Jon 1:1-51
1 Ilo jinoin, Naan eo ear pãd, im Naan eo ear pãd ippãn Anij, im Naan eo ear juon anij.*
2 Ear pãd ippãn Anij jãn kar jinoin.
3 Anij ear kõjerbale ñan kõm̦anm̦an men otemjej, im el̦aññe en kar jab kõn e, ejjel̦o̦k juon men enaaj kar pãd im wal̦o̦k.
4 Unin an wõr mour ej kõn e, im mour eo an ear ãinwõt meram ñan armej.
5 Innem meram eo ej rome ijo emarok, im marok ejjab maroñ anjo̦ ioon.
6 Ekar wõr juon em̦m̦aan Anij ear jilkintok, im etan in Jon.
7 Jon ear itok ãinwõt juon ri-kam̦ool bwe en kwal̦o̦k kõn meram eo bwe jabdewõt armej en tõmak ikijjeen e.*
8 Ejjab e meram eo, bõtab ekar itok bwe en kwal̦o̦k kõn meram eo.
9 Meram eo em̦ool im ej rome jabdewõt armej ear pojakin itok ñan lal̦ in.*
10 Ekar pãd ilo lal̦ in, im Anij ear kõjerbale bwe en kõm̦anm̦an lal̦ in, bõtab armej ro ilo lal̦ in rar jaje kõn e.
11 Ear itok ñan aelõñ eo an, ak armej ro ie rar jab karwaineneiki.
12 Bõtab ikijjeen ro rar karwaineneiki, ear kõmaroñ er bwe ren erom nejin Anij, kõnke rar kwal̦o̦k aer tõmak ilo etan.
13 Er nejin Anij, ejjab kõn aer kar l̦otaktok jãn armej, ak jãn kõn̦aan eo an jineer im jemãer, bõtab kõnke Anij ear kããlõt er bwe ren nejin.
14 Kõn men in, Naan eo ear erom armej* im ear pãd ibwiljim. Kõmar lo aiboojoj eo an, aiboojoj eo me juon nejin eo ej make wõt ej bõke jãn jemãn, im ear obrak kõn jouj eo el̦ap an Anij im kõn m̦ool.
15 (Jon ear kwal̦o̦k kõn e, ear kõl̦l̦aaj ainikien im ba: “Eñin armej eo iar kõnnaan kake im ba, ‘Eo ej itok ãlikũ em̦õj an el̦l̦ãl̦o̦k jãn ña, kõnke ear mour m̦oktal̦o̦k jãn ña.’”)
16 Kõn an obrak kõn jouj eo el̦ap, jej lo jouj eo an el̦ap ñan kõj jãn iien ñan iien.
17 Anij ear letok Kien eo ikijjeen Moses, bõtab ear letok jouj eo el̦ap im m̦ool eo ikijjeen Jesus Christ.
18 Ejjel̦o̦k armej enañin kar lo Anij jabdewõt iien. Bõtab eo ej pãd iturin Jemãn* me ej make wõt nejin im ej juon anij,* e eo ear kõmel̦el̦e kõn Anij.
19 Eñin men eo Jon ear ba ke ri-Ju ro rar jilkinl̦o̦k bũrij ro im ri-Livai ro jãn Jerusalem bwe ren kajjitõk ippãn im ba: “Wõn kwe?”
20 Ear kwal̦o̦k m̦ool im ba: “Ejjab ña Christ.”
21 Im rar kajjitõk ippãn: “Ak wõn kwe, Ilaija ke?” Im eba: “Ejjab.” “Kwe ri-Kanaan eo kar kanaan kake ke?” Im euwaak im ba: “Ejjab!”
22 Innem rar ba ñane: “Ak wõn kwe? Kwõn kwal̦o̦k ñan kõm bwe kõmin maroñ uwaake ro rar jilkintok kõm. Kwal̦o̦k m̦õk wõn kwe.”
23 Im eba: “Ña ij ainikien armej eo ej lam̦õj jãn ãne jem̦aden im ba, ‘Kajim̦we ial̦ eo an Jeova,’* ãinwõt an kar ri-kanaan Aiseia ba.”
24 Parisi ro rar jilkintok armej rein
25 im rar kajjitõk ippãn im ba: “Ñe ejjab kwe Christ ak Ilaija ak ri-Kanaan eo, innem etke kwõj peptaij armej?”
26 Jon ear uwaake er im ba: “Ij peptaij armej ilo dãn. Bõtab ewõr juon ibwiljimi kom̦ jaje kake,
27 e eo enaaj itok ãlikũ im ijekkar ñan jel̦ate to in juuj eo an.”
28 Men kein rar wal̦o̦k ilo Betani, iturearin Reba Jordan, ijo Jon ear peptaiji armej ro ie.
29 Raan eo tok juon, Jon ear lo an Jesus itok ñan ippãn im ear ba: “Eñin ej L̦aam̦ eo an Anij im ej jol̦o̦k jerawiwi ko an lal̦!
30 Eñin armej eo iar kõnnaan kake im ba: ‘Ewõr juon em̦m̦aan ej itok ãlikũ im em̦õj an el̦l̦ãl̦o̦k jãn ña, kõnke ear mour m̦oktal̦o̦k jãn ña.’
31 Ña bareinwõt iar jab jel̦ã wõn e, bõtab unin aõ peptaij armej ilo dãn ej kõnke ri-Israel ren jel̦ã wõn e.”
32 Jon ear bar kwal̦o̦k im ba: “Iar lo an jetõb kwõjarjar* wanlal̦tak ãinwõt juon m̦ul̦e, im ear pãdwõt ioon.
33 Ikar bar jaje wõn e, bõtab Anij, eo im ear jilkintok eõ bwe in peptaij armej ilo dãn, ear ba ñan ña: ‘Armej eo kwõnaaj lo an jetõb kwõjarjar* eo aõ wanlal̦tak im pãdwõt ioon, eñin ej eo im ej peptaij armej kõn jetõb kwõjarjar* eo aõ.’
34 Em̦õj aõ loe, im iar kwal̦o̦k bwe armej in ej Nejin Anij.”
35 Raan eo tok juon, Jon ear jutak ippãn ruo iaan ri-kal̦oor ro an,
36 im ke ej reilo̦k im lo an Jesus etetal, ear ba: “L̦aam̦ eo an Anij en̦!”
37 Ke ri-kal̦oor ro ruo rar roñ an ba men in, rar l̦oorel̦o̦k Jesus.
38 Innem ke Jesus ear oktakl̦o̦k im lo aerro l̦oore, ear ba: “Ta n̦e komiro ej pukote?” Im rar ba: “Rabbai (mel̦el̦ein naan in ñe jej ukote ej, “ri-Kaki”), kwõj jokwe ia?”
39 Im ear ba ñan er: “Itok im komiro naaj loe.” Innem rar etal im loe ijo ej jokwe ie, im rar pãd ippãn aolepen raan eo. Ilo tõre in, ekar 4 awa jim̦a* ilo jota.
40 Juon iaan l̦õm̦aro ruo me rar roñ men eo Jon ear ba im l̦oore Jesus ej Andru, l̦eo jatin* Saimõn Piter.
41 M̦oktata Andru ear loe Saimõn, l̦eo jein, im ear ba ñane: “Kõmar lo Messaia eo” (mel̦el̦ein naan in ñe jej ukote ej, “Christ”),
42 im ear ãñinl̦o̦ke ñan ippãn Jesus. Ke Jesus ej loe, ear ba ñane: “Kwe Saimõn nejin Jon, naaj n̦aetam̦ Sipas” (mel̦el̦ein ãt in ñe jej ukote ej “Piter”).
43 Raan eo tok juon, Jesus ear kõn̦aan etal ñan Galili. Innem ke ear loe Pilip, ear ba ñane: “Kwõn itok im l̦oor eõ.”*
44 Pilip ej jãn Betseida, bukwõn eo an Andru im Piter.
45 Pilip ear lo Natanael, im ear ba ñane: “Kõmar lo Jesus nejin Josep, jãn Nazeret. E eo Kien eo im naan ko an ri-Kanaan ro rar kõnono kake.”
46 Bõtab Natanael ear ba ñane: “Ta m̦ool ke ewõr men en̦ em̦m̦an emaroñ wal̦o̦ktok jãn Nazeret ke?” Im Pilip eba: “Kwõn itok im kwõnaaj loe.”
47 Jesus ear lo an Natanael itok ñan ippãn im ear ba kõn e: “Lukkuun ri-Israel im ejjel̦o̦k etao ippãn ñan jidik.”
48 Natanael ear ba ñane: “Etke kwõjel̦ã kajjieõ?” Jesus ear uwaake im ba: “Iar lo eok ium̦win wõjke fig en̦ m̦okta jãn an kar Pilip kõnnaan ippam̦.”
49 Natanael ear uwaak im ba: “Rabbai,* kwe Nejin Anij, im kwe Kiiñ in Israel.”
50 Im Jesus ear ba ñane: “Kwõj tõmak eõ kõn wõt aõ kar ba bwe ikar lo eok ium̦win wõjke fig en̦ ke? Kwõnaaj lo men ko rel̦l̦apl̦o̦k jãn men kein.”
51 Im ear bar ba ñane: “Ij ba ñan kom̦ aolep bwe kom̦ naaj lo an lañ pel̦l̦o̦k im an enjel̦ ro an Anij wanlõñl̦o̦k ñan lañ im wanlal̦tak ñan ippãn Nejin armej.”*
Footnotes
^ Ak “ear ãinwõt Anij.”
^ Ej jitõñl̦o̦k ñan Jon.
^ Ak “itok ñan ibwiljin armej ro.”
^ Kajin Grik, “kanniõk.”
^ Kajin Grik, “ej pãd ilo ubõn Jemãn.” Men in ej kwal̦o̦k kõn an aorõk ippãn Jemãn.
^ Ak “nejin eo ej make wõt me Anij make ear kõm̦anm̦ane.”
^ Lale “Jeova” ilo Kõmel̦el̦e Ko.
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Ak “kajoor.” Lale “Jetõb kwõjarjar” ilo Kõmel̦el̦e Ko.
^ Ak “kajoor.” Lale “Jetõb kwõjarjar” ilo Kõmel̦el̦e Ko.
^ Kajin Grik, “enañin awa eo kein kajoñoul.”
^ Ilo kajin Grik ejjab alikkar wõn eo erũtto iaan Saimõn im Andru.
^ Ak “Ri-Kaki.”
^ Lale “Nejin armej” ilo Kõmel̦el̦e Ko.
