Hibru 10:1-39
-
Katok in menninmour ko rejjab maroñ jol̦o̦k jerawiwi (1-4)
-
Kien eo ear annañel̦o̦k men ko rej itok (1)
-
-
Christ ear katok juon wõt alen (5-18)
-
Juon ial̦ in mour ekããl (19-25)
-
Jab kajejtokjãn ad kweilo̦k (24, 25)
-
-
Naanin kakkõl n̦ae ro rej jerawiwi ilo aer jel̦ã kake (26-31)
-
Jen lõke im tõmak bwe jen kijenmej (32-39)
10 Innem kõnke Kien eo ej annañel̦o̦k men ko rem̦m̦an renaaj itok, ijoke ejjab lukkuun men ko kein renaaj wal̦o̦k, alikkar bwe Kien eo ejjab maroñ* kõm̦m̦an bwe ro rej kepaake Anij ren weeppãn ikijjeen menin katok ko rej ajil̦o̦k aolep iiõ.
2 El̦aññe ear kõm̦m̦an aer weeppãn, innem enaaj kar bõjrak an ro rej lel̦o̦k aer menin katok* ajil̦o̦k men kein kõnke renaaj l̦ak kar erreo, ejako an abn̦õn̦õ bõklõkõt ko aer kõn jerawiwi ko aer.
3 Ijoke menin katok kein rej kein kakeememej er kajjojo iiõ kõn aer jerawiwi,
4 kõnke bõtõktõkin kau kom̦aan ko kab koot ko rejjab maroñ jol̦o̦k jerawiwi.
5 Kõn men in, ke ear itok ñan lal̦ in ear ba: “‘Kwaar jab kõn̦aan menin katok ko kab menin joortak ko, bõtab kwaar kõpooj juon ãnbwin ñan ña.
6 Ear jab buñbũruom̦ kõn menin joortak ko rej tũli me relikiio im menin katok ko kõn jerawiwi.’
7 Innem iar ba: ‘Roñjake m̦õk! Iar itok (ilo bok lemlem eo, kar jeje kõn ña) bwe in kõm̦anm̦an ankilaam̦, O Anij.’”
8 Ãlikin an kar ba: “Kwaar jab kõn̦aan im ear jab buñbũruom̦ kõn menin katok ko im menin joortak ko, im kõn menin katok ko rej tũli me relikiio im menin katok ko kõn jerawiwi”—ko rej ajil̦o̦k ekkar ñan Kien eo—
9 innem ear ba: “Roñjake m̦õk! Iar itok bwe in kõm̦anm̦an ankilaam̦.” Ear jol̦o̦k men eo m̦okta bwe en maroñ kajutak men eo kein karuo.
10 Kõn wõt ‘ankilaan’, kar kokkwõjarjar kõj ikijjeen an kar Jesus Christ katok kõn ãnbwinnin juon wõt alen.
11 Bareinwõt, raan otemjej aolep bũrij ro rej bõk ijoko jikier im kõm̦m̦ani jerbal ko rekkwõjarjar, im rej lel̦o̦k ejja menin katok ko wõt elõñ alen, ijoke men kein rekar jab lukkuun jol̦o̦k jerawiwi.
12 Ak armej in ear lel̦o̦k juon wõt menin katok ñan jol̦o̦k jerawiwi, im men in ej jerbal ñan indeeo, im ear jijet ituanbwijmaroñin pein Anij,
13 jãn iien in, ej kõttar m̦ae iien naaj likũt ro rej kõjdate bwe ren eran neen.
14 Innem kõn juon wõt menin katok, ear kõm̦m̦an bwe ro rekkwõjarjar ren weeppãn ñan indeeo.
15 Bareinwõt, jetõb kwõjarjar* ear bar kam̦oole men in ñan kõj ilo an kar ba:
16 “‘Eñin bujen eo inaaj kõm̦m̦ane ippãer ãlikin raan ko,’ Jeova* ej ba. ‘Inaaj likũt kien ko aõ ilo bũrueer im inaaj jei ilo l̦õmn̦ak ko aer.’”
17 Ãlikin ear ba: “Im ijjãmin bar keememejtok jerawiwi ko aer im jerbal ko aer renana.”
18 Kiiõ, ñe kar jeorl̦o̦k kain bõd rot kein, innem ejjab bar menin aikuj ñan lel̦o̦k menin katok ko kõn jerawiwi.
19 Kõn men in ro jeiũ im jatũ, kõnke jejjab mijak in* kõjerbal ial̦ eo ñan del̦o̦ñel̦o̦k jikin eo eokkwõjarjar ikijjeen bõtõktõkin Jesus,
20 eo ear kõpel̦l̦o̦ke* ñan kõj bwe en juon ial̦ in mour ekããl ikijjeen katiiñ eo, mel̦el̦ein, ãnbwinnin,
21 im kõnke ewõr juon ad bũrij ekanooj em̦m̦an im ej bõk eddon m̦weo im̦õn Anij,
22 innem jen kepaake Anij kõn juon bõro em̦ool im kõn tõmak eiio, ilo ad karreoik bũruod* jãn juon bõklõkõt enana im ilo ad karreoiki ãnbwinnid kõn dãn erreo.
23 Jen dãpij wõt jeraam̦m̦an eo ñan kwal̦o̦k ilo̦bwilej kõn kõjatdikdik eo ad ilo ad jab ebbeer, kõnke etiljek eo ear kallim̦ur.
24 Im jen l̦õmn̦ak kõn* doon bwe jen maroñ rõjañ* doon ñan kwal̦o̦k yokwe im jerbal ko rekanooj in em̦m̦an,
25 im jab kajejtokjãn ad kweilo̦k ippãn doon ãinwõt m̦anit an jet, bõtab jen rõjañ doon im en l̦apl̦o̦k ad kõm̦m̦ane men in ãinwõt ke kom̦ jel̦ã bwe raan eo ej epaaktok.
26 El̦aññe jej kõm̦m̦an wõt jerawiwi ilo ad jel̦ã kake bõtab em̦õj ad jel̦ã kõn jel̦ãl̦o̦kjen̦ eo ejim̦we kõn m̦ool eo, innem ejjel̦o̦k bar menin katok emaroñ jol̦o̦k jerawiwi ko ad,
27 ijoke enaaj wal̦o̦k juon ekajet ekalõl̦ño̦ñ im bareinwõt enaaj wal̦o̦k illu eo an Anij ebwil bwe en ko̦kkure ro rej jum̦ae.
28 Jabdewõt eo ear kõjekdo̦o̦n Kien Moses im ewõr ruo ak jilu ri-kam̦ool n̦ae e, naaj kar m̦ane bwe en mej ilo ejjel̦o̦k tũriam̦o.
29 Bõtab el̦aññe juon ej jum̦ae Nejin Anij im ej kajejtokjãn bõtõktõk eo ej kapen bujen eo kar kokkwõjarjar e kake, im ej kalluuk im kattoone jetõb kwõjarjar,* eo ej kwal̦o̦k jouj eo el̦ap an Anij, ta ami l̦õmn̦ak, ewi joñan an naaj l̦apl̦o̦k kaje eo ej tõllo̦kũn an armej in bõke?
30 Bwe jejel̦ã wõn Eo ear ba: “Kun̦aõ idenon̦e, inaaj n̦aon̦ãer kõn wõt jerbal ko aer renana.” Im kar bar ba: “Jeova* enaaj ekajete armej ro an.”
31 Ekaamijak wõt ñe juon enaaj bõk kaje jãn Anij eo emour.
32 Bõtab, kom̦win keememej wõt raan ko m̦okta ke kom̦ar kijenmej ium̦win apañ ko im menin kaeñtaan ko ãlikin ami kar meraml̦o̦k.
33 Ewõr iien ko kar likũt kom̦ ilo̦bwilej* bwe ren kajjirere kake kom̦ im kaeñtaan kom̦, im ewõr iien ko kom̦ar kobal̦o̦k ippãn* ro rar iioon eñtaan.
34 Bwe kom̦ar kwal̦o̦k ami tũriam̦o kõn ro rej kalbuuj im kom̦ar lañlõñ wõt jekdo̦o̦n ñe kar rakimi men ko m̦weiemi, kõnke kom̦ jel̦ã bwe ewõr m̦weiemi em̦m̦anl̦o̦k im enaaj pãd ñan indeeo.
35 Kõn men in, kom̦win jab jol̦o̦k ami peran,* bwe naaj lewaj jinõkjeej el̦ap.
36 Kom̦ij aikuj in kijenmej kõnke ñe em̦õj ami kõm̦anm̦an ankilaan Anij, kom̦ naaj maroñ bõk men eo kar kallim̦ur kake.
37 Bwe “jidik wõt iien,” im “eo ej itok enaaj tõpartok im eban rum̦wij.”
38 “Bõtab eo ej aõ ri-wãnõk enaaj mour kõn wõt an tõmak,” im “el̦aññe ej jenliklik, iban m̦õn̦õn̦õ ippãn.”
39 Ejjab kõj kain armej rot en̦ ej jenliklik ñan bõk ko̦kkure, bõtab kõj jej armej ro ewõr aer tõmak bwe jen lo̦mo̦o̦ren mour ko ad.
Footnotes
^ Ak emaroñ, “armej rejjab maroñ.”
^ Ak “ro rej kõm̦m̦ani jerbal ko rekkwõjarjar.”
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Lale “Jeova” ilo Kõmel̦el̦e Ko.
^ Ak “kõnke jej lõke bwe jemaroñ.”
^ Kajin Grik, “ejaake.”
^ Kajin Grik, “kabbũtũktũk bũruod bwe en erreo.”
^ Ak “kõl̦mãnl̦o̦kjen̦ kõn; lale.”
^ Ak “kõketak.”
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Lale “Jeova” ilo Kõmel̦el̦e Ko.
^ Kajin Grik, “ilo juon jikin kaloojoj.”
^ Ak “jutak ilikin.”
^ Kajin Grik, “kõnono ilo peran.”
