Jerbal 8:1-40
8 Saul ear rejetake an armej ro m̦ane Stipen.
Jino jãn kar raan eo, el̦ap aer kar kaeñtaan eklejia eo ilo Jerusalem. Aolep rũttõmak ro rar ejjeplõklõk ñan jikin ko ilo Judia im Sameria, ijello̦kun wõt rijjilõk ro.
2 Jet em̦m̦aan retiljek rar bõk Stipen im kalibwini, im rar kanooj jañũti.
3 Ilo tõre in, Saul ear jino ko̦kkure eklejia eo. Ekõn ilo̦k jãn em̦ ñan em̦ im iper nabõjtak rũttõmak ro, em̦m̦aan im kõrã jim̦or, im bõkl̦o̦k er ñan kalbuuj.
4 Bõtab ro rar ejjeplõklõk rar deblo̦ke ãneo im kwal̦o̦k kõn ennaan eo em̦m̦an kõn naanin Anij.
5 Innem Pilip ear etal ñan Sameria* im jino kwal̦o̦k ñan armej ro ie kõn Christ.
6 Jarlepju in armej ro rar lukkuun roñjake Pilip, rar roñjake im lale an kõm̦m̦ani menin bwilõñ* ko.
7 Jetõb ko rettoon rar mo̦k n̦a ippãn elõñ iaan armej ro, im jetõb kein rar lam̦õj kõn juon ainikien el̦ap ke rar diwõjl̦o̦k jãn armej rein. Bareinwõt, elõñ ro rar jaje m̦akũtkũt im ro rar jaje etetal rar mour jãn nañinmej kein aer.
8 Kõn men in, ekar l̦ap lañlõñ ilo jikin in.
9 Ekar wõr juon em̦m̦aan ijin etan Saimõn, eo ekõn jel̦ã jibaiin im kabwilõñ armej in Sameria. L̦ein ekõn ba bwe e juon eo el̦ap maroñ ippãn.
10 Aolep armej ro, jãn eo ettãtata ñan eo eutiejtata, rekõn roñjake l̦ein im ba: “Em̦m̦aan in ej Kajoor eo an Anij, Kajoor eo El̦ap.”
11 Kõn men in, rekõn roñjake e kõnke eto an kõn kabwilõñ er kõn jerbalin jibaiin ko an.
12 Ke Pilip ear kwal̦o̦k kõn ennaan eo em̦m̦an kõn Aelõñ eo an Anij* im kõn etan Jesus Christ ñan er, rar tõmake im peptaij, em̦m̦aan im kõrã jim̦or.
13 Saimõn ear bar oktak im juon rũttõmak, innem ãlikin an kar peptaij, ear keini an pãd ippãn Pilip im ear kanooj bwilõñ ke ej lo kõkal̦l̦e ko im menin kabwilõñlõñ ko Pilip ear kõm̦m̦ani.
14 Ke rijjilõk ro ilo Jerusalem rar roñ bwe armej in Sameria rar tõmak naanin Anij, rar jilkinl̦o̦k Piter im Jon ñan ippãer.
15 Im erro kar etal im jar kõn er bwe ren bõk jetõb kwõjarjar*
16 kõnke ejjañin wõr iaaer enañin bõke, ak rar peptaij wõt ilo etan Irooj Jesus.
17 Innem erro kar likũt peier ioer, im armej ro rar jino aer bõk jetõb kwõjarjar.*
18 Ke Saimõn ear lo bwe armej ro rar bõk jetõb kwõjarjar* kõn wõt an rijjilõk ro likũt peier ioer, ear lel̦o̦k jããn ñan erro
19 im ba: “Letok maroñ in ñan ña bwe in maroñ lel̦o̦k jetõb kwõjarjar* ñan jabdewõt eo ij likũt peiũ ioon.”
20 Bõtab Piter ear ba ñane: “Jelba kan̦e am̦ ren jako ñe kwõnaaj jako kõnke kwõj l̦õmn̦ak kwõmaroñ wiaiki menin letok eo ejjel̦o̦k on̦ããn jãn Anij kõn jããn.
21 Ejjel̦o̦k kun̦aam̦ ak am̦ kõj ilo men in, kõnke bũruom̦ ejjab jim̦we im̦aan mejãn Anij.
22 Kõn men in, kwõn ukel̦o̦k jãn men in enana kwõj kõm̦m̦ane, im kwõn akwel̦ap ñan Jeova,* im bõlen enaaj jol̦o̦k am̦ bõd kõn l̦õmn̦ak in enana ilo bũruom̦.
23 Ij kile bwe bũruom̦ eobrak kõn baijin* im kwõj juon ri-kõm̦akoko ñan jerawiwi.”
24 Innem Saimõn ear ba ñan erro: “Jouj im jar im akwel̦ap ñan Jeova* kõn ña bwe men eo komiro kar ba en jab wal̦o̦k ñan ña.”
25 Kõn men in, ãlikin an kar lõt aerro kar kwal̦o̦k naan im kõnnaan kõn naan eo an Jeova,* rar jino jepl̦aak ñan Jerusalem im ilo ial̦ eo aer l̦o̦k, rar kwal̦o̦k kõn ennaan eo em̦m̦an ilo elõñ iaan bukwõn ko an ri-Sameria ro.
26 Bõtab enjel̦ eo an Jeova* ear jiroñl̦o̦k Pilip im ba: “Kwõn jutak im wãrõkeañl̦o̦k ñan ial̦ eo jãn Jerusalem ñan Geza.” (Ial̦ in ej pãd ilo ãne jem̦aden.)
27 Kõn men in, ear jutak im etal im ear lo juon ri-utiej* in Itiopia, juon iaan ri-utiej ro an Kandase, lerooj eo an ri-Itiopia. L̦ein ej lale aolep jããn ko an lerooj in im ear etal ñan Jerusalem bwe en kabuñ,
28 im kiiõ ej jepl̦aak im ej jijet ilo jariot eo waan, im ej kwal̦o̦k ainikien an riiti bok eo an ri-kanaan Aiseia.
29 Innem jetõb kwõjarjar* ear ba ñan Pilip: “Kwõn kepaakel̦o̦k jariot en̦.”
30 Pilip ear ettõr iturinl̦o̦k wa eo im ear roñ ainikien an ri-utiej eo riiti bok eo an ri-kanaan Aiseia, im ear ba: “Kwõmel̦el̦e* ke ta n̦e kwõj riiti?”
31 Ear ba: “Ewi wãween aõ naaj mel̦el̦e ke ejjel̦o̦k en̦ ej jipañ eõ?” Innem ear kajjitõk ippãn Pilip bwe en uwe im jijet ippãn.
32 Eñin ej m̦õttan eo ilo Jeje ko ear riiti: “Rar bõktoke ãinwõt juon jiip eo rej bõkl̦o̦ke bwe ren m̦ane, im ear jab kõpel̦l̦o̦k lo̦ñiin ãinwõt an juon koon in jiip ikõñ im̦aan mejãn eo ej m̦wijbare.
33 Ilo iien eo rar kajooke, rar jab kwal̦o̦k ekajet jim̦we ñane. Kõn aer kar bõk mour eo an jãn lal̦ in, wõn eo enaaj kwal̦o̦k kõn aolepen tipdikin menmenbwij eo an?”
34 Innem ri-utiej eo ear ba ñan Pilip: “Ij akwel̦ap ñan kwe, wõn in ri-kanaan in ej kõnnaan kake? Kõn e make ke ak bar juon em̦m̦aan?”
35 Im ke Pilip ear jino an kõnnaan, ear jino jãn eoon in im ear kwal̦o̦k ñane kõn ennaan eo em̦m̦an kõn Jesus.
36 Ke rar etal wõt ilo ial̦ eo, rar tõparl̦o̦k juon jikin ewõr l̦we ie, im ri-utiej eo ear ba: “Lale m̦õk! Ewõr dãn ijin, ta eo ej bõbraik eõ jãn aõ peptaij?”
37 *——
38 Innem ear kabõjrak jariot eo, im Pilip im ri-utiej eo rar jim̦or to im etal ñan dãn eo, im Pilip ear peptaiji.
39 Ke rar ato jãn dãn eo, jetõb* eo an Jeova* ear m̦õkaj im tõll̦o̦k Pilip jãn ijo, im ri-utiej eo ear jab bar loe, bõtab ke ear ilo̦k ilo ial̦ eo an, ear lukkuun m̦õn̦õn̦õ.
40 Ak kõn Pilip, ear ilo̦k ñan Ashdod, im ear wõnm̦aanl̦o̦k wõt im kwal̦o̦k kõn ennaan eo em̦m̦an ilo aolep jikin ko m̦ae tõre eo ear tõparl̦o̦k Seseria.
Footnotes
^ Ak emaroñ, “juon jikin ilo Sameria.”
^ Kajin Grik, “kõkal̦l̦e.”
^ Ak “Kien eo an Anij.” Lale “Aelõñ eo an Anij” ilo Kõmel̦el̦e Ko.
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Lale “Jeova” ilo Kõmel̦el̦e Ko.
^ Kajin Grik, “kwe juon dãn meo̦.”
^ Lale “Jeova” ilo Kõmel̦el̦e Ko.
^ Lale “Jeova” ilo Kõmel̦el̦e Ko.
^ Lale “Jeova” ilo Kõmel̦el̦e Ko.
^ Kajin Grik, “eunõk.”
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Ak “Kwõjel̦ã.”
^ Meñe ewal̦o̦k eoon in ilo jet ukokin Baibõl̦, bõtab ejjab wal̦o̦k ilo elõñ iaan bok lemlem in etto ko ilo kajin Grik.
^ Ak “kajoor.” Lale “Jetõb kwõjarjar” ilo Kõmel̦el̦e Ko.
^ Lale “Jeova” ilo Kõmel̦el̦e Ko.
