Jerbal 4:1-37
4 Erro ej kõnnaan wõt ñan armej ro ak ejãdetok bũrij ro im eo ej bõk eddon tampel̦ eo, kab Saddusi* ro ñan ippãer.
2 Rar illu kõn an rijjilõk ro katakin armej ro im kwal̦o̦k bwe Jesus ear jerkakpeje.
3 Kõn men in, rar jibwe erro im bõk er bwe ren kalbuuj m̦ae raan eo juon, kõnke em̦õj an jota kadede.
4 Bõtab, elõñ iaan armej ro me rar roñjake men ko erro kar ba rar tõmak, im ear lõñl̦o̦k oran em̦m̦aan ro rej tõmak ñan enañin 5,000.
5 Raan eo tok juon, ri-tõl ro an ri-Ju ro im skraib* ro rar kweilo̦k ippãn doon ilo Jerusalem,
6 ear bar pãd bũrij eo eutiej Annas, im Keiapas, Jon, Alexander, im ro jet jãn baam̦le eo an bũrij eo eutiej.
7 Rar kajutak Piter im Jon iol̦apeer im rar jino kajitũkin erro im ba: “Wõn n̦e ear lewaj maroñ ak ilo etan wõn kom̦ij kõm̦m̦ane men in?”
8 Piter ear obrak kõn jetõb kwõjarjar,* innem ear ba ñan er:
“Kom̦ ro rej tõl,
9 el̦aññe kom̦ij kajitũkin kõm̦ro rainin kõn men eo em̦m̦an ear wal̦o̦k ñan juon eo ejaje etetal im kom̦ kõn̦aan jel̦ã wõn eo ear kõmouri,
10 eokwe kom̦ im aolep armej in Israel, kom̦win jel̦ã bwe unin an em̦m̦aan in jutak ijin im̦aan mejãmi im em̦m̦an an mour ej kõn wõt etan Jesus Christ ri-Nazeret, eo kom̦ar dilaiki ilo jurõn al̦al̦ bõtab Anij ear kõjerkake jãn mej.
11 Eñin ej ‘dekã eo kom̦ rũkkal ro kom̦ar kõjekdo̦o̦ne im em̦õj an oktak im erom dekã eo eaorõktata.’
12 Bareinwõt, ejjel̦o̦k bar juon en̦ emaroñ lo̦mo̦o̦ren kõj kõnke ejjel̦o̦k bar juon ãt ium̦win lañ Anij ear lel̦o̦k ñan armej bwe jen maroñ bõk lo̦mo̦o̦r jãne.”
13 Ri-tõl ro rar lukkuun bwilõñ ke rar lo an Piter im Jon kõnono ilo peran im ke rar kile bwe l̦õm̦arein rej jet ro rettã im ejjab l̦ap jel̦ãl̦o̦kjen̦ ippãer.* Innem rej kab jino kile bwe erro kõn pãd ippãn Jesus.
14 Ak ke rej reilo̦k im lo an em̦m̦aan eo em̦õj kõmouri jutak ippãerro, ejjel̦o̦k men en̦ remaroñ ba.
15 Kõn men in, rar jiroñ er bwe ren diwõj jãn Im̦õn Ekajet eo El̦ap,* innem rar jino aer pepe ippãn doon
16 im ba: “Jenaaj ta kõn l̦õm̦arein? Em̦ool bwe rar kõm̦m̦ane juon menin kabwilõñlõñ im aolep armej in Jerusalem rejel̦ã kake, im jejjab maroñ kariabe men in.
17 Ijoke, bwe en jab ajeededl̦o̦k wõt ennaan in ñan aolep armej, jen kaamijak er im jiroñ er bwe ren jab bar kõnnaan ñan jabdewõt armej kõn ãt in.”
18 Kõn men in, rar kũrtok er im jiroñ er bwe ren jab bar ba jabdewõt men ñan jidik ak katakin armej ro ilo etan Jesus.
19 Bõtab, Piter im Jon rar ba ñan er: “Kun̦aami make lale ewi wõt in ejim̦we im̦aan mejãn Anij, bwe kõmin pokake kom̦ ke ak pokake Anij.
20 Ak kõm, kõmij jab maroñ bõjrak jãn am kõnono kõn men ko kõmar loi im roñ.”
21 Kõn men in, ãlikin aer kar bar kajjioñ kaamijak er, rar karõl̦o̦k erro kõnke ejjel̦o̦k pedpedin aer kaje erro. Bareinwõt, rar mijak armej ro kõnke er aolep rar nõbar Anij kõn wõt men eo ear wal̦o̦k.
22 Em̦m̦aan eo rar kõmouri ilo kabwilõñlõñ ej 40 jim̦a an iiõ.
23 Ãlikin aer karõl̦o̦k erro, rar ilo̦k ñan ippãn rũttõmak ro m̦õttaer im kwal̦o̦k ta ko bũrij ro reutiej im ri-tõl ro rar ba ñan erro.
24 Ke rar roñ kõn men kein, rar kõl̦l̦aaj ainikieer im jar ippãn doon im ba:
“Irooj Bõtata, Kwe eo kwaar kõm̦anm̦an lañ im lal̦ im lo̦jet im aolep men ko ie,*
25 im kwaar kõjerbal jetõb kwõjarjar* ñan kõm̦akũt jim̦m̦aam Devid, eo karejeram̦, bwe en ba: ‘Etke ri-aelõñ ko rej illu im armej ro rej kõl̦mãnl̦o̦kjen̦ kõn men ko ejjel̦o̦k tokjãer?
26 Kiiñ ro an lal̦ in repojak im ri-tõl ro rar koba ippãn doon bwe ren juon wõt ñan aer jum̦aik Jeova* im eo ear kapiti.’*
27 Men kein rar wal̦o̦k ke Herod im Pontiõs Pail̦at, ekoba armej in aelõñ ko im armej in Israel rar kweilo̦k ippãn doon ilo jikin in ñan jum̦ae Jesus, ri-karejar eo am̦ eokkwõjarjar, eo kwaar kapiti.*
28 Rar kõm̦m̦ane men eo kwaar karõkl̦o̦k im̦aan bwe en wal̦o̦k ikijjeen kajoor eo am̦* im ankilaam̦.
29 Im kiiõ Jeova,* kwõn roñjake naanin kaamijak kein aer im kwõn jipañ kõm ro karejeram̦ bwe kõmin wõnm̦aanl̦o̦k wõt im kõnnaan kõn naan eo am̦ ilo peran.
30 Kwõn wõnm̦aanl̦o̦k wõt im erl̦o̦ke peim̦ ñan kõmour ro renañinmej, kõm̦m̦an menin kabwilõñlõñ ko im kõkal̦l̦e ko ilo etan Jesus, ri-karejar eo am̦ eokkwõjarjar.”
31 Ke ear m̦õj aer jar im akwel̦ap, ear em̦m̦akũtkũt ijo rar kweilo̦k ippãn doon ie, im er aolep rar obrak kõn jetõb kwõjarjar,* innem rar kõnono kõn naanin Anij ilo peran.
32 Bareinwõt, aolep rũttõmak ro rar juon wõt ilo bõro im ilo l̦õmn̦ak, im ejjel̦o̦k juon iaaer ear l̦õmn̦ak bwe men ko m̦weien rej an wõt, bõtab rar ajeji men ko m̦weieer ñan doon.
33 Ear lukkuun jejjet wãween an rijjilõk ro wõnm̦aanl̦o̦k wõt im kwal̦o̦k kõn jerkakpeje eo an Irooj Jesus, im jouj eo el̦ap an Anij ear pãd ippãer aolep.
34 Ilo m̦ool, ejjel̦o̦k juon iaaer ear pãd ilo aikuj kõnke aolep ro ewõr aer bwidej ak ewõr m̦weer rar wiakaki im bõktok tõprak ko aer
35 ñan ippãn rijjilõk ro. Innem rijjilõk ro rar ajeji ñan kajjojo armej, ekkar ñan joñan eo juon ej aikuji.
36 Innem Josep, juon em̦m̦aan in Saiprõs jãn bwijjin Livai, eo rijjilõk ro rar n̦aetan Barnebas (mel̦el̦ein ãt in ñe jej ukote ej, “Nejin Kaenõm̦m̦an”),
37 ear wiakake bwidej eo an im bõktok jããn eo ñan ippãn rijjilõk ro.
Footnotes
^ Lale “Saddusi” ilo Kõmel̦el̦e Ko.
^ Lale “Skraib” ilo Kõmel̦el̦e Ko.
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Mel̦el̦ein, rar jab pãd ilo jikuul̦in kabuñ ko. Ejjab mel̦el̦ein bwe rejaje riit im jeje.
^ Kajin Grik, “Sanhedrin.”
^ Ak “ilowaaer.”
^ Ak “kajoor eo am̦.” Lale “Jetõb kwõjarjar” ilo Kõmel̦el̦e Ko.
^ Lale “Jeova” ilo Kõmel̦el̦e Ko.
^ Ak “Christ.”
^ Ak “kããlõte.”
^ Kajin Grik, “peim̦.”
^ Lale “Jeova” ilo Kõmel̦el̦e Ko.
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
