Jerbal 11:1-30
11 Rijjilõk ro im rũttõmak ro ilo Judia rar roñ bwe armej in aelõñ ko rar tõmak naanin Anij.
2 Kõn men in, ke Piter ear wanlõñl̦o̦k ñan Jerusalem, ro rej rejetake kien eo kõn m̦wijm̦wij rar jum̦aiki
3 im ba: “Kwaar etal ñan im̦õn em̦m̦aan ro rejjañin m̦wijm̦wij im kwaar m̦õñã ippãer.”
4 Innem Piter ear jino kwal̦o̦k ñan er tipdikin aolep men ko rar wal̦o̦k, ear ba:
5 “Iar pãd ilo Joppa im jar, innem iar lo juon pijen kõn juon men ãinwõt jiit* kileplep ej wanlal̦tak jãn lañ im rej jibwe kona ko emãn ie, im ear kajjutok ñan ippa.
6 Ke iar lukkuun kalimjeke, iar lo menninmour ko emãn neer, menninmour ko rawiia, menninmour ko rej tõbalbal, im bao in mejatoto ko.
7 Bareinwõt, iar roñ juon ainikien ej kõnnaantok ñan ña im ba: ‘Piter, kwõn jutak im m̦an menninmour mour kan̦e im kañi!’
8 Bõtab iar ba: ‘Irooj, ijjãmin, kõnke ejjañin kar wõr men en̦ emo̦ kañe ak ettoon me enañin kar del̦o̦ñ ilowaan lo̦ñiũ.’
9 Ainikien eo jãn lañ ear bar wal̦o̦k alen eo kein karuo im ba: ‘Kwõn bõjrak jãn am̦ ba bwe ettoon men ko em̦õj an Anij karreoiki.’
10 Ainikien eo ear bar wal̦o̦k alen eo kein kajilu, innem kar bar bõklõñl̦o̦k aolep men ko ñan lañ.
11 Bareinwõt ilo ejja iien eo wõt, ekar wõr jilu em̦m̦aan rar jutak inabõjin m̦weo kõmar jokwe ie, im kar jilkintok er jãn Seseria.
12 Innem jetõb kwõjarjar* ear ba bwe in etal ippãerl̦o̦k im jab pere ñan jidik. Em̦m̦aan rã jiljino jeid im jatid rar bar itok ippatok, im kõmar etal im del̦o̦ñl̦o̦k ilo m̦weo im̦õn em̦m̦aan eo.
13 “Innem em̦m̦aan eo ear ba ñan kõm kõn an kar lo an enjel̦ eo jutak ilo m̦weo im̦õn im ba: ‘Kwõn ijjilõkl̦o̦k em̦m̦aan ñan Joppa bwe ren bõktok Saimõn, eo rej ãñinñini im ba Piter,
14 im enaaj kwal̦o̦k ñan kwe ewi wãween bwe kwe im aolep ro ilo m̦wiin im̦õm̦ kom̦win maroñ bõk lo̦mo̦o̦r.’
15 Bõtab ke iar jino kõnono, jetõb kwõjarjar* ear itok ioer ãinwõt an kar itok iood ilo jinoin.
16 Innem iar keememejtok naan ko an Irooj ke ekõn ba: ‘Jon ear peptaiji armej kõn dãn ak naaj peptaiji kom̦ kõn jetõb kwõjarjar.’*
17 Kõn men in, el̦aññe Anij ear lel̦o̦k ñan er menin letok in ejjel̦o̦k on̦ããn me ekar bar letok ñan kõj ro rar tõmak Irooj Jesus Christ, innem wõn ña bwe in itõn bõbraik* Anij?”
18 Ke rar roñ men kein, ear bõjrak aer jum̦ae* im rar kaiboojoj Anij im ba: “Alikkar bwe em̦õj an Anij kõtl̦o̦k an ri-aelõñ ko ukel̦o̦k bwe ren maroñ mour.”
19 Ro rar ejjeplõklõk jãn wõt men eo ear wal̦o̦k ñan Stipen rar etal ñan Pinisia, Saiprõs, im Antiok, bõtab rar kwal̦o̦k kõn ennaan eo ñan ri-Ju ro wõt.
20 Bõtab jet iaan ro jãn Saiprõs im Sairine rar ilo̦k ñan Antiok im jino kwal̦o̦k kõn ennaan eo em̦m̦an kõn Irooj Jesus ñan armej ro rej kõnono kajin Grik.
21 Im Jeova* ear pãd ippãer,* im elukkuun lõñ rar erom rũttõmak im oktak ñan Irooj.
22 Ennaan eo kõn rein ear tõparl̦o̦k eklejia eo ilo Jerusalem, innem rar jilkinl̦o̦k Barnebas ñan Antiok.
23 Ke ear tõparl̦o̦k ijo im lo wãween an Anij kwal̦o̦k jouj eo an el̦ap ñan er, ear lañlõñ im ear jino rõjañ er bwe ren tiljek wõt ñan Irooj kõn aolepen bũrueer.
24 Barnebas ear juon em̦m̦aan eo em̦m̦an im eobrak kõn jetõb kwõjarjar* im ekajoor tõmak eo an, eñin unin elõñ armej rar oktak im tõmak ilo Irooj.
25 Innem ear etal ñan Tarsus bwe en pukote Saul ñan ñe eloe.
26 Ãlikin an loe, ear bõke ñan Antiok, im erro kar kobal̦o̦k ippãn eklejia eo im katakin elõñ armej ium̦win juon iiõ. Eñin ej jikin eo Anij ear lel̦o̦k ãt in Kũrjin ñan ri-kal̦oor ro.
27 Ilo tõre kein, jet ri-kanaan rar itok jãn Jerusalem ñan Antiok.
28 Juon iaaer etan Agebõs ear jutak, im jetõb kwõjarjar* ear kõm̦akũti bwe en kanaan bwe enaaj wal̦o̦k juon ñũta el̦ap ilo aolepen ãneo. Ilo m̦ool, men in ear wal̦o̦k ilo tõre ko an Klaudiõs.
29 Kõn men in, ri-kal̦oor ro rar pepe ekkar ñan joñan maroñ ko an kajjojo iaaer bwe ren jilkinl̦o̦k kein jipañ ñan ro jeier im jatier ilo Judia.
30 Rar kõm̦m̦ane men in im lel̦o̦k ñan Barnebas im Saul bwe ren bõkl̦o̦k ñan ippãn em̦m̦aan ro rej lale eklejia.
Footnotes
^ Ak “ko̦o̦j.”
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Ak “kabõjrak.”
^ Kajin Grik, “rar ikõñ.”
^ Lale “Jeova” ilo Kõmel̦el̦e Ko.
^ Kajin Grik, “pein Jeova ear pãd ippãer.”
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
