Jerbal 15:1-41
-
Aitwerõk eo kõn m̦wijm̦wij ilo Antiok (1, 2)
-
Aer bõkl̦o̦k kajjitõk eo ñan Jerusalem (3-5)
-
Rijjilõk ro im em̦m̦aan ro rej lale eklejia rej kweilo̦k ippãn doon (6-21)
-
Lõta eo jãn kumi in em̦m̦aan ro rej lale eklejia ko (22-29)
-
Kõjparok jãn bõtõktõk (28, 29)
-
-
Lõta eo ear kõkajoor eklejia ko (30-35)
-
Paul im Barnebas rej jepel jãn doon (36-41)
15 Innem jet em̦m̦aan rar itok jãn Judia im katakin rũttõmak ro im ba: “El̦aññe kom̦ij jab m̦wijm̦wij ekkar ñan Kien Moses, kom̦ij jab maroñ bõk lo̦mo̦o̦r.”
2 Bõtab ãlikin an kar Paul im Barnebas aitwerõk kake men in ippãer im jum̦aik er, kar karõk bwe Paul im Barnebas im bar jet ren wanlõñl̦o̦k ñan Jerusalem ñan ippãn rijjilõk ro im em̦m̦aan ro rej lale eklejia bwe ren kõnnaan kõn apañ in.*
3 Ãlikin an ro ilo eklejia eo ilo̦k jidik ippãerl̦o̦k ilo ial̦ eo aer, em̦m̦aan rein rar etal wõt ñan Pinisia im Sameria, im rar kwal̦o̦k im tipdikil̦o̦k ñan rũttõmak ro kõn an armej in aelõñ ko oktak ñan Anij. Ke aolep rũttõmak ro rar roñ men in, rar kanooj m̦õn̦õn̦õ.
4 Ke rar tõparl̦o̦k Jerusalem, ro ilo eklejia eo im rijjilõk ro im em̦m̦aan ro rej lale eklejia rar karwaineneik er, im erro kar kõnnaanek er kõn aolep men ko Anij ear kõjerbal erro ñan kõm̦m̦ani.
5 Ak jet iaan ro rar uwaan Parisi ro bõtab rar oktak im erom rũttõmak, rar jutak jãn ijo rej jijet ie im ba: “Emenin aikuj bwe ren m̦wijm̦wij im jej aikuj jiroñ er bwe ren l̦oore Kien Moses.”
6 Kõn men in, rijjilõk ro im em̦m̦aan ro rej lale eklejia rar kweilo̦k ippãn doon ñan kõnnaan kake men in.
7 Ke ear tol̦o̦k wõt aer leto letak* kake men in, Piter ear jutak im ba: “Em̦m̦aan ran̦ jeiũ im jatũ, kom̦ kanooj jel̦ã bwe jãn jinoin Anij ear kããlõt eõ jãn ibwiljimi bwe in kwal̦o̦k ennaan eo em̦m̦an ñan ri-aelõñ ko bwe ren tõmak.
8 Im Anij, eo ejel̦ã kõn kobban bũruon armej, ear kwal̦o̦k kein kam̦ool bwe ebuñbũruon kake er ilo an kar lel̦o̦k jetõb kwõjarjar* ñan er, ãinwõt an kar bar letok ñan kõj.
9 Im ejjab kwal̦o̦k kalijekl̦o̦k ikõtaad im er, ak ej karreoik bũrueer ikijjeen tõmak.
10 Kõn men in, etke kom̦ij mãlejjoñe Anij ilo ami kõm̦m̦an bwe ri-kal̦oor rein ren ineeke juon men eddo me kõj im ro jim̦m̦aad jekar jab maroñ ineeke?
11 Ilo m̦ool, jej tõmak bwe jenaaj bõk lo̦mo̦o̦r kõn wõt jouj eo el̦ap an Irooj Jesus, ãinwõt bar armej rein.”
12 Ke er aolep rar roñ men in, rar ikõñ im rar roñjake an Barnebas im Paul kwal̦o̦k ñan er kõn aolep kõkal̦l̦e ko im menin kabwilõñlõñ ko Anij ear kõjerbal erro ñan kõm̦m̦ani ibwiljin ri-aelõñ ko.
13 Ke ear m̦õj aerro kõmel̦el̦e, Jemes ear ba: “Em̦m̦aan ran̦ jeiũ im jatũ, kom̦win roñjake.
14 Simeon* ear lukkuun tipdikitok kõn iien eo jinointata Anij ear oktakl̦o̦k ñan ri-aelõñ ko im ebbõk armej jãn ibwiljier bwe ren jutak kõn ãt eo etan.
15 Im naan kein rej errã ilo naan ko an ri-Kanaan ro, ãinwõt kar je:
16 ‘Ãlikin men kein, inaaj jepl̦aak im bar kalõk im̦õn kõppãd eo an Devid,* eo ejorrããn. Inaaj kõkããle ijoko rejorrããn ie im bar karo̦o̦le ñan m̦okta
17 bwe armej ro rej pãdwõt, ekoba aolep ri-aelõñ ko, ro im rej jutak kõn ãt eo eta, ren lukkuun pukot Jeova.* Eñin men eo Jeova* ej ba. E eo ej kõm̦m̦ani men kein
18 im ear jel̦ã kaki jãn kar etto.’
19 Kõn men in, pepe* eo aõ in ej bwe jen jab kainepataik armej in aelõñ ko me rej oktak ñan Anij.
20 Bõtab jen jeje ñan er bwe ren kõjparok er jãn jabdewõt men ko rej ekkejell̦o̦k ñan ekjab, im jãn l̦õñ,* jãn menninmour ko em̦õj lukwõj bũrueer,* im jãn bõtõktõk.
21 Jãn kar iien ko etto, ear wõr armej ilo aolep jikin ko rar kwal̦o̦k kõn men ko Moses ear jei kõnke kajjojo Jabõt* rej kõl̦l̦aaj ainikieer im riiti men kein ilo im̦õn kabuñ ko.”
22 Innem rijjilõk ro im em̦m̦aan ro rej lale eklejia ekoba aolep ro ilo eklejia eo, rar pepe ñan kããlõt jet em̦m̦aan jãn ibwiljier im jilkinl̦o̦k er ippãnl̦o̦k Paul im Barnebas ñan Antiok. Rar jilkinl̦o̦k Judas, ãt eo juon Barsebas im Sailas, l̦õm̦arein ruo rej jet iaan ro rej tõl rũttõmak ro ilo jerbal eo.
23 Rar je lõta in im jilkinl̦o̦k ippãerl̦o̦k:
“Jãn kõm rijjilõk ro im em̦m̦aan ro rej lale eklejia, ro jeimi im jatimi, ñan kom̦ aolep ri-aelõñ ko jeim im jatim ilo Antiok, Siria, im Silisia: Yokwe kom̦ aolep!
24 Kõmar roñ bwe jet iaammim rar iwõj im pukwõj l̦õmn̦ak ko ami kõn naan ko aer im kajjioñ ko̦kkure tõmak ko ami meñe kõmar jab jiroñ er ñan kõm̦m̦ane men in.
25 Kõn men in, em̦õj am aolep errã ippãn doon ñan jilkinwaj jet em̦m̦aan ippãn Barnebas im Paul, ro rejitõnbõro ippem
26 im rar kõjekdo̦o̦ne mour ko aerro kõn wõt etan Irooj eo ad, Jesus Christ.
27 Kõmij jilkinwaj Judas im Sailas bwe erro en kõnnaan ñan kom̦ kõn ejja men kein wõt ilo lõta in.
28 Jetõb kwõjarjar* ear jipañ kõm ñan kõm̦m̦ane pepe eo bwe kõmin jab kaddouk kom̦ kõn elõñl̦o̦k men ijello̦kun wõt men kein raorõk:
29 kom̦win wõnm̦aanl̦o̦k wõt im kõjparok kom̦ jãn men ko em̦õj katok kaki ñan ekjab ko, jãn bõtõktõk, jãn menninmour ko em̦õj lukwõj bũrueer,* im jãn l̦õñ.* El̦aññe kom̦ij kanooj kõjparok kom̦ jãn men kein, kom̦ naaj jeraam̦m̦an. Kõjparok wõt ami mour!”*
30 Innem em̦m̦aan rein rar etal im wanlal̦l̦o̦k ñan Antiok im ko̦kweilo̦ktok aolep ri-kal̦oor ro im rar lel̦o̦k lõta eo ñan er.
31 Ãlikin aer riiti, rar lañlõñ kõn naanin rõjañ ko.
32 Innem Judas im Sailas, kõnke bar erro ri-kanaan, rar rõjañ rũttõmak rein ikijjeen aer kwal̦o̦k elõñ katak ko im kõkajoor er.
33 Ãlikin aer pãd ium̦win jidik iien ilo jikin in, rũttõmak ro rar jilkinl̦o̦k er ilo aenõm̦m̦an ñan ippãn ro rar jilkintok er.
34 *——
35 Bõtab Paul im Barnebas rar pãdwõt ilo Antiok im katakin ie, im rar bar kwal̦o̦k kõn ennaan eo em̦m̦an kõn naan eo an Jeova,* im elõñ rar kobal̦o̦k ippãerro im kõm̦m̦ane men in.
36 Jejjo raan tokãlik, Paul ear ba ñan Barnebas: “Jen kiiõ* jepl̦aak im lol̦o̦k ro jeid im jatid ilo aolepen jikin ko jaar kwal̦o̦k kõn naan eo an Jeova* ie bwe jen lale ejet aer pãd.”
37 Im Barnebas ear lukkuun kõn̦aan bõke Jon, ãt eo juon Mark, ippãerl̦o̦k.
38 Ak Paul ear jab kõn̦aan bõke ippãerro kõn an kar ilo̦k jãn erro ke rar pãd ilo Pampilia im ear jab etal ippãerro im kõm̦m̦ane jerbal eo.
39 Kõn men in, erro kar lukkuun akwããl im rar jepel jãn doon. Barnebas ear bõk Mark im jerakl̦o̦k ñan Saiprõs.
40 Ak Paul, ãlikin an kar em̦m̦aan ro jar bwe Jeova* en kwal̦o̦k jouj eo an el̦ap ñane, ear kããlõt Sailas im ilo̦k.
41 Ear etal ilujenl̦o̦k Siria im Silisia, im ear kõkajoor eklejia ko.
Footnotes
^ Ak “aitwerõk in.”
^ Ak “aitwerõk.”
^ Ak “kajoor eo an.” Lale “Jetõb kwõjarjar” ilo Kõmel̦el̦e Ko.
^ Ãt eo juon etan Piter.
^ Ak “m̦weo im̦õn Devid.”
^ Lale “Jeova” ilo Kõmel̦el̦e Ko.
^ Lale “Jeova” ilo Kõmel̦el̦e Ko.
^ Ak “l̦õmn̦ak.”
^ Ak “em̦õj m̦ani bõtab rar jab kato̦o̦rl̦o̦k bõtõktõkier.”
^ Naan eo ilo kajin Grik ej por·nei′a. Lale “L̦õñ” ilo Kõmel̦el̦e Ko.
^ Lale “Jabõt” ilo Kõmel̦el̦e Ko.
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Ak “em̦õj m̦ani bõtab rar jab kato̦o̦rl̦o̦k bõtõktõkier.”
^ Naan eo ilo kajin Grik ej por·nei′a. Lale “L̦õñ” ilo Kõmel̦el̦e Ko.
^ Ak “Bar yokwe kom̦.”
^ Meñe ewal̦o̦k eoon in ilo jet ukokin Baibõl̦, bõtab ejjab wal̦o̦k ilo elõñ iaan bok lemlem in etto ko ilo kajin Grik.
^ Lale “Jeova” ilo Kõmel̦el̦e Ko.
^ Ak emaroñ, “Jej aikuj.”
^ Lale “Jeova” ilo Kõmel̦el̦e Ko.
^ Lale “Jeova” ilo Kõmel̦el̦e Ko.
