Hibru 9:1-28
9 Ilo bujen eo m̦okta, ekõn wõr kakien ko kõn jerbal eo eokkwõjarjar im kõn jikin eo eokkwõjarjar ijin ioon lal̦.
2 Ilo ruum̦ eo kein kajuon kar kõm̦m̦ane ilo im̦õn kõppãd eo, eñin ijo ear pãd jurõn l̦aam̦ eo kab tebõl̦ eo im bũreet in ajel̦o̦k* ko, im kar n̦aetan ijin, Jikin Kwõjarjar.
3 Bõtab itulikin katiiñ eo kein karuo, eñin ruum̦ eo kar n̦aetan, Jikin Kwõjarjar Otem Kwõjarjar.
4 Ilowaan ijin ear pãd juon kein kaijurjur kõm̦m̦an jãn gold ekoba tõptõp in bujen eo kar kõm̦m̦ane aolepen itulikin jãn gold. Im ilowaan tõptõp in ear pãd juon jãpe gold ewõr manna ilowaan, jokon̦ eo an Aron me ear jul̦ wũt ioon, im dekã ko kar jei kien ko an Anij ioer,*
5 im ioon tõptõp in, ewõr kerub ko rekanooj in aiboojoj rej kallore penjãn tõptõp eo.* Bõtab ilo iien in, ejjab iien ñan kõnono kõn tipdikin men kein.
6 Ãlikin aer kalõk men kein ilo wãween in, bũrij ro rej del̦o̦ñ ilo ruum̦ eo kein kajuon kajjojo raan bwe ren kõm̦m̦ani jerbal ko rekkwõjarjar;
7 bõtab bũrij l̦apl̦ap eo, e wõt ej del̦o̦ñe ruum̦ eo kein karuo juon alen ilo juon iiõ, im ej aikuj wõr bõtõktõk ippãn bwe en ajel̦o̦k kõn jerawiwi ko an make im jerawiwi ko an armej ro rej kõm̦m̦an bõd ilo aer jaje kake.
8 Innem jetõb kwõjarjar* ej kaalikkar ikijjeen karõk in bwe ial̦ eo ñan jikin eo eokkwõjarjar ejjañin kar wal̦o̦k ke im̦õn kõppãd in kein kajuon ear jutak.
9 Im̦õn kõppãd in ej kõkkar kõn men ko rej wal̦o̦k ilo tõre in kiiõ, im ekkar ñan karõk in, kar ajel̦o̦k menin lel̦o̦k im menin katok ko. Bõtab men kein rar jab maroñ kõm̦m̦an an weeppãn bõklõkõt eo an juon eo ej lel̦o̦k an menin katok.*
10 Men kein rej ekkejell̦o̦k wõt ñan m̦õñã im dãn im m̦antin karreo.* Im kakien kein kõn ãnbwin rar jerbal m̦ae iien ejejjet iien eo ñan kajim̦we men otemjej.
11 Ke Christ ear itok ãinwõt juon bũrij l̦apl̦ap ñan men ko rem̦m̦an im em̦õj aer bõk jikier, ear deblo̦ke im̦õn kõppãd eo el̦apl̦o̦k im weeppãnl̦o̦k im ejjab kõm̦m̦anin pein armej, mel̦el̦ein, ejjab jãn menin kõm̦anm̦an ko ijin ioon lal̦.
12 Ear del̦o̦ñ ilowaan jikin eo eokkwõjarjar im ear jab del̦o̦ñ kõn bõtõktõkin koot im bõtõktõkin koon in kau, bõtab ear del̦o̦ñ kõn bõtõktõkin make juon wõt alen, im ear bõktok lo̦mo̦o̦r eo ej ñan indeeo ñan kõj.
13 El̦aññe bõtõktõkin koot ko im kau kom̦aan ko im aer jol̦o̦k melkwaararin kau kokõrã ko* ioon ro rettoon rej kokkwõjarjar er bwe en erreo ãnbwinnier,
14 innem bõtõktõkin Christ el̦apl̦o̦k an maroñ kõm̦m̦ane men in, eo im ear ajel̦o̦k e make ãinwõt juon menin katok eo ejjel̦o̦k lippijinjin ie ñan Anij ikijjeen jetõb kwõjarjar* eo ej indeeo. Bõtõktõkin ej karreoik bõklõkõt ko ad jãn jerbal ko remej bwe jen maroñ kõm̦m̦ani jerbal ko rekkwõjarjar ñan Anij eo emour.
15 Eñin unin ej juon ri-kõllaajrak ñan bujen eo ekããl, kõnke ro em̦õj kũr er ren maroñ bõk kallim̦ur eo kõn ãjinkõj eo ej ñan indeeo. Men kein rar maroñ jejjet kõn wõt mej eo an eo ear kõl̦l̦ã on̦ããn aer rõl̦o̦k jãn jerawiwi ke rar pãd ium̦win bujen eo kar m̦okta.
16 El̦aññe ewõr bujen, innem armej eo ej kõm̦m̦ane bujen eo ej aikuj mej,
17 kõnke mej ej kapene juon bujen, unin ej kõnke eban jino jerbal juon bujen el̦aññe eo ej kõm̦m̦ane ej mour wõt.
18 Ejja ãindeinl̦o̦k wõt, bujen eo m̦okta eban kar jerbal* el̦aññe ear jab kõn bõtõktõk.
19 Bwe ke Moses ear kõnono kõn aolep kakien ko ilo Kien eo ñan aolep armej ro, ear bõk bõtõktõkin koon in kau ko im bõtõktõkin koot ko, ekoba dãn, juon m̦õttan bũrõrõ kõm̦m̦an jãn kool̦an jiip, im juon ra,* im ear kabbũtũktũk bok eo * im aolep armej ro,
20 im ear ba: “Bõtõktõk in ej kapene bujen eo Anij ear kakien kom̦ bwe kom̦win pokake.”
21 Ãindein ear bar kabbũtũktũk kõn bõtõktõk im̦õn kõppãd eo im aolep jãpe ko rej kõjerbali ñan jerbal ko rekkwõjarjar.
22 Aet, ekkar ñan Kien eo, enañin aolep men rar erreo kõn bõtõktõk, im ejjel̦o̦k jeorl̦o̦k jerawiwi el̦aññe ejjel̦o̦k bõtõktõk ej to̦o̦rl̦o̦k.
23 Kõn men in, emenin aikuj bwe men ko rej pijaikl̦o̦k men ko ilañ ren erreo ikijjeen men kein. Ak kõn men ko ilañ, emenin aikuj bwe ren erreo kõn menin katok ko rem̦m̦anl̦o̦k.
24 Christ ear jab del̦o̦ñ ilo jikin eo eokkwõjarjar kõm̦m̦anin pein armej, eo ear annañel̦o̦k lukkuun jikin eo eokkwõjarjar. Bõtab ear del̦o̦ñ ilañ bwe en kiiõ jãde im̦aan* Anij kõn kõj.
25 Ear jab kõm̦m̦ane men in bwe en lel̦o̦k e make elõñ alen, ãinwõt an kõn bũrij l̦apl̦ap eo del̦o̦ñe jikin eo eokkwõjarjar aolep iiõ kõn bõtõktõk eo ejjab an.
26 Bwe el̦aññe ear ãindein, innem enaaj kar lõñ alen an eñtaan jãn jinoin lal̦.* Bõtab juon wõt alen an kar itok ilo jem̦l̦o̦kin jukjukun pãd* in. Ear kõm̦m̦ane men in bwe en jol̦o̦k jerawiwi ko ikijjeen an kar katok kõn e make.
27 Ãinwõt an aolep armej mej juon wõt alen, im tokãlik bõk ekajet,
28 ãindein an kar bar Christ lel̦o̦k e make juon wõt alen kõn jerawiwi ko an elõñ armej. Innem ilo iien eo kein karuo enaaj itok, eban itok ñan jol̦o̦k jerawiwi,* im ro rej kanooj in kappukot e ñan aer bõk lo̦mo̦o̦r, renaaj lo e.
Footnotes
^ Lale “Bũreet in ajel̦o̦k” ilo Kõmel̦el̦e Ko.
^ Kajin Grik, “dekã in bujen.”
^ Ak “jikin bõk jeorl̦o̦k bõd eo.”
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Ak “ej kõm̦m̦ane jerbal eo eokkwõjarjar.”
^ M̦antin karreo ekkar ñan Kien Moses. Kajin Grik, “peptaij ko.”
^ Ak “kau kokõrã ko em̦m̦an dettaer im ejjañin wõr nejier.”
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Kajin Grik, “ejaak.”
^ Kajin Grik, “hyssop.” Juon kain menin eddek. Lale “Hyssop” ilo Kõmel̦el̦e Ko.
^ Ak “bok lemlem eo.”
^ Kajin Grik, “im̦aan mejãn.”
^ Ej jitõñl̦o̦k ñan tõre ko an ajri ro nejin Adam im Iv.
^ Lale “Jukjukun pãd” ilo Kõmel̦el̦e Ko.
^ Ak “kõm̦adm̦õde apañ eo kõn jerawiwi.”
