bõtab eo nejin n̦a ippãn ri-kõm̦akoko eo, ear l̦otak ãinwõt an aolep ajri l̦otak.* Ak eo nejin n̦a ippãn kõrã eo eanemkwõj ear l̦otak ikijjeen juon kallim̦ur.
24 Bwebwenato in ej bar juon menin kõkkar, kõnke kõrã rein rej jutak kõn ruo bujen. Juon iaan bujen kein kar kõm̦m̦ane ilo Tol̦ Sainai, im aolep ro rej pãd ium̦win bujen in rej ri-kõm̦akoko, im ej jitõñl̦o̦k ñan Hegar.
25 Hegar ej mel̦el̦ein Sainai, juon tol̦ ilo Arebia, im ej jutak kõn Jerusalem eo rainin kõnke ej ri-kõm̦akoko ippãn ro nejin.
26 Ak Jerusalem eo ilañ eanemkwõj, im eñin ej kõrã eo jined.
27 Bwe em̦õj je: “Kwõn m̦õn̦õn̦õ, kõrã en̦ ewar im ejjab maroñ wõr nejin. Kwõn kõl̦l̦aaj ainikiõm̦ ilo lañlõñ, kwe eo kwõjjab iioon metak in keotak, bwe elõñl̦o̦k ro nejin kõrã eo ejool* jãn kõrã eo ewõr pãleen.”
28 Kiiõ ro jeiũ im jatũ, kom̦ij ajri ro rar l̦otaktok ikijjeen kallim̦ur eo ãinwõt kar Aisak.
29 Bõtab eo ear l̦otak ãinwõt an aolep ajri l̦otak,* ear jino jum̦ae eo ear l̦otak ikijjeen jetõb kwõjarjar,* ãindein an bar wal̦o̦k men in kiiõ.
30 Bõtab ta eo jeje ko rej ba? “Kwõn kadiwõjl̦o̦k kõrã n̦e ej ri-kõm̦akoko im l̦adik n̦e nejin bwe l̦adik n̦e nejin ejjãmin ri-jolõt ippãn l̦adik n̦e nejin kõrã eo eanemkwõj.”
31 Innem ro jeiũ im jatũ, jejjab nejin kõrã eo ej ri-kõm̦akoko, bõtab jej nejin kõrã eo eanemkwõj.
Footnotes
^ Ak “kajoor eo an.” Lale “Jetõb kwõjarjar” ilo Kõmel̦el̦e Ko.
^ Juon naanin Hibru ak Aramaic im ej mel̦el̦ein “O Jema!”
^ Ak “kaplouk eõ.”
^ Ak “ãinwõt.”
^ Kajin Grik, “ekkar ñan kanniõk.”
^ Ak “ewar.”
^ Kajin Grik, “l̦otak ekkar ñan kanniõk.”
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
