Jerbal 25:1-27
25 Ãlikin an Festõs itok ñan jikin eo* im jino tõl, jilu raan tokãlik ear wanlõñl̦o̦k ñan Jerusalem jãn Seseria.
2 Innem bũrij ro reutiej im em̦m̦aan ro reutiej an ri-Ju ro rar kwal̦o̦k mel̦el̦e ko aer ñane n̦ae Paul. Kõn men in, rar jino akwel̦ap ñan Festõs
3 bwe en katõprak kajjitõk eo aer bwe Paul en itok ñan Jerusalem. Ak ilo m̦ool, rar l̦õmn̦ak in ankõmãjuri Paul im m̦ane ilo ial̦ eo an tok.
4 Bõtab Festõs ear uwaak im ba bwe Paul ej pãdwõt ilo Seseria im bwe m̦õttan wõt jidik enaaj jepl̦aak ñan ippãn Paul.
5 Innem ear ba, “Ri-tõl ro ami ren itok ippatok im kwal̦o̦k abn̦õn̦õ ko aer n̦ae e el̦aññe m̦ool bwe ewõr men en̦ ebõd ear kõm̦m̦ane.”
6 Ãlikin an jol̦o̦k emaroñ ralitõk ak joñoul raan ippãer, ear wanlal̦l̦o̦k ñan Seseria. Innem raan eo tok juon, ear ilo̦k im jijet ilo jea in ekajet eo im ear ba bwe ren bõktok Paul.
7 Ke ear itok, ri-Ju ro me rar wanlal̦tak jãn Jerusalem rar jutak im kaapool̦e, im n̦aruon kõn men ko rel̦l̦ap bõtab ejjel̦o̦k aer kein kam̦ool.
8 Ak Paul ear jojomare make im ba: “Ijjañin kar kõm̦m̦an jabdewõt jerawiwi n̦ae Kien* eo an ri-Ju ro ak n̦ae tampel̦ eo ak n̦ae Sizar.”
9 Kõn an Festõs kõn̦aan bwe ri-Ju ro ren m̦õn̦õn̦õ ippãn, ear ba ñan Paul: “Kokõn̦aan ke wanlõñl̦o̦k ñan Jerusalem im ekajet im̦aõ kõn men kein?”
10 Bõtab Paul ear ba: “Ij jutak ijin im̦aan jea in ekajet in an Sizar, im ijo in ekkar bwe ren ekajet eõ ie. Ejjel̦o̦k men en̦ ebõd iar kõm̦m̦ane n̦ae ri-Ju ro im kwõlukkuun jel̦ã kõn men in.
11 El̦aññe m̦ool ke ña juon armej nana im iar kõm̦m̦ane jabdewõt men ej tõllo̦kũn mej, innem ijjab akwel̦ap bwe in jab mej. Bõtab ñe ejjel̦o̦k pedpedin men kein em̦m̦aan rein rej n̦aruõ kaki, innem ejjel̦o̦k an jabdewõt armej maroñ ñan lel̦o̦k eõ ñan armej rein ekkar ñan aer kõn̦aan. Ij kajjitõk bwe Sizar en ekajet eõ!”
12 Ãlikin an Festõs kõnnaan ippãn ri-kakapilõk ro an, ear ba: “Kwaar kajjitõk bwe Sizar en ekajet eok, kõn men in kwõnaaj ilo̦k ñan ippãn Sizar.”
13 Ke ear mootl̦o̦k jet raan, Kiiñ Agrippa im Bernis rar itok ñan Seseria bwe ren lotok Festõs im yokyokwe.
14 Im kõnke rar pãd ijo ium̦win elõñ raan, Festõs ear kwal̦o̦k ñan kiiñ eo kõn abn̦õn̦õ eo n̦ae Paul, ear ba:
“Ewõr juon em̦m̦aan Filix ear likũti wõt ilo kalbuuj,
15 im ke iar pãd ilo Jerusalem, bũrij ro reutiej im ri-tõl ro an ri-Ju ro rar kwal̦o̦k mel̦el̦e ko kõn e, im rar kajjitõk bwe in kajeiki.
16 Bõtab iar ba ñan er bwe ekkar ñan kien eo an ri-Rom, ijjab maroñ liaakel̦o̦k jabdewõt armej ekkar ñan kõn̦aan ko aer. Armej eo ej aikuj m̦okta jelm̦ae ro rej liaakel̦o̦ke, im ej aikuj wõr iien an kõnono ñan jojomare make kõn men eo rej n̦aruon kake.
17 Kõn men in, ke rar tõpartok ijin iar jab bar pãd ak iar ilo̦k im jijet ilo jea in ekajet en̦ raan eo tok juon, im iar ba bwe ren bõktok em̦m̦aan eo.
18 Ro rar liaakel̦o̦k rar jutak im jino kõnono, bõtab rar jab n̦aruon kõn jabdewõt iaan men ko renana iar l̦õmn̦ak bwe ear kõm̦m̦ani.
19 Men eo wõt rar akwããl ippãn kake ej ikijjeen anij eo rej kabuñ ñane* im kõn juon em̦m̦aan etan Jesus, eo emej ak Paul el̦akkar ba bwe emour.
20 Im kõn aõ jaje ta eo in kõm̦m̦ane ñan kõm̦adm̦õde poktak in, iar kajjitõk ekõn̦aan ke ilo̦k ñan Jerusalem bwe ren ekajete kõn men kein.
21 Bõtab ke Paul ear kajjitõk bwe en pãdwõt ilo kalbuuj im kõttare pepe eo an Irooj L̦apl̦ap en̦, iar ba bwe ren likũti wõt ijo m̦ae iien inaaj jilkinl̦o̦k ñan ippãn Sizar.”
22 Innem Agrippa ear ba ñan Festõs: “Ikõn̦aan roñjake an em̦m̦aan n̦e kõnnaan.” Im eba, “Ilju kwõnaaj roñjake.”
23 Kõn men in, raan eo tok juon Agrippa im Bernis rar itok ilo aer utiej im kõn aiboojoj el̦ap, im erro kab ri-tõlin jarin tarin̦ae ro im em̦m̦aan ro reutiej ilo jikin eo rar del̦o̦ñl̦o̦k ilowaan jikin ekajet eo, im Festõs ear ba bwe ren kadel̦o̦ñtok Paul.
24 Im Festõs ear ba: “Kiiñ Agrippa im kom̦ aolep ijin, l̦ein kom̦ij loe ej l̦eo aolep ri-Ju ro rar kajjitõk kake ippa ilo Jerusalem im ilo ijin, im rar lam̦õj im ba bwe ejjab aikuj mour m̦aanl̦o̦k wõt.
25 Bõtab iar lo bwe ejjel̦o̦k men en̦ ear kõm̦m̦ane bwe en aikuj mej. Kõn men in, ke ear kajjitõk bwe en jãdel̦o̦k im̦aan Irooj L̦apl̦ap en̦, iar pepe in jilkinl̦o̦k ñan ippãn.
26 Bõtab ejjel̦o̦k men en̦ imaroñ jejel̦o̦k kake ñan Irooj en̦ aõ kõn em̦m̦aan in. Kõn men in, iar bõktok bwe en jutak im̦aami wõj aolep, im el̦aptata ñan kwe Kiiñ Agrippa kõnke ãlikin iien ekajet in en wõr men en̦ imaroñ jejel̦o̦k kake.
27 Unin ej kõnke ejjab jim̦we ñan aõ jilkinl̦o̦k juon ri-kalbuuj ak ijjab kaalikkar ta ruõn.”
Footnotes
^ Mel̦el̦ein, Judia. Seseria ej jikin eo kom̦ja eo ej jokwe ie.
^ Ej jitõñl̦o̦k ñan Kien Moses.
^ Ak “ikijjeen kabuñ eo aer make.”
