Jemes 4:1-17
4 Ta n̦e ej wũnjãn poktak im akwããl kan̦e rej wal̦o̦k ibwiljimi? Rejjab ke wal̦o̦ktok jãn kõn̦aan kan̦e ami ilo kanniõk, ko rej wõnm̦aanl̦o̦k wõt im tarin̦ae ilo kom̦?*
2 Ewõr men ko kom̦ kõn̦aan bõtab ejjel̦o̦k ippemi. Kom̦ij wõnm̦aanl̦o̦k wõt im uror im an̦okn̦ak, ijoke kom̦ij jab maroñ bõk jabdewõt, im kom̦ij wõnm̦aanl̦o̦k wõt im kõm̦m̦an poktak im akwããl. Ejjel̦o̦k men ko ippemi kõnke kom̦ij jab kajjitõk.
3 Ak ñe kom̦ij kajjitõk, ejjab lewaj ñan kom̦ bwe kom̦ij kajjitõk kõn un ko rejjab jim̦we, kõnke kom̦win maroñ kõjerbali ñan katõprak kõn̦aan ko ami ilo kanniõk.
4 Kom̦ ri-lejãn,** kom̦ij jab jel̦ã ke bwe eo ej jem̦jerãik lal̦ in ej kõjdate Anij? Kõn men in, jabdewõt eo ekõn̦aan jem̦jerãik lal̦ in ej make kõm̦m̦an bwe en ri-kõjdat an Anij.
5 Ak kom̦ij l̦õmn̦ak ke bwe ejjel̦o̦k unin an eoon eo ba: “Jitũbõn ebbanban, eo ej pãd ilo kõj, ejjab bõjrak an lukkuun kõn̦aan elõñ men”?
6 Meñe ãindein ak jouj eo el̦ap Ej letoke ekajoorl̦o̦k. Eñin unin jeje ko rej ba: “Anij ejjab m̦õn̦õn̦õ ippãn ro eutiej bũrueer, bõtab ej lel̦o̦k jouj eo el̦ap ñan ro ettã bũrueer.”
7 Kõn men in, kom̦win kõttãik kom̦ ñan Anij; bõtab kom̦win jum̦ae Tepil̦ im enaaj ko jãn kom̦.
8 Kom̦win kõm̦m̦an bwe kom̦win epaake Anij, im enaaj epaake waj kom̦. Karreoik peimi, kom̦ rijjerawiwi, im kokkwõjarjar bũruomi, kom̦ eo eruo ami l̦õmn̦ak.
9 Kom̦win bũrom̦õj, jañ, im liaajlo̦l̦. Kom̦win kõtl̦o̦k bwe ami ettõñ en oktak ñan jañ, im ami lañlõñ ñan lukkuun bũrom̦õj.
10 Kom̦win kõttãik kom̦ im̦aan mejãn Jeova,* im enaaj kautiej kom̦.
11 Ro jeiũ im jatũ, en bõjrak ami kõnono n̦ae doon. Jabdewõt eo ej kõnono n̦ae jein im jatin ak ej ekajete jein im jatin, ej kõnono n̦ae kien im ej ekajete kien. Kiiõ el̦aññe kwõj ekajete kien, kwõjjab juon eo ej l̦oore kien bõtab kwõj juon ri-ekajet.
12 Ewõr juon wõt ri-Letok Kien im ri-Ekajet, eo im ewõr an maroñ ñan lo̦mo̦o̦ren im ko̦kkure. Ak kwe, wõn kwe bwe kwõn ekajete ri-turum̦?
13 Kom̦win roñjake, kom̦ eo kom̦ij ba: “Rainin ak ilju kõm naaj ilo̦k ñan jikin en̦ im jol̦o̦k juon iiõ ie, im kõm naaj peejnej im koorl̦o̦k jããn,”
14 bõtab kom̦ij jab jel̦ã ewi wãween naaj mour eo ami ilju. Kom̦ij ãinwõt tab in kõdo̦ eo ej wal̦o̦k jidik wõt iien innem ejakol̦o̦k.
15 Ijoke, en kar men eo kom̦ij ba in: “Ñe ej ankilaan Jeova,* kõm naaj mour im kõm̦m̦ane men in ak men uweo.”
16 Ak kiiõ eutiej bũruomi ilo ami kõmjãje kõn kom̦ make. Aolep kain kõmjãje rot in enana.
17 Kõn men in, el̦aññe juon ejel̦ã bwe en kõm̦m̦ane men eo ejim̦we, bõtab ejjab kõm̦m̦ane, men in ej juon jerawiwi.
Footnotes
^ Ak “m̦õttan ko ilo ãnbwinnimi.”
^ Ak “Kom̦ ro rejjab tiljek.”
^ Lejãn ej ñe juon eo em̦õj an m̦are ej babu ak pãd ippãn juon eo ejjab pãleen.
^ Lale “Jeova” ilo Kõmel̦el̦e Ko.
^ Lale “Jeova” ilo Kõmel̦el̦e Ko.
