Hibru 6:1-20
6 Innem kiiõ ke em̦õj ad l̦e jãn katak ko jinoin kõn Christ, jen wõnm̦aanl̦o̦k wõt im kate kõj ñan ad rũttol̦o̦k ilo tõmak. Jen jab bar jino ejaake pedped eo em̦õj ad ejaake kadede ãinwõt ukel̦o̦k jãn jerbal ko remej im tõmak ilo Anij,
2 katak eo kõn peptaij, likũt peid ioon bar juon, jerkakpeje jãn mej, im ekajet eo ej ñan indeeo.
3 Jenaaj wõnm̦aanl̦o̦k wõt im kate kõj ñan rũttol̦o̦k ilo tõmak el̦aññe Anij ej kõtl̦o̦k.
4 Ikijjeen ro kar kameraml̦o̦k er im rar edjoñe menin letok eo ejjel̦o̦k on̦ããn jãn lañ im rar bõk jetõb kwõjarjar,*
5 im rar edjoñe naan eo em̦m̦an an Anij im kajoor ko an jukjukun pãd* eo ej itok
6 bõtab rar buñ jãn tõmak, epen ñan bar kõjepl̦aaktok er ñan aer ukel̦o̦k, kõnke er make rar bar dilaik Nejin Anij ilo jurõn al̦al̦ eo im kajooke ilo̦bwilej.
7 Ñe ej ikkutkut an wõt, bwidej eo ej bõk jeraam̦m̦an jãn Anij, im kõnke ej utdikdiki bwidej eo, ekõm̦m̦an an eddek keinikkan ko bwe ri-kallib ro ren amãni.
8 Ak ñe ej eddek kãlõklõk ko im mar ko jãne, rej kõjekdo̦o̦ne im ejjabto naaj kaliaiki, im ilo jem̦l̦o̦kin naaj tile.
9 Ak kõn kom̦, ro rejitõnbõro, meñe kõmij kõnono ilo wãween in, ak kõmij lukkuun tõmak bwe ewõr men ko rem̦m̦anl̦o̦k ñan kom̦, ko rej ekkejell̦o̦k ñan lo̦mo̦o̦r.
10 Anij ewãnõk im eban mel̦o̦kl̦o̦k jerbal ko ami, im yokwe eo kom̦ar kwal̦o̦k kõn etan ikijjeen ami kar jipañ ro rekkwõjarjar im an jab bõjrak ami jipañ er.
11 Kõm lukkuun kõn̦aan bwe kajjojo iaami en niknik wõt ãinwõt kar m̦okta, bwe kom̦win lukkuun tõmak ilo kõjatdikdik eo ñan jem̦l̦o̦kin,
12 kõnke kom̦win jab jowan, bõtab kom̦win kajjioñe ro rar jolõte kallim̦ur ko itok wõt jãn aer kar tõmak im kijenmej.
13 Ke Anij ear kõm̦m̦ane kallim̦ur eo an ñan Ebream, ear kallim̦ur ilo etan make kõnke ejjel̦o̦k bar juon eutiejl̦o̦k jãn E,
14 ilo an kar ba: “Inaaj kõjeraam̦m̦an eok im inaaj koorl̦o̦k ro ineem̦.”
15 Kõn men in, ãlikin an kar Ebream kijenmej wõt, ear bõk menin kallim̦ur eo.
16 Armej ekkã aer kõm̦m̦an kallim̦ur ilo etan juon eo eutiejl̦o̦k, im kallim̦ur ko aer ej men eo ej kõjem̦l̦o̦k jabdewõt poktak, unin ej kõnke eñin ej men eo ej kapene naan ko aer.
17 Ilo ejja wãween in wõt, ke Anij ear pepe in kaalikkarl̦o̦k wõt ñan ro renaaj jolõt kallim̦ur eo bwe eban oktak karõk* eo an, ear kapene* ilo an kwal̦o̦k juon kallim̦ur.
18 Men kein ruo reban oktak, kõnke Anij eban riab. Ear kõm̦m̦ane men kein ñan kõkajoorl̦o̦k kõj, kõj ro jaar koonel̦o̦k Anij, bwe jen dãpij wõt kõjatdikdik eo em̦õj likũt im̦aad.
19 Kõjatdikdik in ewõr ippãd ej ãinwõt juon añkõ ñan mour ko ad bwe jen pen wõt im tõmak, im kõjatdikdik in ej bõkl̦o̦k kõj ñan ilowaan katiiñ eo,
20 ijo Jesus ear del̦o̦ñ ie m̦oktata kõn kõj, eo im ear erom bũrij l̦apl̦ap ãinwõt kar Melkizedek im enaaj bũrij ñan indeeo.
Footnotes
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Lale “Jukjukun pãd” ilo Kõmel̦el̦e Ko.
^ Ak “pepe.”
^ Ak “kam̦oole.”
