Jerbal 20:1-38
20 Ke ear dikl̦o̦k poktak eo, Paul ear ijjilõkl̦o̦k ennaan ñan ri-kal̦oor ro bwe ren itok, im ãlikin an kar kõkajoor er im yokyokwe er, ear jino ial̦ eo an l̦o̦k ñan Masedonia.
2 Ãlikin an etal ilo jikin kein l̦o̦k im lel̦o̦k elõñ naanin rõjañ ñan ro ilo jikin kein, ear tõparl̦o̦k Greece.
3 Ear pãd ijin ium̦win jilu allõñ, bõtab ke ear roñ bwe ri-Ju ro rar pepe in m̦ane ilo iien eo ear itõn jerakl̦o̦k ñan Siria, ear pepe in jepl̦aak ilujenl̦o̦k Masedonia.
4 Ro rar etal ippãnl̦o̦k ej Sopeter, nejin Pirrõs jãn Beria, Aristarkõs im Sekõndõs jãn Tessalonika, Geiõs jãn Derbe, Timote, im Tikikõs im Tropimõs jãn jikin ko ilo Eijia.*
5 Em̦m̦aan rein rar etal im̦aanl̦o̦k im kõttar kõm ilo Troas.
6 Bõtab kõmar jerak jãn Pilippai ãlikin an kar jem̦l̦o̦k iien Kwõjkwõjin Bũreet Ejjab Kauwe.* Im ãlikin l̦alem raan, kõmar tõparl̦o̦k ijo ippãer ilo Troas, im kõmar jol̦o̦k jimjuon raan ijo.
7 Ilo raan eo m̦oktata ilo wiik eo juon* ke kõmar koba ippãn doon ñan m̦õñã, Paul ear jino an kõnono ñan er kõnke ear pojakin ilo̦k raan eo juon, im ear kõnnaanl̦o̦k ñan ñe elukwõn boñ.
8 Ebwe an kar lõñ l̦aam̦ ilo ruum̦ eo ilõñ, ijo kõmar kobal̦o̦k ippãn doon ie.
9 Juon likao etan Eutikõs ear jijet ilo wũntõ eo im ear lukkuun ettoñ ke Paul ear kõnnaan, im kõn an kar lukkuun ettoñ, ear wõtlo̦k jãn po* eo kein kajilu im ke rar kotake em̦õj an mej.
10 Bõtab Paul ear wanlal̦l̦o̦k im ear bukwelõlõ iturin likao eo, im ear jillo̦k im jiburlepe, im ba: “Kom̦win bõjrak jãn ami jeparujruj bwe emour l̦adik e.”
11 Ãlikin men in, Paul ear bar wanlõñl̦o̦k im jino kõjota* eo im m̦õñã. Innem ear bar wõnm̦aanl̦o̦k wõt im kõnnaanl̦o̦k ñan ñe eraan, im ear etal ilo ial̦ eo an l̦o̦k.
12 Innem rar bõk l̦adik eo im rar lukkuun m̦õn̦õn̦õ bwe ebar mour.
13 Kõmar kiiõ etal ñan wa eo im jerakl̦o̦k ñan Assos, bõtab Paul ear etal lal̦l̦o̦k. Kõmar jerakl̦o̦k ñan jikin in bwe kõmin ektake, ãinwõt an kar jiroñ kõm.
14 Innem ke ear iioone kõm ilo Assos, kõmar ektake im etal wõt ñan Mitiline.
15 Ãlikin ammim kar jerak jãn ijo ilo raan eo tok juon, kõmar pol̦o̦k iarin Kaiõs, raan eo tok juon kõmar tõparl̦o̦k Semos, im juon raan tokãlik kõmar pol̦o̦k ilo Mailitõs.
16 Paul ear pepe in jerakl̦o̦k wõt im el̦l̦ãl̦o̦k jãn Epesõs bwe en jab jol̦o̦k iien ilo jikin ko ilo Eijia, kõnke ear kõn̦aan m̦õkajl̦o̦k ñan Jerusalem bwe en pãd ilo raanin Kwõjkwõjin Pentekost* eo, el̦aññe emaroñ.
17 Bõtab ke ear pãd ilo Mailitõs, ear ijjilõkl̦o̦k ennaan ñan Epesõs bwe em̦m̦aan ro rej lale eklejia eo ijo ren itok.
18 Ke rar itok ñan ippãn, ear ba ñan er: “Kom̦ kanooj in jel̦ã kõn wãween kõm̦m̦an ko aõ ke iar pãd ippemi jãn iien eo m̦oktata iar tõpartok jikin kein ilo Eijia.
19 Iar ri-kõm̦akoko ñan Irooj im kanooj kõttãik bũruõ ñane, im kõnke ri-Ju ro rar pepe in m̦an eõ, ear l̦ap aõ jañ im eñtaan.
20 Iar jab bõjrak jãn aõ kõnnaanek kom̦ kõn jabdewõt men ko ewõr tokjãer ñan kom̦,* im jãn aõ katakin kom̦ ilo̦bwilej im jãn em̦ ñan em̦.
21 Ear lukkuun lõt aõ kwal̦o̦k naan ñan ri-Ju ro im ñan ri-Grik ro bwe rej aikuj ukel̦o̦k im oktak ñan Anij im ren likũt aer tõmak ilo Jesus ad Irooj.
22 Im kiiõ ña ij etal ñan Jerusalem ium̦win tõl eo an jetõb kwõjarjar* meñe ijaje ta eo enaaj wal̦o̦k ñan ña ijen̦.
23 Men eo dein ijel̦ã ej bwe jãn jikin ñan jikin, ejjab bõjrak an jetõb kwõjarjar* kwal̦o̦k ñan ña bwe kalbuuj im eñtaan rej kõttar wõt ña.
24 Meñe ãindein ak ijjab watõk bwe mour e aõ eaorõk ippa.* Men eo eaorõk in ej bwe in kam̦õjl̦o̦k ial̦ eo aõ im jerbal eo iar bõke jãn Irooj Jesus, bwe en lõt aõ kwal̦o̦k kõn ennaan eo em̦m̦an kõn jouj eo el̦ap an Anij.
25 “Innem kiiõ ijel̦ã bwe kom̦ aolep ro iar kwal̦o̦k ennaan eo kõn Aelõñ eo an Anij* ñan er, kom̦ ban bar lo meja.
26 Kõn men in, iar kũrtok kom̦ rainin bwe kom̦win jel̦ã bwe ejjel̦o̦k ruõ kõn bõtõktõkin aolep armej,
27 kõnke iar jab n̦ooje jabdewõt men jãn kom̦ ak iar kwal̦o̦k ñan kom̦ aolep naanin kakapilõk* ko an Anij.
28 Kom̦win kanooj kõjparok kom̦ make im aolep ro ilo bwij eo, ro jetõb kwõjarjar* ear jitõñ kom̦ bwe kom̦win lale er, im bwe kom̦win ãinwõt jabõt ro ñan eklejia eo an Anij, eo ear wiaiki kõn bõtõktõkin eo ej make wõt Nejin.
29 Ijel̦ã bwe ãlikin aõ naaj ilo̦k, kidu ol̦ip ko rellãj renaaj del̦o̦ñtok ibwiljimi im eban em̦m̦an aer kõm̦m̦an ñan bwij eo,
30 im enaaj wõr em̦m̦aan ibwiljimi renaaj ukot katak ko rem̦ool ñan kareel ri-kal̦oor ro bwe ren l̦oor er.
31 “Kõn men in, kom̦win ekkõl wõt* im keememej bwe ium̦win kar jilu iiõ, raan im boñ iar jab bõjrak jãn aõ katakin kajjojo iaami kõn dãnnin kõmjaal̦al̦.
32 Ak kiiõ, ij likũt kom̦ ium̦win kõjparok eo an Anij im ennaan eo kõn jouj eo an el̦ap, ennaan in emaroñ kõkajoor kom̦ im lewaj ñan kom̦ jinõkjeej eo aolep ro rekkwõjarjar rej bõke.
33 Iar jab kajjioñ bõk jelba ko ak gold ko ak nuknuk ko an jabdewõt armej.
34 Kom̦ jel̦ã bwe iar make jerbal kõn peiũ ñan kabwe aikuj ko aõ im aikuj ko an ro rej pãd ippa.
35 Iar kaalikkar ñan kom̦ ilo men otemjej bwe kom̦ij aikuj jipañ ro rem̦õjn̦o̦ ilo ami kate kom̦ im kom̦ij aikuj keememej naan ko an Irooj Jesus, ke ear make ba: ‘El̦apl̦o̦k m̦õn̦õn̦õ ilo lel̦o̦k jãn bõk.’”
36 Ke ej m̦õj an ba men kein, ear bukwelõlõ ippãer aolep im jar.
37 Innem er aolep rar kanooj jañ im rar atbo̦kwõje* Paul im mejenmaiki
38 kõnke rar lukkuun bũrom̦õj kõn an kar ba bwe reban bar lo mejãn. Innem rar etal ippãnl̦o̦k ñan wa eo.
Footnotes
^ Lale “Eijia” ilo Kõmel̦el̦e Ko.
^ Lale “Kwõjkwõjin Bũreet Ejjab Kauwe” ilo Kõmel̦el̦e Ko.
^ Eñin ej raan eo jej n̦aetan Sunday. Ippãn ri-Ju ro, eñin ej raan eo m̦oktata ilowaan juon wiik.
^ Ak “teek.”
^ Kajin Grik, “kõrrãjete pilawã eo.”
^ Lale “Pentekost” ilo Kõmel̦el̦e Ko.
^ Ak “rem̦m̦an ñan kom̦.”
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Ak “ijjab watõk bwe ewõr tokjãn mour e aõ ñan jidik.”
^ Ak “Kien eo an Anij.” Lale “Aelõñ eo an Anij” ilo Kõmel̦el̦e Ko.
^ Ak “aolep karõk.”
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Kajin Grik, “ruj wõt.”
^ Kajin Grik, “buñ ioon kõnwaan.”
