Jerbal 24:1-27
24 L̦alem raan tokãlik, bũrij l̦apl̦ap eo Anenaiõs im jet iaan ri-tõl ro im juon rũkkõnono* etan Tertõlliõs rar itok im kwal̦o̦k kõn abn̦õn̦õ eo aer n̦ae Paul ñan kom̦ja* eo.
2 Ke rar kũri Tertõlliõs, ear jino an n̦aruon Paul ñan Filix im ba:
“Ij kile bwe el̦ap ad mour ilo aenõm̦m̦an kõn wõt kwe, im elõñ oktak ko rej wal̦o̦k ilo aelõñ in ad itok wõt jãn am̦ lol̦o̦kjen̦.
3 Im Filix, Eo Eutiej Tata, aolep iien kõm wõj jãn jikin otemjej kõmij kam̦oole men in im el̦ap am kam̦m̦oolol eok.
4 Bõtab kõnke ijjab kõn̦aan bõk iien kan̦e am̦, ij akwel̦ap bwe kwõn jouj im roñjake kõm jidik.
5 Em̦õj ammim loe bwe l̦ein ej juon ri-kõm̦m̦an poktak,* ej kõm̦m̦an bwe aolep ri-Ju ro ipel̦aakin lal̦ in ren jum̦ae kien, im ej juon ri-tõl ñan kumi en̦ an ri-Nazeret ran̦.
6 Bareinwõt, l̦ein ear kajjioñ in kattoone tampel̦ eo, innem kõmar jibwe.
7 *——
8 Ñe kwõnaaj make etale l̦ein, kwõnaaj loi aolep men kein kõmij n̦aruon kaki.”
9 Innem ri-Ju ro rar kobal̦o̦k ippãn im n̦aruon Paul, rar ba bwe men kein rem̦ool.
10 Ke kom̦ja* eo ear kõkal̦l̦el̦o̦k* kõn bõran ñan Paul bwe en kõnnaan, Paul ear ba:
“El̦ap aõ jel̦ã bwe elõñ iiõ in am̦ juon ri-ekajet ñan aelõñ in. Kõn men in, ipojakin make jojomare ña im̦aan mejam̦.
11 Kwõmaroñ make kam̦oole bwe ejjañin de el̦l̦ãl̦o̦k jãn 12 raan jãn iien eo iar wanlõñl̦o̦k ñan Jerusalem bwe in kabuñ,
12 im rar jab lo aõ akwããl ippãn jabdewõt ilo tampel̦ eo ak kõm̦m̦an poktak ilo im̦õn kabuñ ko im aolepen jikin eo.
13 Bareinwõt, rejjab maroñ kam̦ool ñan kwe kõn men kein rej n̦aruõ kaki kiiõ.
14 Bõtab ij kwal̦o̦k m̦ool ñan kwe bwe ij mour ekkar ñan wãween mour eo an kumi in rej ba kake. Ilo wãween in, ij kabuñ ñan Anij eo an ro jim̦m̦aõ im ij tõmak aolep men ko rej wal̦o̦k ilo Kien eo im men ko ri-Kanaan ro rar jei.
15 Im ewõr aõ kõjatdikdik ilo Anij, ejja kõjatdikdik eo wõt em̦m̦aan rein rej reim̦aanl̦o̦k ñane, bwe enaaj wõr juon iien jerkakpeje ñan ro rewãnõk im ro rejjab wãnõk jim̦or.
16 Eñin unin aolep iien ij kate eõ ñan dãpij wõt an erreo* bõklõkõt e aõ im̦aan mejãn Anij im armej.
17 Bõtab elõñ iiõ tokãlik, iar itok bwe in bõktok m̦weien tũriam̦o ñan aelõñ in aõ im bwe in ajel̦o̦k menin joortak ko aõ.
18 Ke iar kõm̦m̦ani men kein, rar lo eõ ilo tampel̦ eo bõtab em̦õj aõ erreo ekkar ñan m̦antin kabuñ im rar jab ellolo jarlepju ijo ippa ak lo aõ kõm̦m̦an poktak. Bõtab ekar wõr jet ri-Ju jãn jikin ko ilo Eijia*
19 im er eo ren kar pãd ijin im̦aan mejam̦ im liaakewaj ña el̦aññe ewõr jabdewõt aer abn̦õn̦õ n̦ae eõ.
20 Ñe ejjab, kwõn kõtl̦o̦k bwe l̦õm̦arein ijin ren make kwal̦o̦k ta bõd ko rar loi ke iar jutak im̦aan ro uwaan Im̦õn Ekajet eo El̦ap an ri-Ju.*
21 Ilo m̦ool, men eo dein remaroñ n̦aruõ kake ej kõn aõ kar jutak ibwiljier im kõl̦l̦aaj ainikiõ im ba: ‘Unin aer ekajete eõ im̦aami rainin ej kõn wõt jerkakpeje eo an ro remej!’”
22 Ijoke, kõn an Filix jel̦ã m̦ool eo kõn Ial̦ Eo, ear lem̦aanl̦o̦k iien ekajet eo im ear ba: “Ñe Lisiõs, ri-tõlin jarin tarin̦ae eo, enaaj itok, inaaj kõm̦m̦ane pepe eo aõ kõn men kein rejelõt kom̦.”
23 Innem ear jiroñ kapen eo an jarin tarin̦ae eo bwe en kalbuuji wõt Paul bõtab en lel̦o̦k jidik an anemkwõj, im en kõtl̦o̦k an ro m̦õttan jipañe kõn aikuj ko an.
24 Jejjo raan tokãlik, Filix im Drusilla, lio pãleen me ej juon ri-Ju, rar itok. Innem ear ijjilõkl̦o̦k bwe ren bõktok Paul im ear roñjake an kõnnaan kõn tõmak eo kõn Christ Jesus.
25 Bõtab ke Paul ear kõnnaan kõn mour jim̦we im kõn an juon jel̦ã irooj ioon make im kõn iien ekajet eo ej pãd im̦aan, Filix ear jino mijak im ear ba: “Kwõmaroñ etal kiiõ, ak ñe ebar wõr aõ iien inaaj bar kũrtok eok.”
26 Bõtab ilo ejja iien eo wõt, ear l̦õmn̦ak bwe Paul enaaj lel̦o̦k jããn ñane. Kõn men in, ear emmakijkij an kũrtok e im bwebwenato ippãn.
27 Ak ke ear jem̦l̦o̦k ruo iiõ, Porsiõs Festõs ear bõk jikin Filix, im kõnke Filix ear kõn̦aan bwe ri-Ju ro ren m̦õn̦õn̦õ ippãn, ear likũt wõt Paul ilo kalbuuj.
Footnotes
^ Ak “l̦oãr.”
^ Ak “kabna.”
^ Kajin Grik, “juon nañinmej ekapopo.”
^ Meñe ewal̦o̦k eoon in ilo jet ukokin Baibõl̦, bõtab ejjab wal̦o̦k ilo elõñ iaan bok lemlem in etto ko ilo kajin Grik.
^ Ak “kabna.”
^ Ak “jeknõl̦l̦o̦k.”
^ Ak “ejjel̦o̦k n̦otaan.”
^ Lale “Eijia” ilo Kõmel̦el̦e Ko.
^ Kajin Grik, “Sanhedrin.”
