Jemes 5:1-20
5 Kom̦win roñjake, kom̦ ro rem̦weiie, kom̦win jañ im lim̦õ kõn eñtaan ko renaaj itok ioomi.
2 M̦weiuk ko m̦weiemi em̦õj aer kõt, im nuknuk ko ami em̦õj an dile* ko̦kkuri.
3 Gold im jelba ko ami em̦õj aer lukkuun l̦õjo, im aer l̦õjo enaaj juon kein kam̦ool n̦ae kom̦ im enaaj ko̦kkure kanniõkimi. Men ko kom̦ar koorl̦o̦k im kakon̦i renaaj ãinwõt juon kijeek ilo raan ko ãliktata.
4 Kom̦win roñjake! Ri-jerbal ro rar m̦adm̦õde jikin kallib ko ami rej wõnm̦aanl̦o̦k wõt im jañ kõnke kom̦ar jab kõl̦l̦ã on̦ãer, im Jeova,* ri-tõl eo an jarin tarin̦ae eo ilañ, ear roñ an ri-m̦adm̦õd ro ikkũr im kajjitõk jipañ.
5 Kom̦ar kõm̦m̦an bwe en em̦m̦an kõjeiiemi kõn ami m̦weiie im kom̦ar katõprak kõn̦aan ko ami ioon lal̦. Kom̦ij ãinwõt menninmour ko rej m̦õñã im kilepl̦o̦k m̦ae raan eo rej m̦an er.
6 Kom̦ar liaakel̦o̦k im m̦an ñan mej ro rewãnõk. Eñin unin ej jum̦ae kom̦, ejjab ke?
7 Ro jeiũ im jatũ, kom̦win kijenmej m̦ae iien Irooj enaaj pãd. Kom̦win roñjake! Ri-kallib eo ej kõttar wõt an bwidej eo kalle le ko raorõk, ej kijenmej wõt m̦ae iien emoottok iien eo jinoin an wõt im iien eo tokãlik ñe enaaj bar wõt.*
8 Kom̦win bareinwõt kwal̦o̦k kijenmej im kom̦win kõkajoor bũruomi kõnke epaaktok iien eo Irooj enaaj pãd.
9 Ro jeiũ im jatũ, kom̦win jab ellotaane* doon kõnke kom̦win jab bõk ekajet. Roñjake m̦õk! Ri-Ekajet eo ej jutak im̦aan kõjãm ko.
10 Ro jeiũ im jatũ, kom̦win anõk joñak eo an ri-kanaan ro rar kõnono ilo etan Jeova,* ro rar eñtaan ium̦win men ko renana im rar kijenmej wõt.
11 Kom̦win roñjake! Jej watõk bwe em̦õn̦õn̦õ* ro rar kijenmej. Em̦õj ami roñ kõn an kar Job kijenmej im kom̦ar lo jem̦l̦o̦k eo Jeova* ear lel̦o̦k ñane, im bwe Jeova* elukkuun l̦ap an yokwe* im etũriam̦o.
12 El̦aptata, ro jeiũ im jatũ, kom̦win bõjrak jãn ami kajje kõn lañ ak lal̦, ak jabdewõt kallim̦ur ko jet. Bõtab, kom̦win kõm̦m̦an bwe ami “Aet” en aet im ami “Jaab” en jaab, kõnke en jab tõllo̦kũmi ñan bõk ekajet.
13 Ewõr ke jabdewõt jãn ibwiljimi ej eñtaan kõn an iioon mãlejjoñ? En wõnm̦aanl̦o̦k wõt ilo an jar. Ewõr ke jabdewõt en̦ em̦õn̦õn̦õ? En al kõn sam ko.
14 Ewõr ke jabdewõt jãn ibwiljimi enañinmej?* En kũrtok em̦m̦aan ro rej lale eklejia eo, im ren jar kõn e im kapiti kõn weil̦ ilo etan Jeova.*
15 Innem jar eo kar kwal̦o̦k ikijjeen tõmak enaaj kõm̦m̦an bwe eo enañinmej* en em̦m̦an an mour, im Jeova* enaaj kõjerkake. Bareinwõt, el̦aññe ear jerawiwi, naaj jeorl̦o̦k an bõd.
16 Kõn men in, kom̦win kwal̦o̦k jerawiwi ko ami ñan doon im jar kake doon bwe kom̦win maroñ ãjmour. Jar in akwel̦ap eo an juon eo ewãnõk ekanooj in kajoor im l̦ap tokjãn.
17 Ilaija ear juon armej me eñjake ko an rar ãinwõt eñjake ko ad, ak ke ear lukkuun jar bwe en jab wõt, ãindein ear jab wõt ioon ãneo ium̦win jilu iiõ im jiljino allõñ.
18 Innem ear bar jar, im lañ ear letok wõt im ãneo ear jebar leen.
19 Ro jeiũ im jatũ, el̦aññe jabdewõt iaami ejebwãbwe jãn m̦ool eo im bar juon ej kõjepl̦aaktok,
20 kom̦win jel̦ã bwe jabdewõt eo ej kõjepl̦aaktok juon rijjerawiwi jãn ial̦ eo an ebõd, enaaj lo̦mo̦o̦rene armej in jãn mej im naaj kalbubuuk jerawiwi ko rellõñ an armej in.
Footnotes
^ Juon kain menninmour jidikdik im ej wõjeke nuknuk ko.
^ Lale “Jeova” ilo Kõmel̦el̦e Ko.
^ Iien eo jinoin ej wõt, ej jinoe ilo lukwõl̦pãn Oktoba. Im iien eo tokãlik enaaj wõt, ej jinoe ilo lukwõl̦pãn Eprõl̦.
^ Ak “kõrraate; abn̦õn̦õ n̦ae.”
^ Lale “Jeova” ilo Kõmel̦el̦e Ko.
^ Ak “ejeraam̦m̦an.”
^ Lale “Jeova” ilo Kõmel̦el̦e Ko.
^ Lale “Jeova” ilo Kõmel̦el̦e Ko.
^ Ak “emel̦el̦e kõn eñjake ko ad.”
^ Ej jitõñl̦o̦k ñan juon eo enañinmej ilo tõmak.
^ Lale “Jeova” ilo Kõmel̦el̦e Ko.
^ Ak emaroñ, “eo em̦õk.”
^ Lale “Jeova” ilo Kõmel̦el̦e Ko.
