Galetia 6:1-18
6 Ro jeiũ im jatũ, el̦aññe kom̦ij lo bwe juon ej kõm̦m̦an bõd, meñe ilo iien ko ejjab kile, kom̦ ro rerũtto ilo tõmak kom̦win kajim̦we ilo jouj. Bõtab kom̦win kõjparok kom̦ make kõnke ikkõl ñe kom̦ bareinwõt naaj po ilo kapo.
2 Wõnm̦aanl̦o̦k wõt im ineek apañ ko an doon, ilo wãween in, kom̦ naaj kajejjet kien Christ.
3 Bwe el̦aññe jabdewõt ej l̦õmn̦ak bwe eutiej, meñe ilo m̦ool ejjab utiej, ej m̦on̦e e make.
4 Ijoke kajjojo armej en make etale kõm̦m̦an ko an, innem enaaj wõr unin an lañlõñ kõn e make, im jab kõn an keidi e ñan ro jet,
5 kõnke kajjojo armej enaaj make ineek eddo ko an.
6 Bareinwõt jabdewõt eo ej katak* kõn naan eo, en jipañl̦o̦k eo ej an ri-katakin* kõn aolep men ko an rem̦m̦an.
7 Kom̦win jab m̦on̦e kom̦ make:* Anij ejjab juon eo jemaroñ kabwebweiki.* Jabdewõt men eo juon armej ej jeore, enaaj bareinwõt m̦adm̦õde.
8 Bwe eo ej jeor ekkar ñan kanniõk, enaaj m̦adm̦õd jorrããn kõn wõt kõn̦aan ko an kanniõk. Bõtab eo ej jeor ekkar ñan jetõb kwõjarjar,* enaaj m̦adm̦õd mour indeeo ikijjeen jetõb kwõjarjar.*
9 Kõn men in, jen jab m̦õk in kõm̦m̦an em̦m̦an kõnke ilo iien eo ejejjet, jenaaj m̦adm̦õd leen el̦aññe jejjab ebbeer.*
10 Innem toon wõt an wõr ad maroñ,* jen kõm̦m̦an em̦m̦an ñan aolep, el̦aptata ñan ro nukũd ilo tõmak.
11 Lale m̦õk an ikkillep jeje kein, iar make jei kõn peiũ ñan kom̦.
12 Aolep ro rekõn̦aan kabuñbũruon armej, errein ej armej ro rej kajjioñ kareel kom̦ bwe kom̦win m̦wijm̦wij. Unin aer ãindein ej kõnke ren jab iioon eñtaan ilo aer bõk al̦al̦ in eñtaan* eo an Christ.
13 Bwe jekdo̦o̦n ro rej m̦wijm̦wij ak er bareinwõt rejjab pokake Kien eo, bõtab rekõn̦aan bwe kom̦win m̦wijm̦wij kõnke ren kõmjãje kõn men eo kom̦ar kõm̦m̦ane ñan ãnbwinnimi.*
14 Ak ñan ña, en ejjel̦o̦k men en̦ ij kõmjãje kake ijello̦kun wõt kõn Jesus Christ ad Irooj, eo ear mej ilo al̦al̦ in eñtaan.* Ñan ña, kar liaakel̦o̦k lal̦ in ñan mej kõn wõt e, bõtab ñan lal̦ in, kar liaakel̦o̦k eõ ñan mej kõn wõt e.
15 Ejjel̦o̦k tokjãn m̦wijm̦wij ak jab m̦wijm̦wij, bõtab men eo eaorõk in ej juon menin kõm̦anm̦an ekããl.
16 Ñan aolep ro rej mour ekkar ñan naanin kakapilõklõk in, aenõm̦m̦an im tũriam̦o en pãd ioer, aet, ippãn Israel an Anij.
17 Jãn kiiõ im etal, ejjel̦o̦k juon en kõm̦m̦an apañ ñan ña kõnke ewõr kõkal̦l̦e ko ilo ãnbwinnũ me rej kaalikkar bwe ij juon ri-karejeran* Jesus.
18 Ro jeiũ im jatũ, jouj eo el̦ap an ad Irooj Jesus Christ en pãd ippemi ilo ami kwal̦o̦k l̦õmn̦ak* ko rem̦m̦an. Amen.
Footnotes
^ Ak “katak ilo naan wõt.”
^ Ak “eo ej an ri-katakin ilo naan.”
^ Ak emaroñ, “Kom̦win jab kõtl̦o̦k an ro jet m̦on̦e kom̦.”
^ Kajin Grik, “kajjirere kake.”
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Ak “m̦õk.”
^ Kajin Grik, “wõr iien em̦õj karõke.”
^ Lale “Al̦al̦ in eñtaan” ilo Kõmel̦el̦e Ko.
^ Kajin Grik, “kõn kanniõkimi.”
^ Lale “Al̦al̦ in eñtaan” ilo Kõmel̦el̦e Ko.
^ Ak “ri-kõm̦akoko ñan.”
^ Naan eo ilo kajin Grik ej pneu′ma. Lale “Pneu′ma” ilo Kõmel̦el̦e Ko.
