Hibru 11:1-40
11 Tõmak ej mel̦el̦ein lõke men ko jej kõjatdikdik kaki, im ej juon kein kam̦ool ñan kaalikkar* ñan kõj kõn men ko rej lukkuun wal̦o̦k im jejjab loi.
2 Bwe kõn an kar ro ilo iien ko etto* wõr aer tõmak, ear kwal̦o̦k an buñbũruon ippãer.
3 Kõn tõmak, jejel̦ã jãn naanin Anij bwe kar kõm̦anm̦an jukjukun pãd* in, innem men ko kar kõm̦anm̦ani im jej loi rar wal̦o̦k jãn men ko jejjab maroñ loi.
4 Kõn tõmak, Ebel ear lel̦o̦k ñan Anij juon menin katok em̦m̦anl̦o̦k jãn menin katok eo an Kein, im kõn tõmak in an, kar watõke ewãnõk kõnke Anij ear buñbũruon* kõn menin lel̦o̦k ko an, im ikijjeen tõmak eo an, meñe emej bõtab ej kõnono wõt.
5 Kõn tõmak, kar kõm̦akũt Inok bwe en jab lo mej, im ejjel̦o̦k jabdewõt jikin rar lo e ie kõnke Anij ear kõm̦akũti, bõtab m̦okta jãn an kar kõm̦akũti, kar kwal̦o̦k ñane bwe ej juon eo ear kabuñbũruon Anij.
6 Bareinwõt, el̦aññe ejjel̦o̦k tõmak, ejjel̦o̦k en̦ emaroñ kabuñbũruon Anij, bwe jabdewõt eo ej kepaake Anij ej aikuj tõmak bwe em̦ool an pãd* im bwe ej ri-kõjeraam̦m̦an ñan ro rej kanooj kappukote.
7 Kõn tõmak, ãlikin an kar Noa bõk naanin kakkõl jãn Anij kõn men ko rejjañin wal̦o̦k, ear kwal̦o̦k an mijak Anij im jek wa eo ñan lo̦mo̦o̦ren baam̦le eo an, im kõn an kar tõmak, ear liaakel̦o̦k lal̦ in, im ear jolõt wãnõk jãn wõt an kar tõmak.
8 Kõn tõmak, ke kar kũr Ebream, ear pokake im jibadekl̦o̦k jikin eo enaaj an jolõt, im ear ilo̦k meñe ear jaje ia eo ej etal ñane.
9 Kõn wõt an kar tõmak, ear mour ãinwõt juon ruwamãejet ilo ãneo kar kallim̦uri kake. Ear jokwe ilo em̦ nuknuk ko ippãn Aisak im Jekob, ro rar bareinwõt jolõt ejja kallim̦ur eo wõt ear bõke.
10 Bwe ear kõttaretok jikin eo pedped eo an em̦ool, im eo ear ãeiki im kalõke ej Anij.
11 Bareinwõt kõn tõmak, Sera ear maroñ bõro̦ro* meñe ear l̦e jãn iiõ in an maroñ nãje, kõnke ear watõke Eo ear kõm̦m̦ane kallim̦ur eo bwe etiljek.*
12 Kõn wõt men in, jãn juon em̦m̦aan eo im ear jab maroñ wõr nejin,* ear oktak im wõr nejin, joñan lõñier wõt iju ko ilañ im ãinwõt bok ko iparijet im jejjab maroñ bwini.
13 Kõn tõmak, er aolep rar tiljek ñan mej, im meñe rar jab lo an jejjet kũtien kallim̦ur ko, bõtab rar loi jãn ijo ettol̦o̦k im rar m̦õn̦õn̦õ kaki, im rar kaalikkar im̦aan mejãn armej bwe rejjab jãn ãneo im rej ruwamãejet ie.
14 Bwe ro rej kõnono ilo wãween in rej kaalikkar bwe rej kanooj pukot juon jikier make.
15 Im el̦aññe rar l̦õmn̦ak wõt kake jikin eo rar ilo̦k jãne, innem remaroñ kar lo ial̦an aer jepl̦aak ñane.
16 Ak kiiõ rej pukot juon jikin em̦m̦anl̦o̦k, mel̦el̦ein juon jikin ej an lañ. Kõn men in, Anij ejjab jook kõn er ñe rej ãñinñini bwe ej aer Anij, kõnke em̦õj an kõpooj juon jikin ñan er.
17 Kõn tõmak, ke kar mãlejjoñe Ebream, ear itõn katok kõn Aisak—em̦m̦aan in im ear m̦õn̦õn̦õ in bõk kallim̦ur ko, ear kajjioñ in katok kõn eo ej make wõt nejin—
18 meñe em̦õj kar ba ñane im ba: “Ro naaj n̦aetaer bwe rej nejũm̦* renaaj wal̦o̦ktok jãn Aisak.”
19 Bõtab ear jel̦ã bwe Anij emaroñ kõjerkake jãn mej, im ãindein kar karo̦o̦l nejin ñane jãn mej ãinwõt juon kein kõkkar.
20 Bareinwõt kõn tõmak, Aisak ear kõjeraam̦m̦an Jekob im Iso kõn men ko renaaj itok.
21 Kõn tõmak, ke ear epaaktok iien an Jekob mej, ear kõjeraam̦m̦an kajjojo iaan l̦õm̦aro nejin Josep im ear kabuñ ke ej dãpdep kõn jokon̦ eo an.
22 Kõn tõmak, ilo iien eo ej epaaktok jem̦l̦o̦kin mour eo an Josep, ear kõnnaan kõn an naaj ro nejin Israel diwõjl̦o̦k jãn Ijipt, im ear lel̦o̦k naanin jiroñ* kõn naaj di ko diin.*
23 Kõn tõmak, jemãn im jinen Moses rar n̦ooje ium̦win jilu allõñ ãlikin wõt an kar l̦otak, kõnke rar lo bwe ajri eo ekanooj in wũlio im rar jab mijak kakien eo an kiiñ eo.
24 Kõn tõmak, ke Moses ear rũtto, ear m̦akoko bwe ren ba bwe ej nejin kõrã eo nejin Pero,
25 im ear make kããlõt ñan an eñtaan ippãn armej ro an Anij ijello̦kun an m̦õn̦õn̦õ kõn jerawiwi, eo ej an jidik wõt iien,
26 kõnke ear watõk bwe an iioon matõrtõr kõn Christ el̦apl̦o̦k an aorõk jãn m̦weiuk ko raorõk ilo Ijipt, bwe ear kalimjekl̦o̦k wõt jinõkjeej eo naaj lel̦o̦k ñane.
27 Kõn tõmak, ear em̦m̦akũt jãn Ijipt, bõtab ejjab kõnke ear mijak an kiiñ eo illu, ak kõnke ear wõnm̦aanl̦o̦k wõt im kijenmej ãinwõt juon eo ear lo Eo ejjel̦o̦k juon emaroñ loe.
28 Kõn tõmak, ear kõm̦m̦ane Kwõjkwõjin Kijoone* eo im ear kabõtõktõk ioon kõjãm ko kõnke eo enaaj itok im ko̦kkure en jab m̦an* m̦aanje ro nejier.
29 Kõn tõmak, rar kijoone Lom̦al̦o Ekilmir im ãinwõt ñe rej etetal ioon ãne, ak ke ri-Ijipt ro rar kajjioñ in kijoone, dãn eo ear orañl̦o̦k er.
30 Kõn tõmak, wõrwõr in Jeriko ear rup ãlikin an kar armej ro kaapool̦e ium̦win jimjuon raan.
31 Kõn tõmak, Rehab, kõrã eo ekijoñ, ear jab mej ippãn ro rar jum̦ae kõnke ear jouj im kadel̦o̦ñe ri-iaroñroñ ro.
32 Im ta eo imaroñ bar ba? Ejabwe iien ñe inaaj wõnm̦aanl̦o̦k wõt im kwal̦o̦k kõn Gideon, Berak, Samson, Jepta, Devid, im bareinwõt Samuel im ri-kanaan ro jet.
33 Kõn tõmak, rar anjo̦ ioon aelõñ ko, kowõnm̦aanl̦o̦k wãnõk, bõk kallim̦ur ko, kiil lo̦ñiin l̦aiõn ko,
34 kabõjrak kajoorin kijeek, deor jãn mejãn jãje, kar kõkajoorl̦o̦k er jãn aer kar m̦õjn̦o̦, erom rũttarin̦ae ro reperan, im lukwarkware rũttarin̦ae ro rar nitbwili aelõñ eo aer.
35 Ewõr kõrã ro kar kõjerkakpejeik ro rejitõnbõro ippãer, bõtab ebar wõr jet kar kaeñtaan er kõnke rar m̦akoko in kõjekdo̦o̦n tõmak eo aer ñan bõk anemkwõj. Unin ej kõnke ren maroñ bõk jerkakpeje eo em̦m̦anl̦o̦k.
36 Im bar jet rar iioon mãlejjoñ ilo an kar armej ro kajjirere kake er im deñõt er, ilo m̦ool, ejjab men kein wõt ak rar bar lukwõj er kõn jeen im kalbuuj er.
37 Rar kade er ñan mej, rar mãlejjoñ er, rar jidpãne er ñan ruo m̦õttan, rar m̦an er kõn jãje, rar nuknuk kõn kilin jiip im koot, rar pãd ilo aikuj, ilo eñtaan, ear lukkuun nana an armej ro kõm̦m̦an ñan er,
38 im ear jab tõllo̦kũn lal̦ in armej rein. Rar itoitak im jokwe ilo ãne jem̦aden, ilo tol̦ ko im ro̦ñ ko ie, im ro̦ñ ko ilo bwidej.
39 Meñe rein aolep kar kwal̦o̦k ñan er bwe ebuñbũruon ippãer kõn wõt aer tõmak, bõtab rar jab maroñ bõk men eo kar kallim̦ur kake,
40 kõnke Anij ear loe l̦o̦k im̦aan men eo em̦m̦anl̦o̦k ñan kõj, bwe ren jab weeppãn m̦okta jãn kõj.
Footnotes
^ Ak “ej juon kein kam̦ool ewõr pedpedin.”
^ Ak “ro jim̦m̦aad.”
^ Lale “Jukjukun pãd” ilo Kõmel̦el̦e Ko.
^ Ak “kam̦ool bwe em̦õn̦õn̦õ.”
^ Ak “bwe emour.”
^ Kajin Grik, “kar lel̦o̦k maroñ eo ñan an bõro̦ro kõn juon ineen.”
^ Ak “ej juon eo emaroñ lõke.”
^ Kajin Grik, “jãn juon eo ear joñan wõt ro remej.”
^ Kajin Grik, “ineem̦.”
^ Ak “juon kien.”
^ Ak “kõn kallib eo an.”
^ Lale “Kwõjkwõjin Kijoone” ilo Kõmel̦el̦e Ko.
^ Kajin Grik, “uñũr.”
