Jemes 1:1-27
1 Jãn Jemes, ri-karejeran Anij im Irooj Jesus Christ, ñan bwij ko 12 rejjeplõklõk ilo jikin ko otemjej:
Yokwe kom̦!
2 Ro jeiũ im jatũ, kom̦win watõk bwe ej juon menin ami lukkuun lañlõñ ñe kom̦ij iioon elõñ kain apañ,
3 bwe kom̦ jel̦ã bwe ñe tõmak eo ami ej iioon mãlejjoñ ko, ej wal̦o̦k kijenmej.
4 Bõtab kõtl̦o̦k bwe kijenmej en kadedel̦o̦k an jerbal ilo kom̦, kõnke kom̦win maroñ iio im weeppãn ilo aolep wãween im en ejjel̦o̦k jabdewõt men kom̦ij likjab ie.
5 Kõn men in, el̦aññe jabdewõt iaami ejabwe mãlõtlõt ippãn, en jab bõjrak an kajjitõk kake ippãn Anij im enaaj lel̦o̦k ñane, kõnke el̦ap an m̦õn̦õn̦õ in lel̦o̦k ñan aolep armej im ejjab kajook* er.
6 Ijoke en wõnm̦aanl̦o̦k wõt im kajjitõk ilo an tõmak, im en jab pere ñan jidik, bwe eo ej pere ej ãinwõt n̦o ko ilo̦meto kõto ko rej uukto uuktak.
7 Ilo m̦ool, armej in en jab kõtmãne bwe enaaj bõk jabdewõt jãn Jeova.*
8 Armej in ej juon eo eruo an l̦õmn̦ak, im aolep iien ej oktak ial̦ ko an.
9 Bõtab rũttõmak eo ettã, en lañlõñ* bwe em̦õj kautieje,
10 im eo em̦weiie en lañlõñ bwe em̦õj kõttãiki, kõnke ãinwõt wũt ko ilo mel̦aaj, juon ri-m̦weiie enaaj etal ñan an jako.
11 Bwe ãinwõt an al̦ tak im kajoor an det im ekõm̦m̦an an menin eddek ko aemedl̦o̦k, im ãinwõt an wũt ko leer wõtlo̦k im ejako aiboojojier, ãindein bareinwõt juon eo em̦weiie, lukwõl̦pãn an poub kõn kõttõpar ko an ak enaaj jako.
12 Em̦õn̦õn̦õ armej eo ej kijenmej wõt ilo mãlejjoñ ko, kõnke ñe Anij enaaj buñbũruon ippãn, enaaj bõk pãlpel* in mour eo Jeova* ear kallim̦ur kake ñan ro ejjab bõjrak aer yokwe E.
13 Ñe juon ej iioon mãlejjoñ en jab ba: “Anij ej mãlejjoñe eõ.” Unin ej kõnke men ko renana rejjab mãlejjoñe Anij, bareinwõt ejjab mãlejjoñe jabdewõt.
14 Bõtab kajjojo armej ej iioon mãlejjoñ ko itok wõt jãn an kõn̦aan ko an make kaale im kapoe.*
15 Innem ñe kõn̦aan eo etta, ej keotak jerawiwi, im ñe jerawiwi eo ej jerbal, ej bõktok mej.
16 Ro jeiũ im jatũ, kom̦win jab m̦on̦e kom̦ make.*
17 Aolep menin letok ko rem̦m̦an im reweeppãn rej jãn lañ, rej wanlal̦tak jãn Jemãn meram ko ilañ, eo im ejjab oktak ãinwõt an annañ ko okkõtaktak ñe ej meram.
18 Ear ankilaan bwe en kõm̦m̦an bwe jen mour ikijjeen naan eo em̦ool, kõnke jen maroñ oktak im ro rej m̦oktata iaan* ro ear kõm̦anm̦an er.
19 Ro jeiũ im jatũ rejitõnbõro, kom̦win jel̦ã men in: Aolep armej rej aikuj m̦õkaj aer roñjake, rum̦wij aer kõnono, im rum̦wij aer illu,
20 bwe ñe juon ej illu ejjab wal̦o̦k wãnõk eo an Anij.
21 Kõn men in, kom̦win jol̦o̦k aolep m̦anit ko rekajjõjõ ekoba nana otemjej* jãn ippemi, im ilo ineem̦m̦an, kom̦win bõk naan eo kar kalibwini ilo kom̦, eo ewõr an maroñ ñan lo̦mo̦o̦ren kom̦.
22 Ijoke kom̦win ro rej jerbale naan eo im jab ri-roñjake wõt, kom̦win jab m̦on̦e kom̦ make kõn l̦õmn̦ak ko rebõd.
23 El̦aññe juon ej ri-roñjake wõt naan eo im ejjab juon eo ej jerbale, armej in ej ãinwõt juon eo ej kalimjeke mejãn ilo juon kilaaj.
24 Ej kalimjek e make im ilo̦k, im em̦õkaj an mel̦o̦kl̦o̦k kain armej rot e.
25 Bõtab juon eo ej lukkuun lale kien eo eweeppãn me ej bõktok anemkwõj im ejjab bõjrak an jerbale, ejjab juon ri-roñjake eo ej mel̦o̦kl̦o̦k, bõtab ej oktak im juon eo ej jerbale, im enaaj m̦õn̦õn̦õ ilo men ko ej kõm̦m̦ani.
26 El̦aññe jabdewõt ej l̦õmn̦ak bwe ej juon eo ej kabuñ ñan Anij,* bõtab ejjab dãpij* loon, ej m̦on̦e bũruon make im an kabuñ ej juon men ejjel̦o̦k tokjãn.
27 Kilen kabuñ ilo wãween eo erreo* im ejjab ettoon im̦aan mejãn Anij, eo ej Jemãd, ej eñin: bwe juon en lale ro ratajinemjen im kõrã ro emej ro pãleer ñe rej iioon eñtaan, im bwe juon en kõjparok e make jãn lippijinjin in lal̦ in.
Footnotes
^ Ak “n̦otaik.”
^ Lale “Jeova” ilo Kõmel̦el̦e Ko.
^ Kajin Grik, “kõmjãje.”
^ Kajin Grik, “kũrawũn.”
^ Lale “Jeova” ilo Kõmel̦el̦e Ko.
^ Ak “ko̦jeke.”
^ Ak emaroñ, “Kom̦win jab kõtl̦o̦k an ro jet m̦on̦e kom̦.”
^ Kajin Grik, “jom̦õkaj in”
^ Ak emaroñ, “nana ko rellõñ.”
^ Ak “bwe ewõr an tõmak.”
^ Ak “lukwõj.”
^ Ak “Kabuñ eo erreo.”
