Jemes 3:1-18
3 Ro jeiũ im jatũ, ejjab aikuj in lõñ iaami rej ri-katakin bwe jejel̦ã bwe enaaj eddol̦o̦k* ad bõk ekajet.
2 Elõñ alen kõj aolep jej kõm̦m̦an bõd.* El̦aññe juon ejjab bõd ilo naan, armej in eweeppãn, im ej maroñ irooj ioon* aolepen ãnbwinnin.
3 El̦aññe jej lukwõj lo̦ñiin kidia ko ñan kõm̦m̦an bwe ren pokake kõj, innem jenaaj bareinwõt kõjbwebweik aolepen ãnbwinnier.
4 Bareinwõt l̦õmn̦ak kõn waan ejjerakrõk ko rel̦l̦ap: Meñe rekkillep im rej jerakrõk kõn kõto ko rel̦l̦ap, bõtab rej etal ñan jabdewõt jikin eo armej eo ej pãd ilo jila eo ej kõjbwebweiki kõn jebwe eo edik ikapin wa eo.
5 Ãindein bareinwõt lo, ej juon m̦õttan elukkuun dik ilo ãnbwin ak emaroñ l̦ap an kõmjãje. Em̦ool bwe meñe juon kijeek edik ak emaroñ tile juon bukun wõjke!
6 Lo ej bareinwõt juon kijeek. Iaan aolep m̦õttan ko ilo ãnbwin, lo eobrak kõn aolep men ko rejjab wãnõk, ej kattoon aolepen ãnbwin eo im ej kõm̦m̦an bwe aolepen mour eo an juon armej en bwil kõn kijeek, eo ej itok jãn Kena.*
7 Aolep kain menninmour ko rawiia im bao ko im menninmour ko rej tõbalbal im menninmour ko ilo̦jet, remaroñ awiie im em̦õj an armej kaawiieiki er.
8 Ak kõn lo, ejjel̦o̦k armej emaroñ kaawiieiki. Epen ñan bõbraiki, ej kõm̦m̦an jorrããn im eobrak kõn baijin.
9 Jej kõjerbale ñan nõbar Jemãd Jeova,* ijoke jej bar kõjerbale ñan ko̦o̦le armej, ro kar kõm̦anm̦an er ilo “nemãmeen wõt Anij.”
10 Jãn juon lo̦ñi, emaroñ wal̦o̦k naanin kõjeraam̦m̦an ko im bareinwõt naanin ko̦o̦le ko.
Ro jeiũ im jatũ, ejjab jim̦we an men rot kein wal̦o̦k ilo wãween in.
11 Dãn aebõjbõj* im dãn jo̦o̦l̦* remaroñ ke to̦o̦rtok jãn juon wõt unin dãn?
12 Ro jeiũ im jatũ, juon wõjke fig emaroñ ke kalle olive, ak wõjke kũreep emaroñ ke kalle fig?* Ãindein dãn jo̦o̦l̦ ejjab maroñ kõm̦m̦an dãn aebõjbõj.
13 Wõn iaami emãlõtlõt im emel̦el̦e? En kwal̦o̦ke ikijjeen kõm̦m̦an ko an rem̦m̦an bwe ej kõm̦m̦ani jerbal ko an ilo ineem̦m̦an, eo ej itok jãn mãlõtlõt.
14 Bõtab el̦aññe elukkuun l̦ap ebbanban im jitũbõn iakwããlãl* ilo bũruomi, kom̦win jab kõmjãje im riab n̦ae m̦ool eo.
15 Men in ejjab mãlõtlõt eo jãn lañ, ak ej mãlõtlõt eo an lal̦ in, an menninmour ko,* im an jetõb ko rettoon.*
16 Bwe jabdewõt ijo ewõr iakwããlãl* im ebbanban ie, enaaj bareinwõt wal̦o̦k pok im aolep men ko renana.
17 Bõtab mãlõtlõt eo jãn lañ ej m̦oktata erreo, innem eaenõm̦m̦an, ejouj,* epojak in pokake, eobrak kõn tũriam̦o im kõm̦m̦an ko rem̦m̦an, ejjab kalijekl̦o̦k, im ejjab etao.
18 Bareinwõt, wãnõk ej jebar leen ñe kar kalibwini ineen ilo ijo ewõr aenõm̦m̦an ie, im ej ñan* ro rej kõm̦m̦an aenõm̦m̦an.
Footnotes
^ Ak “l̦apl̦o̦k.”
^ Kajin Grik, “tũbbo̦k.”
^ Ak “lukwõj.”
^ Lale “Kena” ilo Kõmel̦el̦e Ko.
^ Lale “Jeova” ilo Kõmel̦el̦e Ko.
^ Kajin Grik, “tõñal.”
^ Kajin Grik, “meo̦.”
^ Etan juon kain leen wõjke.
^ Ak emaroñ, “ewõr l̦õmn̦ak eo ñan katõprak wõt kõn̦aan ko ami make.”
^ Ak “kanniõk.”
^ Naan eo ilo kajin Grik ej dai·mo·ni·o′des, ej jitõñl̦o̦k ñan enjel̦ ro renana.
^ Ak emaroñ, “ewõr l̦õmn̦ak eo ñan katõprak wõt kõn̦aan ko ami make.”
^ Ak “ejel̦ã kõttãiki.”
^ Ak emaroñ, “jãn.”
