Jemes 2:1-26
2 Ro jeiũ im jatũ, kom̦ij ke dãpij ami tõmak ilo Irooj eo ad eaiboojoj, Jesus Christ, im ilo ejja iien eo wõt kom̦ij kwal̦o̦k kalijekl̦o̦k?
2 El̦aññe juon em̦m̦aan ewõr riiñ gold addiin pein im nuknuk ko an rekanooj em̦m̦an ej del̦o̦ñ waj ñan juon ami kweilo̦k, im ej bar del̦o̦ñ waj juon em̦m̦aan ejeram̦õl im ettoonon nuknuk ko an,
3 kom̦ij ke m̦õn̦õn̦õl̦o̦k ippãn eo em̦m̦an nuknuk ko an im ba, “Kwõn jijet ijiiõ em̦m̦an,” im kom̦ij ke ba l̦o̦k ñan eo ejeram̦õl im ba, “Kwõn jutak wõt” ak “Kwõn jijet iturin men e eran neõ”?
4 El̦aññe aet, ejim̦we ke bwe kom̦ij kõm̦m̦an bwe jet ren utiejl̦o̦k jãn ro jet, im kom̦ij oktak im ãinwõt ri-ekajet ro rej kõm̦m̦ani pepe ko renana?
5 Ro jeiũ im jatũ rejitõnbõro, kom̦win roñjake. Anij ear jab kããlõt ke bwe ro rejeram̦õl im̦aan mejãn armej en er eo rej m̦weiie ilo tõmak im bwe ren jolõt Aelõñ eo,* eo ear kallim̦ur kake ñan ro rej yokwe e?
6 Bõtab em̦õj ami iwõj im kajejtokjãn ro rejeram̦õl. Ejjab ke bwe ro rem̦weiie ej er eo rej kaeñtaan kom̦ im liaakel̦o̦k kom̦ ñan jikin ekajet?
7 Rejjab ke kattoone ãt eo ekanooj em̦m̦an kom̦ij jutak kake?
8 Im kiiõ, el̦aññe kom̦ij l̦oor kien eo eutiej bõtata* ilo eoon eo ej ba, “Kwõn yokwe ri-turum̦* ãinwõt am̦ yokwe eok make,” innem elukkuun em̦m̦an.
9 Ijoke, el̦aññe kom̦ij wõnm̦aanl̦o̦k wõt im kwal̦o̦k kalijekl̦o̦k, kom̦ij jerawiwi, im kien eo ej liaakel̦o̦k kom̦* ãinwõt ro rej rupe kien.
10 Bwe el̦aññe jabdewõt ej pokake aolepen Kien eo bõtab ej rupe juon iaan kakien ko ie, innem enaaj oktak im ãinwõt juon eo ej jum̦aik aolepeer.
11 Kõnke eo ear ba, “Kwõn jab lejãn,”* ear bareinwõt ba, “Kwõn jab uror.” Kiiõ el̦aññe kwõjjab lejãn bõtab kwõj uror, innem kwõj rupe kien.
12 Kom̦win wõnm̦aanl̦o̦k wõt im kõnono im mour ãinwõt ro naaj ekajet er ikijjeen kien eo an ro ranemkwõj.*
13 Eo ejjab kwal̦o̦k tũriam̦o naaj ekajete ilo ejjel̦o̦k tũriam̦o. Kõn men in, tũriam̦o ekajoorl̦o̦k jãn* ekajet.
14 Ro jeiũ im jatũ, ewõr ke tokjãn el̦aññe juon ej ba bwe ewõr an tõmak ak ejjab jerbale? Tõmak rot in emaroñ ke lo̦mo̦o̦rene?
15 El̦aññe ewõr ro jeid im jatid m̦aan ak kõrã ejabwe ballier* im ejabwe kijeer m̦õñã ilo juon raan,
16 im juon iaami ej ba ñan er, “Kom̦win ilo̦k ilo aenõm̦m̦an, kom̦win mããn̦ãn̦ im mat,” ak ejjab lel̦o̦k men eo rej aikuji ñan ãnbwinnier, ewõr ke tokjãn an ba men kein?
17 Ãindein tõmak, el̦aññe ejjel̦o̦k jerbal ippãn, innem emej.
18 Ijoke juon enaaj ba: “Ewõr am̦ tõmak ak ewõr aõ jerbal. Kwõn kwal̦o̦k ñan ña tõmak eo am̦ kwõjjab jerbale, im inaaj kwal̦o̦k ñan eok tõmak e aõ ikijjeen jerbal ko aõ.”
19 Ejim̦we ke bwe kwõj tõmak bwe ewõr juon wõt Anij? Ekanooj in em̦m̦an. Ilo m̦ool, jetõb ko rettoon* rej bareinwõt tõmak im wũdiddid.
20 Bõtab ñan kwe eo ejjel̦o̦k jel̦ã ippãn, kwõjjab jel̦ã ke bwe el̦aññe ejjel̦o̦k jerbal ippãn tõmak, ejjel̦o̦k tokjãn?
21 Ejjab ke bwe kar kõwãnõk jemãd Ebream ikijjeen jerbal ko an ãlikin an kar likũt Aisak, l̦eo nejin, ioon lokatok eo bwe en itõn katok kake?
22 Kwõj lo ke, tõmak eo an ear alikkar ilo jerbal ko an, im ear weeppãn tõmak eo an kõn jerbal ko an,
23 im ear jejjet kũtien eoon eo ear ba: “Ebream ear likũt an tõmak ilo Jeova,* im kar kõwãnõke,” innem kar n̦aetan jeran Jeova.*
24 Kom̦ij lo ke, naaj kõwãnõke juon armej ikijjeen jerbal ko an im ejjab ikijjeen an tõmak wõt.
25 Ãindein kar Rehab, kõrã eo ekijoñ, ejjab ke bwe kar bareinwõt kõwãnõke kõn jerbal ko an ke ear karwaineneik ri-iaroñroñ ro im jilkinl̦o̦k er ilo bar juon ial̦?
26 Aet, el̦aññe ejako kajoorin mour* eo jãn ãnbwin eo, emej. Ãindein bareinwõt tõmak, el̦aññe ejjel̦o̦k jerbal ippãn, emej.
Footnotes
^ Ak “Kien eo.” Lale “Aelõñ eo an Anij” ilo Kõmel̦el̦e Ko.
^ Ak “kien eo an Kiiñ eo.”
^ Ilo kajin Grik, naan eo “ri-turum̦” emaroñ jitõñl̦o̦k ñan jabdewõt armej.
^ Ak “n̦aruomi.”
^ Lejãn ej ñe juon eo em̦õj an m̦are ej babu ak pãd ippãn juon eo ejjab pãleen.
^ Kajin Grik, “kien anemkwõj.”
^ Kajin Grik, “ej anjo̦ ioon.”
^ Kajin Grik, “rekeelwaan.”
^ Naan eo ilo kajin Grik ej dai·mo′ni·on, ej jitõñl̦o̦k ñan enjel̦ ro renana.
^ Lale “Jeova” ilo Kõmel̦el̦e Ko.
^ Lale “Jeova” ilo Kõmel̦el̦e Ko.
^ Naan eo ilo kajin Grik ej pneu′ma. Lale “Pneu′ma” ilo Kõmel̦el̦e Ko.
