Jerbal 26:1-32
26 Agrippa ear ba ñan Paul: “Ij kamãlim eok bwe kwõn wõnm̦aanl̦o̦k wõt im kõnono ikijjeem̦.” Innem Paul ear erl̦o̦ke pein im jino an jojomare make im ba:
2 “Kiiñ Agrippa, el̦ap aõ m̦õn̦õn̦õ bwe ij jojomar eõ make im̦aam̦ rainin ikijjeen aolep men kein ri-Ju ro rej n̦aruõ kaki,
3 el̦aptata ke el̦ap am̦ tijem̦l̦o̦k ilo m̦anit im aitwerõk ko an ri-Ju. Kõn men in, ij akwel̦ap bwe kwõn kijenmej im roñjake eõ.
4 “Ilo m̦ool, wãween aõ kar mour m̦aantak jãn ke iar jo̦dikdik ibwiljin armej ro aõ* im ilo Jerusalem ebuñbuñ ippãn aolep ri-Ju ro
5 rar jel̦ã kajjieõ jãn kar m̦okta. Im ñe rekõn̦aan, remaroñ kwal̦o̦k ñan kwe bwe ikõn mour ãinwõt juon Parisi, im ãinwõt am̦ jel̦ã, kumi eo in ej make wõt pentata kien ko aer ilo kabuñ in ad.
6 Ak kiiõ ij jutak ilo jikin ekajet in kõn wõt aõ likũt aõ kõjatdikdik ilo kallim̦ur eo an Anij ñan ro jim̦m̦aad.
7 Ejja kallim̦ur eo wõt in bwij ko ad 12 rar lukkuun kate er im jerbal ñan Anij raan im boñ bwe ren loe an jejjet kũtien. O Kiiñ, ri-Ju rein rej liaakel̦o̦k ña kõn wõt kõjatdikdik in.
8 “Etke kom̦ij l̦õmn̦ak* bwe Anij ejjab maroñ kõjerkak ro remej?
9 Ãindein kar ña, iar lukkuun tõmak bwe ij aikuj kõm̦m̦ane jabdewõt men ñan jum̦ae ãt eo etan Jesus ri-Nazeret.
10 Iar kõm̦m̦ane men in ilo Jerusalem, im iar likũt elõñ iaan ro rekkwõjarjar ilo kalbuuj kõnke ekar wõr aõ mãlim jãn bũrij ro reutiej. Innem ke rar l̦õmn̦ak in m̦an er, iar rejetake pepe in.
11 Ear ikkutkut aõ kajeik er ilo im̦õn kabuñ ko kõnke iar kajjioñ iuun er bwe ren ilo̦k jãn tõmak eo aer. Im kõn aõ kar lukkuun illu ippãer, iar bar etal ñan jikin ko jet im kaeñtaan er.
12 “Ke iar kõm̦m̦ane men in, iar etal ñan Damaskõs kõn maroñ im mãlim jãn bũrij ro reutiej.
13 Im O Kiiñ, ilo ial̦ eo aõ l̦o̦k ke ear raelep, ear wal̦o̦k juon meram jãn lañ im emeraml̦o̦k jãn al̦, im ear rome aolepen pel̦aakũ im ipel̦aakin ro rar itok ippatok.
14 Innem ke kõm aolep kar buñ ioon bwidej, iar roñ an juon ainikien kõnnaan ñan ña ilo kajin Hibru im ba: ‘Saul, Saul, etke kwõj kaeñtaan eõ? Kwõj ko̦kkure eok make ilo am̦ jujuuri al̦al̦ eo ekkañ.’*
15 Bõtab iar ba: ‘Irooj, wõn kwe?’ Im Irooj ear ba: ‘Ña Jesus, eo kwõj kaeñtaane.
16 Bõtab kwõn jerkak im jutak. Eñin unin aõ wal̦o̦ktok ñan kwe, bwe in kããlõt eok bwe kwõn karejera im kwõn kwal̦o̦k kõn men ko em̦õj am̦ loi im men ko inaaj kõm̦m̦an bwe kwõn loi tokãlik.
17 Inaaj lo̦mo̦o̦ren eok jãn armej rein im jãn ri-aelõñ ko, ro ij jilkinl̦o̦k eok ñan ippãer
18 bwe kwõn kõpel̦l̦o̦k mejãer, im ukot er jãn marok ñan meram im jãn ium̦win maroñ eo an Setan ñan maroñ eo an Anij, bwe en maroñ jol̦o̦k jerawiwi ko aer im ren bõk aer jolõt ibwiljin armej ro rekkwõjarjar kõn aer likũt aer tõmak ilo ña.’
19 “Kõn men in, Kiiñ Agrippa, iar jab kõjekdo̦o̦ne pijen in jãn lañ,
20 bõtab iar etal m̦oktata ñan ippãn ro ilo Damaskõs innem etal wõt ñan ippãn ro ilo Jerusalem im aolep jikin ko ilo Judia, im bareinwõt ñan ippãn ri-aelõñ ko. Iar etal im bõkl̦o̦k ennaan eo bwe rej aikuj ukel̦o̦k im oktak ñan Anij ilo aer kaalikkar ilo kõm̦m̦an ko aer bwe rej ukel̦o̦k.
21 Eñin unin ri-Ju ro rar jibwe ña ilo tampel̦ eo im kajjioñ in m̦an eõ.
22 Meñe ãindein ak kõn wõt jipañ eo jãn Anij, ij wõnm̦aanl̦o̦k wõt ñan rainin im kwal̦o̦k ñan ro reutiej im ro rettã, im ejjel̦o̦k men en̦ ij kõnono kake ijello̦kun wõt men eo ri-Kanaan ro im Moses rar ba bwe enaaj wal̦o̦k—
23 eñin bwe Christ enaaj kar eñtaan, innem kõnke e eo m̦oktata enaaj jerkakpeje, enaaj kwal̦o̦k meram eo ñan armej rein im ñan ri-aelõñ ko.”
24 Ke Paul ear jojomare make im ba naan kein, Festõs ear kõl̦l̦aaj ainikien im ba: “Korowãlo̦k Paul! Ejino jorrããn kõmãlij n̦e am̦ kõn an l̦e jãn joñan am̦ katak!”
25 Bõtab Paul ear ba: “Festõs, Eo Eutiej Tata, kõmãlij e aõ ejjab jorrããn, naan ko ij kwal̦o̦ki rejim̦we im rem̦ool.
26 Ilo m̦ool, kiiñ in ij kõnono ñane ilo anemkwõj ekanooj jel̦ã kõn men kein, im ij lukkuun tõmak bwe ejjel̦o̦k juon iaan men kein ejaje kaki, kõnke kar jab kõm̦m̦ane jabdewõt iaaer ilo ittino.*
27 Kiiñ Agrippa, kwõj ke tõmak ri-Kanaan ro? Ijel̦ã bwe kwõj tõmak.”
28 Bõtab Agrippa ear ba ñan Paul: “Ium̦win jidik wõt iien ak kwõmaroñ ukot ña bwe in erom Kũrjin.”
29 Innem Paul ear ba: “Ij jar ñan Anij bwe jekdo̦o̦n ñe enaaj m̦õkaj ak enaaj to, kwe im aolep ro rej roñjake eõ rainin ren ãinwõt ña, men eo dein ren jab lukwõj kom̦ kõn jeen.”
30 Innem kiiñ eo ear jutak, im kom̦ja* eo im Bernis im em̦m̦aan ro rar jijet ippãer rar bar jutak.
31 Bõtab ke rej diwõjl̦o̦k, rar kõnnaan ñan doon im ba: “Ejjel̦o̦k men en̦ em̦m̦aan en̦ ear kõm̦m̦ane bwe en tõllo̦kũn ñan mej ak pãd ilo kalbuuj.”
32 Im Agrippa ear ba ñan Festõs: “Em̦m̦aan en̦ emaroñ kar rõl̦o̦k el̦aññe ear jab kajjitõk an etal ñan ippãn Sizar.”
Footnotes
^ Ak “ri-aelõñ eo aõ.”
^ Kajin Grik, “ekajet.”
^ Juon al̦al̦ ekkañ im rej kõjerbale ñan kipel menninmour ko.
^ Kajin Grik, “ilo juon kona.”
^ Ak “kabna.”
