Jerbal 17:1-34
17 Innem rar etal ilujenl̦o̦k Ampipolis im Apolonia im itok ñan Tessalonika, ijo ekar wõr juon im̦õn kabuñ an ri-Ju ie.
2 Kõn men in, Paul ear del̦o̦ñl̦o̦k ilowaan im̦õn kabuñ eo ãinwõt ke ej juon imminene ippãn, im jilu Jabõt* in an kar kwal̦o̦k ñan er jãn Jeje ko
3 im kõmel̦el̦eik er im kam̦ool ñan er jãn men ko em̦õj jei bwe ekar menin aikuj ñan an Christ eñtaan im jerkak jãn mej. Ear ba: “Jesus in ij kwal̦o̦k ñan kom̦ kake, e eo ej Christ.”
4 Jãn wõt men in, jet iaaer rar erom rũttõmak im rar kobal̦o̦k ippãn Paul im Sailas. Bareinwõt, elõñ iaan ri-Grik ro rej kabuñ ñan Anij rar bar erom rũttõmak, ekoba elõñ iaan kõrã ro reutiej ilo jikin eo.
5 Bõtab ri-Ju ro rar jino ebbanban im rar aintok jet ri-nana me rekõn pãd bajjek ilo jikin wia ko im rar ejaake juon jarlepju im kõm̦m̦an poktak ilo jikin eo. Innem rar kajju del̦o̦ñe m̦weo im̦õn Jeson bwe ren pukote Paul im Sailas im bõktok erro ñan ippãn jarlepju eo.
6 Ke rar jab lo er, rar jibwe Jeson im jet iaan em̦m̦aan ro rej rũttõmak im iperl̦o̦k er ñan ippãn ri-tõl ro an jikin eo, im rar kõl̦l̦aaj ainikieer im ba: “L̦õm̦aro rar kõm̦m̦an poktak ilo aolep jikin ilo lal̦ in rebar pãd ijin,
7 im Jeson ear kadel̦o̦ñ er ilo m̦ween̦ im̦õn bwe ren an ri-lol̦o̦k. Aolep l̦õm̦arein rej jum̦aik kakien ko an Sizar,* rej ba bwe ebar wõr juon kiiñ etan Jesus.”
8 Ke rar roñ men kein, jarlepju eo im ri-tõl ro an jikin eo rar illu.
9 Im ãlikin aer kar kõm̦m̦an bwe Jeson im rũttõmak ro jet ren kõl̦l̦ã on̦ããn aer rõl̦o̦k, rej kab kõtl̦o̦k er.
10 Innem ke ear boñ, rũttõmak ro rar m̦õkaj im jilkinl̦o̦k Paul im Sailas ñan Beria. Ke rar tõparl̦o̦k ijo, erro kar etal ñan im̦õn kabuñ eo an ri-Ju ro.
11 Em̦m̦anl̦o̦k bũruon armej ro ijin jãn armej ro ilo Tessalonika kõnke rar lukkuun m̦õn̦õn̦õ in roñjake ennaan eo im rar kanooj etale Jeje ko kajjojo raan ñan lale em̦ool ke men ko rar roñ.
12 Kõn men in, elõñ iaaer rar erom rũttõmak, ekoba elõñ iaan kõrã in Grik ro reutiej im bar jet iaan em̦m̦aan ro.
13 Bõtab ke ri-Ju ro ilo Tessalonika rar roñ bwe Paul ear kwal̦o̦k naanin Anij ilo Beria, rar itok ñan ijo bwe ren pukwõj armej ro im kalluuk er.
14 Innem rũttõmak ro rar m̦õkaj im jilkinl̦o̦k Paul ñan juon jikin po iturin lo̦jet, ak Sailas im Timote rar pãdwõt ijo.
15 Ro rar etal ippãn Paul rar bõkl̦o̦ke ñan Atens, im rar jepl̦aak ãlikin an kar jiroñ er bwe ren ba ñan Sailas im Timote bwe erro en m̦õkajl̦o̦k ñan ippãn.
16 Ke Paul ear kõttar erro ilo Atens, ear jino an kũtõtõ ke ear lo bwe eobrak jikin eo kõn ekjab.
17 Innem ear jino kõmel̦el̦eik ri-Ju ro ilo im̦õn kabuñ eo aer im ro jet rej kabuñ ñan Anij, im jabdewõt ro ej lo er kajjojo raan ilo jikin wia ko.
18 Bõtab jet iaan ro jãn kumi ko etaer Epikurõs* im Stoik* rar jino aer akwããl ippãn, im jet rar ba: “Ta kan̦e ri-kõnnaan bajjek n̦e ej kajjioñ in ba?” Ro jet rar ba: “Ãinwõt ej kwal̦o̦k kõn anij kan̦ an ri-aelõñ kan̦ jet.” Rar ba men in kõnke Paul ear kwal̦o̦k kõn ennaan eo em̦m̦an kõn Jesus im kõn jerkakpeje.
19 Innem rar jibwe im bõkl̦o̦ke ñan ijo rej n̦aetan Areopegõs, im rar ba: “Jemaroñ ke jel̦ã kõn katak in ekããl kwõj kwal̦o̦k kake?
20 Kõmij jañin kar roñ mel̦el̦e kan̦e kwõj kwal̦o̦ki, im kõm kõn̦aan jel̦ã ta mel̦el̦eier.”
21 Ilo m̦ool, aolep ri-Atens ro im armej ro jãn aelõñ ko jet me rar pãd ilo jikin in* rekõn kõjerbal iien kakkije ko aer ñan aer kõnnaan kõn men ko rekããl ak roñjaki mel̦el̦e ko rekããl.
22 Innem Paul ear jutak ijo iol̦ap ilo Areopegõs im ear ba:
“Em̦m̦aan in Atens ran̦, ij kile bwe ilo men otemjej el̦ap ami mijak anij ko.* Ilo m̦ool, el̦apl̦o̦k ami kõm̦m̦ane men in jãn armej ro jet.
23 Ñan waanjoñak, ke iar etetal bajjek im lukkuun etale men kein kom̦ij kautieji,* iar lo juon lokatok em̦õj je naan kein ie ‘Ñan Anij eo Kõm Jaje Kake.’ Ij ba ñan kom̦ bwe anij in kom̦ij kabuñ ñane meñe kom̦ jaje kake, eñin ej anij eo ij kwal̦o̦k kake ñan kom̦.
24 Anij eo in ear kõm̦anm̦an lal̦ in im aolep men ko ie, im kõnke ej Irooj in lañ im lal̦, ejjab maroñ jokwe ilo tampel̦ ko kõm̦m̦anin pein armej.
25 Bareinwõt, ejjab aikuji an armej jipañe kõnke ejjel̦o̦k men en̦ ej aikuji. E eo ear letok mour, menono, im men otemjej ñan aolep armej.
26 Ear kõm̦anm̦an ri-aelõñ otemjej jãn juon wõt armej bwe ren jokwe ilo aolepen lal̦ in, im ear karõk iien ko im jikin ko armej remaroñ jokwe ie
27 bwe ren maroñ pukot E, im ñe rej kate er ñan pukote renaaj loe. Ilo m̦ool, ejjab ettol̦o̦k jãn kõj kajjojo.
28 Kõn wõt E, jej mour im m̦akũtkũt im pãd, im jet iaan ri-jeje ro ami rar ba, ‘Kõj jej bar ajri ro nejin.’*
29 “Innem kõnke jej ajri ro nejin* Anij, jen jab l̦õmn̦ak bwe Anij ej juon ekjab kõm̦m̦an jãn gold ak jelba ak dekã, ãinwõt men ko rar wal̦o̦ktok jãn jel̦ãl̦o̦kjen̦ im kapeel ko an armej.
30 Em̦ool bwe Anij ear kõjekdo̦o̦n men kein armej rar kõm̦m̦ani ilo iien ko rar jaje kõn e, ak kiiõ ej kwal̦o̦k ñan aolep armej ijoko otemjej bwe rej aikuj ukel̦o̦k
31 kõnke em̦õj an kããlõt juon raan bwe en ekajete lal̦ in ilo jim̦we ikijjeen em̦m̦aan eo ear kããlõte. Ear kam̦ool men in ñan aolep armej ikijjeen an kar kõjerkakpejeik em̦m̦aan in.”
32 Ke armej ro rar roñ an kõnnaan kõn jerkakpeje, jet rar jino kajjirere kake, ak ro jet rar ba: “Kõm naaj roñjake am̦ kõnnaan kõn men in bar juon iien.”
33 Kõn men in, Paul ear ilo̦k jãn er,
34 bõtab jet armej rar kobal̦o̦k ippãn im erom rũttõmak. Juon iaaer ej Daionisiõs, juon ri-ekajet ilo jikin ekajet eo etan Areopegõs, im bar juon kõrã etan Dameris, im ebar lõñ ro jet.
Footnotes
^ Lale “Jabõt” ilo Kõmel̦el̦e Ko.
^ Ak “Irooj L̦apl̦ap eo an Rom.”
^ Armej rein rej ri-kal̦ooran rimmãlõtlõt eo etan Epikurõs.
^ Armej rein rej ri-kal̦ooran rimmãlõtlõt eo etan Zeno.
^ Ak “lol̦o̦k jikin in.”
^ Ak “kaorõk kabuñ.”
^ Ak “kabuñ ñani.”
^ Ak “ro ineen.”
^ Ak “ro ineen.”
