Jerbal 27:1-44
27 Ãlikin aer kõm̦m̦ane pepe eo bwe kõmin jerakl̦o̦k ñan Itali, rar lel̦o̦k Paul im bar jet ri-kalbuuj ñan juon kapen in jarin tarin̦ae etan Juliõs, im ej jãn kumi in rũttarin̦ae ro an Augõstõs.
2 Kõmar uwe ilo juon wa jãn Adramitiõm eo ej pojakin jerak iturinl̦o̦k jikin ko ilo Eijia,* innem kõmar jerak. Aristarkõs, juon ri-Masedonia jãn Tessalonika ear pãd ippem.
3 Raan eo tok juon kõmar pol̦o̦k ilo Saidon, im Juliõs ear kanooj jouj ñan Paul im ear kõtl̦o̦k an etal ippãn ro m̦õttan bwe ren lale.
4 Innem kõmar jerak jãn ijo, bõtab kõn an kar l̦ap kõto, kõmar etal iturinl̦o̦k Saiprõs bwe kõmin penjak jãn kõto eo.
5 Im kõmar kijoone lom̦al̦o eo im etal imetoonl̦o̦k Silisia im Pampilia im bõjrakl̦o̦k ilo Maira, juon jikin ilo Lisia.
6 Ke kõmar pãd ijin, kapen in jarin tarin̦ae eo ear lo juon wa jãn Alexandria ej jibadekl̦o̦k Itali, im ear kauwe kõm ilo wa eo.
7 Ãlikin an lukkuun pen im rum̦wij am jerakrõk ium̦win elõñ raan, kõmar tõparl̦o̦k Naidõs. Innem kõnke kõto eo eitok im̦aan, kõmar jerak iturinl̦o̦k Salmone, eo ej pãd ilo Krit, bwe kõmin jãlitak jãn kõto eo.
8 Kõmar ejjerakrõk iturin wõt ãne ak ebwe an kar pen, innem kõmar pol̦o̦k ilo juon jikin etan L̦am Em̦m̦an,* juon jikin epaake Lasia.
9 Joñan an to ammim kar pãd ijo, emootl̦o̦k iien jitlo̦k eo ilo Raanin Kõllaajrak* eo im kiiõ ekauwõtata ñan ejjerakrõk. Kõn men in, Paul ear kwal̦o̦k an l̦õmn̦ak
10 ñan er im ba: “L̦õm̦a, ial̦ in ad ekauwõtata im enaaj bõktok el̦ap jorrããn, ejjab ñan m̦weiuk kein im wa in wõt ak bareinwõt ñan mour kein ad.”
11 Bõtab kapen in jarin tarin̦ae eo ear roñjake kapen eo an wa eo im armej eo waan wa eo ijello̦kun an kar roñjake ta eo Paul ear ba.
12 Kõnke jikin po eo ear jab juon jikin em̦m̦an pãd ie ilo iien añõneañ, enañin aolep rar ba bwe kõmin jerakl̦o̦k jãn ijo im kajjioñ kõttõparl̦o̦k Pinix bwe kõmin kõl̦o̦k iien añõneañ eo ie. Pinix ej juon jikin po ilo Krit im ej jitniñeañl̦o̦k im rõkeañl̦o̦k.
13 Ke juon kõto jidikdik ear jino itok jãn rõk, rar l̦õmn̦ak bwe ejejjet pepe eo aer, im rar kotak añkõ eo im jerakl̦o̦k wõt iturin parijetin Krit.
14 Ak ejjabto, ear itok juon kõto el̦ap etan Eurakwilo.*
15 Kõn an wa eo bane kõto eo im kõnke bõran wa eo ear jab maroñ jitõñl̦o̦k kõto eo, kõmar kõtl̦o̦k bwe en pel̦o̦k.
16 Innem wa eo ear etal iturinl̦o̦k juon ãne jidikdik etan Kauda im kõmar penjak jãn kõto eo, bõtab kõmar aikuj kate kõm ñan kapene booj* eo ej pãd il̦okwan wa eo bwe en jab jorrããn.
17 Ãlikin aer kar ektake n̦a ioon wa eo, rar jino aer lukwõje aolepen wa eo kõn to ko rel̦l̦ap bwe en pen. Rar ekkõl ñe renaaj ãr ilo Sirtis,* kõn men in rar jel̦ate to in wũjl̦ã eo im kõtl̦o̦k bwe wa eo en pel̦o̦k.
18 Kõnke l̦añ eo ear iuunto iuuntak wa eo, raan eo tok juon rar jino ejjol̦o̦k m̦weiuk ñan kõmeraikl̦o̦k wa eo.
19 Innem ilo raan eo kein kajilu, rar bõk jet iaan to ko an wa eo im julo̦ki.
20 Kõn ammim kar jab lo al̦ ak ellolo iju ium̦win elõñ raan im kõn an kar l̦ap ammim eñtaan kõn wõt an kajoor* l̦añ eo, ear jino jako am kõjatdikdik bwe kõm naaj mour.
21 Ãlikin aer kar jab m̦õñã ium̦win juon iien aetok, Paul ear jutak iol̦apeer im ba: “L̦õm̦a, ñe kom̦win kar roñjake naanin kakapilõk eo aõ im jab jerak jãn Krit, jeban kar pãd ilo kauwõtata im iioon jorrããn in.
22 Meñe ãindein ak kiiõ ij jiroñ kom̦ bwe kom̦win peran, bwe ejjel̦o̦k juon iaami enaaj jako, wa in wõt.
23 Ke ear boñ, juon enjel̦ an Anij eo ij kabuñ ñane im jerbal ñane ear jutak iturũ
24 im ba: ‘Paul kwõn jab mijak, kwõj aikuj jutak im̦aan Sizar. Anij enaaj lo̦mo̦o̦ren aolep ro rej ejjerakrõk ippam̦.’
25 Kõn men in, em̦m̦aan ran̦ kom̦win peran, kõnke ij tõmak bwe Anij enaaj kajejjet men ko kar jiroñ eõ kaki.
26 Bõtab jej aikuj ãr ilo juon ãne.”
27 Ilo boñõn eo kein kajoñoul emãn ke l̦añ eo el̦akkar iuunto iuuntak kõm ilo Lom̦al̦o in Edria, ilo lukwõl̦pãnl̦o̦k boñõn eo, rijjerakrõk ro rar l̦õmn̦ak bwe kõm epaakel̦o̦k ãne.
28 Kõn men in, rar joñe ijo im lo bwe m̦wilal̦in ej enañin 120 ne,* innem rar wõnm̦aanl̦o̦k jidik im rar bar joñe im lo bwe m̦wilal̦in ej enañin 90 ne.*
29 Kõn aer ekkõl ñe kõm itaak ilo dekã, rar doorlal̦l̦o̦k emãn añkõ jãn il̦okwan wa eo im rar kijoorore an raan.
30 Bõtab ke rijjerakrõk ro rar kajjioñ in itõn ko jãn wa eo im rar lelal̦l̦o̦k booj eo ñan lo̦jet bwe en ãinwõt ñe rar itõn doorlal̦l̦o̦k añkõ ko jãn im̦aan wa eo,
31 Paul ear ba ñan kapen in jarin tarin̦ae eo im rũttarin̦ae ro: “El̦aññe l̦õm̦arein rejjab pãdwõt ioon wa in, kom̦ ban mour.”
32 Innem rũttarin̦ae ro rar jeke to in booj eo im ko̦wõtlo̦ke.
33 Ke ear epaak an raan, Paul ear rõjañ er aolep bwe ren m̦õñã, ear ba: “Rainin ej raan eo kein kajoñoul emãn in ami kijooror im kõttar, im kom̦ij jañin m̦õñã ñan jidik.
34 Innem ij rõjañ kom̦ bwe kom̦win m̦õñã kõnke men in enaaj jipañ kom̦, bwe ejjel̦o̦k juon kool̦an bõran jabdewõt iaami enaaj jako.”
35 Ãlikin an ba men in, ear bõk juon pilawã im kam̦m̦oolol Anij im̦aan mejãer aolep, innem ear kõrrãjete im jino m̦õñã.
36 Innem rar aolep peran, im rar ebbõk kijeer im m̦õñã.
37 Oram wõj aolep ioon wa eo ej 276.
38 Ãlikin aer m̦õñã im mat, rar jol̦o̦k wiit ko ñan lo̦jet bwe ren kõmeraikl̦o̦k wa eo.
39 Ke ear raan, rar jaje ãne ta eo, bõtab rar lo juon l̦am ebokboke, im rar kõn̦aan ãre wa eo ijo ñe remaroñ.
40 Kõn men in, rar jek to in añkõ ko im ko̦wõtlo̦ki n̦a ilo̦jet, im ejja ilo iien eo wõt rar mejal̦i to in jebwe ko, im ãlikin aer lelõñl̦o̦k wũjl̦ã eo im̦aan bwe en bo̦ur kõto eo, rar kaiokl̦o̦k ijo ebokboke.
41 Bõtab ke rar itaak ioon bok* ilo juon jikin me n̦o ko rej itaak ippãn doon ie, ear ãr wa eo im bõran ear jab maroñ m̦akũtkũt, ak l̦okwan wa eo ear jino rup ñan elõñ m̦õttan kõn wõt an n̦o ko buñuti.
42 Kõn men in, rũttarin̦ae ro rar pepe in m̦ane ri-kalbuuj ro bwe ejjel̦o̦k en maroñ aõ im ko.
43 Bõtab kapen in jarin tarin̦ae eo ear bõbraik er jãn aer kõm̦m̦ane pepe eo aer kõnke ear kõn̦aan kõjparok Paul. Innem ear jiroñ ro rejel̦ã aõ bwe ren kãlo̦k ñan lo̦jet im aõ ãnel̦o̦k m̦okta,
44 im ro jet ren l̦oor er ãnel̦o̦k, jet ren kõjerbal rã ko im ro jet ren kõjerbal m̦õttan al̦al̦ ko jãn wa eo. Ilo wãween in, aolep rar maroñ tõpar ãne im ejjel̦o̦k en̦ ear jorrããn.
Footnotes
^ Lale “Eijia” ilo Kõmel̦el̦e Ko.
^ Etan juon jikin po an wa.
^ Ej allõñ in Tishri, mel̦el̦ein allõñ in Jeptõm̦ba/Oktoba, allõñ ko im ej jino nana lañ im lo̦jet.
^ Mel̦el̦ein, jokl̦ã ak kõto jãn eañ.
^ Juon wa jidikdik ekkã aer kõjerbale ñan lo̦mo̦o̦ren armej.
^ Lale “Sirtis” ilo Kõmel̦el̦e Ko.
^ Kajin Grik, “jab dik.”
^ Ak “20 fathom.”
^ Ak “15 fathom.”
^ Ak “kõppããt.”
