Hibru 4:1-16
4 Innem, kõnke ej pãdwõt kallim̦ur eo ñan del̦o̦ñ ilo kakkije eo an, jen kanooj kõjparok* bwe jekkõl ñe juon iaami emaroñ likjab jãne.
2 Kar kwal̦o̦k ennaan eo em̦m̦an ñan kõj ãinwõt kar bar ñan er, bõtab rar jab bõk tokjãn jãn ennaan eo rar roñ kake, kõnke rar jab bõrokuk ilo tõmak ippãn ro rar roñjake.
3 Kõj eo jej jerbale tõmak eo ad jej del̦o̦ñ ilo kakkije eo an. Ak kõn er, eñin men eo ear ba: “Innem iar illu im kallim̦ur im ba, ‘Reban del̦o̦ñ ilo kakkije eo aõ,’” meñe ear dedel̦o̦k jerbal ko an jãn jinoin lal̦.*
4 Ewõr juon jikin ilo Jeje ko ear kõnono kake raan eo kein kajimjuon im ba: “Im Anij ear kakkije ilo raan eo kein kajimjuon jãn aolep jerbal ko an,”
5 im ilo ijin Ear bar ba: “Reban del̦o̦ñ ilo kakkije eo aõ.”
6 Ro kar kwal̦o̦k ennaan eo em̦m̦an ñan er m̦oktata rar jab del̦o̦ñ ilo kakkije eo kõnke rar jab pokake, bõtab ej wõr wõt an ro jet maroñ ñan del̦o̦ñ ie.
7 Eñin unin ear bar kõjenolo̦k juon raan ke ear ba ilo sam an Devid elõñ iien ko tokãlik im ba, “Rainin”; ãinwõt kar ba l̦o̦k im̦aan im ba, “Rainin el̦aññe kom̦ij roñjake ainikiõ, kom̦win jab kakijñeñeik bũruomi.”
8 El̦aññe Joshua ear tõl er ñan ijo renaaj kar kakkije ie, innem Anij eban kar kõnono tokãlik kõn bar juon raan.
9 Kõn men in, ej pãdwõt raanin kakkije eo ãinwõt kar raanin Jabõt* ñan armej ro an Anij.
10 Bwe juon eo ej del̦o̦ñ ilo kakkije eo an Anij ej bareinwõt kakkije jãn jerbal ko an, ãinwõt an kar Anij kakkije jãn jerbal ko an.
11 Kõn men in, jen kate kõj bwe jen del̦o̦ñ ilo kakkije in, kõnke en ejjel̦o̦k juon en maroñ l̦orak ilo ejja joñak eo wõt kõn jab pokake.
12 Naanin Anij emour im ekajoor, im ekkañl̦o̦k jãn jabdewõt jãje ruo mejãn, im ej wie ijo em̦wilal̦tata ñan kaalikkar armej eo itulowa* im itulik, im ej bukwe mo̦kwõj ko im n̦on̦n̦on̦meej im ej maroñ in kaalikkar l̦õmn̦ak ko im kõn̦aan ko an bõro.
13 Ejjel̦o̦k juon menin kõm̦anm̦an en̦ojak jãne, men otemjej rekeelwaan im relukkuun alikkar im̦aan mejãn eo jej aikuj uwaak ñane.
14 Kõnke ewõr juon ad bũrij l̦apl̦ap ekanooj utiej, eo ear deblo̦ke lañ ko, eo ej Jesus, Nejin Anij, innem jen wõnm̦aanl̦o̦k wõt im kwal̦o̦k kake tõmak eo ad kõn e.
15 Bũrij l̦apl̦ap in ad ejjab juon eo ejjel̦o̦k an mel̦el̦e kõn m̦õjn̦o̦ ko ad, bõtab ej juon eo ear iioon mãlejjoñ ilo jabdewõt wãween ãinwõt kõj, ijoke ejjab jerawiwi.
16 Kõn men in, jen kepaak tũroon eo an Anij, eo ej kwal̦o̦k jouj eo el̦ap, im kõnono ñane ilo peran bwe jen bõk tũriam̦o im jouj eo el̦ap ñan jipañ kõj ilo iien eo ejejjet.
Footnotes
^ Kajin Grik, “mijak.”
^ Ej jitõñl̦o̦k ñan tõre ko an ajri ro nejin Adam im Iv.
^ Lale “Jabõt” ilo Kõmel̦el̦e Ko.
^ Naan eo ilo kajin Grik ej pneu′ma. Lale “Pneu′ma” ilo Kõmel̦el̦e Ko.
