Jon 12:1-50
12 Jiljino raan m̦okta jãn iien Kwõjkwõjin Kijoone eo, Jesus ear tõparl̦o̦k Betani, ijo jikin Lazerõs, l̦eo Jesus ear kõjerkake jãn mej.
2 Innem rar kõm̦m̦ane juon kõjota ñane ijo. Marta ear ajej m̦õñã, im Lazerõs ear juon iaan ro rar kõjota* ippãn Jesus.
3 Meri ear bõk juon weil̦ eñaj im el̦ap on̦ããn kõm̦m̦an jãn nard* im kar jab kãreiki kõn jabdewõt, im eddon ej juon bo̦un.* Innem ear kapiti neen Jesus kake im kõm̦õrãiki kõn kool̦an bõran, im aolepen lowaan m̦weo ear bwiin mãlu.
4 Ak juon iaan ri-kal̦oor ro an Jesus etan Judas Iskariõt, eo ej pojakin ketake, ear ba:
5 “Etke ear jab wiakake bõkã en̦ kõn 300 denarii* im lel̦o̦k jããn ko ñan ro rejeram̦õl?”
6 Ear ba men in kõnke e ri-ko̦o̦t, ejjab kõnke ej l̦õmn̦ak kõn ro rejeram̦õl. E eo ear lale bo̦o̦k in jããn eo im ekõn ko̦o̦t jããn jãne.
7 Innem Jesus ear ba: “Kom̦win jab el̦waj ñane bwe ej kõm̦m̦ane men in ñan kõpooj ãnbwinnũ ñan raan eo naaj kalibwin eõ.
8 Ro rejeram̦õl rej pãd ippemi aolep iien, ak ejjab aolep iien inaaj pãd ippemi.”
9 Ak kiiõ elõñ ri-Ju rar itok kõnke rar roñ bwe Jesus epãd ijin. Rar itok kõnke rekõn̦aan loe Jesus. Ejjab men in wõt ak rar bar kõn̦aan loe Lazerõs, eo Jesus ear kõjerkake jãn mej.
10 Innem bũrij ro reutiej rar pepe in bar m̦an Lazerõs
11 kõnke elõñ ri-Ju rar itok ñan ijin im tõmak ilo Jesus kõn wõt e.
12 Raan eo tok juon, jarlepju eo me ear itok ñan kwõjkwõj eo, rar roñ bwe Jesus ej itok ñan Jerusalem.
13 Kõn men in, rar ebbõk kimej in ni palm im etal im wõnm̦aiki, innem rar kõl̦l̦aaj ainikieer im ba: “O Anij, kwõn kõjparoke em̦m̦aan in! Ejeraam̦m̦an wõt eo ej itok ilo etan Jeova!* Ejeraam̦m̦an wõt Kiiñ eo an Israel!”
14 Im ke Jesus ear loe juon koon in donkey, ear uwe ioon ãinwõt an Jeje ko ba:
15 “Armej ro ilo Zaion,* kom̦win jab mijak. Kiiñ eo ami ej itok im ej uwe ioon juon koon in donkey.”
16 Ilo kar jinoin, ri-kal̦oor ro an rar jab mel̦el̦e kõn men kein. Bõtab, ke Jesus ear bõk an aiboojoj, rej kab keememej bwe men ko rar wal̦o̦k ñane ejjel̦o̦k oktak jãn men ko Jeje ko rar ba.
17 Armej ro me rar lo an kũr Lazerõs bwe en diwõjtok jãn lõb* eo im an kar kõjerkake jãn mej, rar jab bõjrak jãn aer kwal̦o̦k kõn men in rar loe.
18 Eñin unin an kar jarlepju eo etal im wõnm̦aiki Jesus, kõnke rar roñ kõn menin kabwilõñlõñ* in ear kõm̦m̦ane.
19 Kõn men in, Parisi ro rar ba ñan doon im ba: “Kom̦ij ke loe, ejjel̦o̦k men en̦ jemaroñ kõm̦m̦ane. Lale m̦õk! Aolep armej in lal̦ in rej etal ñan ippãn.”
20 Ekar bar wõr jet ri-Grik rar itok im kabuñ ilo iien kwõjkwõj eo.
21 Armej rein rar kepaake Pilip im ba: “Likao en̦, kõm kõn̦aan loe Jesus.” Pilip ej jãn bukwõn eo etan Betseida ilo Galili.
22 Innem Pilip ear etal im ba ñan Andru, im erro kar etal im ba ñan Jesus.
23 Bõtab Jesus ear uwaake erro im ba: “Emoottok iien an Nejin armej* bõk an aiboojoj.
24 Ij ba ñan kom̦ bwe el̦aññe juon ineen wiit ejjab wõtlo̦k ioon bwidej im mej, enaaj pãdwõt ilo an ine. Bõtab el̦aññe emej, innem enaaj jebar elõñ leen.
25 Jabdewõt eo ej yokwe mour eo an, mour eo an enaaj jako. Bõtab jabdewõt eo ej m̦õn̦õn̦õ in luuji* mour eo an ilo lal̦ in, enaaj lo̦mo̦o̦ren mour eo an make bwe en bõk mour indeeo.
26 El̦aññe jabdewõt ekõn̦aan jerbal ñan ña, en l̦oor eõ, im ijo ij pãd ie, ri-jerbal eo aõ enaaj bar pãd ie. El̦aññe jabdewõt ekõn̦aan jerbal ñan ña, Jema enaaj kõjeraam̦m̦ane.
27 Kiiõ ilukkuun inepata, im ta eo inaaj ba? Jema, lo̦mo̦o̦ren eõ jãn iien in. Bõtab unin aõ kar itok in, ej bwe in kijenmej ilo iien in.
28 Jema, kwõn kaiboojoj etam̦.” Innem juon ainikien jãn lañ ear ba: “Iar kaiboojoje im inaaj bar kaiboojoje.”
29 Jarlepju eo ej jutak ijo rar roñ ainikien eo im rar ba bwe ej ainikien jourur. Ak ro jet rar ba: “Juon enjel̦ ear kõnnaan ippãn.”
30 Innem Jesus ear ba: “Unin an wal̦o̦k ainikien eo ej ñan kom̦, im ejjab ñan ña.
31 Kiiõ emoottok iien ñan ekajete lal̦ in, im naaj jol̦o̦ke ri-tõl eo an lal̦ in.
32 Ak ñe renaaj lelõñl̦o̦k* eõ, inaaj tõle tok jabdewõt armej ñan ippa.”
33 Ear ba men in ñan kwal̦o̦k kõn wãween an naaj mej.
34 Bõtab jarlepju eo ear ba ñane: “Kien eo ej ba bwe Christ enaaj mour ñan indeeo, ak etke kwõj ba bwe renaaj lelõñl̦o̦k Nejin armej? Wõn Nejin armej n̦e kwõj kõnnaan kake?”
35 Kõn men in, Jesus ear ba ñan er: “Meram eo enaaj pãd ibwiljimi ium̦win jidik iien. Kom̦win etetal ilo meram ke ejja pãd ippemi bwe marok en jab anjo̦ ioomi. Jabdewõt eo ej etetal ilo marok ejjab jel̦ã ia eo ej etal ñane.
36 Kiiõ ke meram eo ejja pãd ippemi, kom̦win kwal̦o̦k ami tõmak ilo e bwe kom̦win maroñ erom ro nejin meram.”
Ãlikin an kar Jesus ba men kein, ear etal jãn ijo im tilekek jãn er.
37 Meñe ear kõm̦m̦an elõñ menin bwilõñ* im̦aan mejãer, ak rar jab likũt aer tõmak ilo e.
38 Ilo wãween in, ear jejjet naan ko an ri-kanaan Aiseia, ke ear ba: “Jeova,* ewõr ke en̦ ej likũt an tõmak ilo men eo ear roñ jãn kõm?* Im wõn eo Jeova* ear kwal̦o̦k kajoor eo an* ñane?”
39 Aiseia ear bar kwal̦o̦k unin aer kar jab tõmak, ke ear ba:
40 “Iar kõm̦m̦an bwe ren pilo im iar kapen bũrueer. Eñin unin rejjab lo kõn mejãer im mel̦el̦e kõn bũrueer, im oktaktok ñan ña bwe in kõmour er.”
41 Aiseia ear ba men kein kõn Christ kõnke ear lo aiboojoj eo an.
42 Bareinwõt, elõñ iaan ri-tõl ro an ri-Ju ro rar likũt aer tõmak ilo e. Bõtab rar jab kwal̦o̦ke men in kõn wõt Parisi ro, kõnke ren jab jol̦o̦k er jãn im̦õn kabuñ eo.
43 Unin ej kõnke el̦apl̦o̦k aer kõn̦aan bõk nõbar jãn armej jãn aer bõk nõbar jãn Anij.
44 Innem Jesus ear kõl̦l̦aaj ainikien im ba: “Jabdewõt eo ej likũt an tõmak ilo ña, ejjab tõmak wõt ilo ña ak ej bar likũt an tõmak ilo Eo ear jilkintok eõ.
45 Im jabdewõt eo ej lo eõ, ej bar lo Eo ear jilkintok eõ.
46 Iar itok ñan lal̦ in ãinwõt juon meram bwe jabdewõt eo ej likũt an tõmak ilo ña en jab pãdwõt ilo marok.
47 Ak el̦aññe jabdewõt ej roñjake naan ko aõ im jab pokaki, ijjab ekajete kõnke iar jab itok bwe in ekajete lal̦ in, bõtab iar itok bwe in lo̦mo̦o̦rene.
48 Jabdewõt eo ej kõjekdo̦o̦n eõ im ejjab pokake naan ko aõ, ewõr juon eo enaaj ekajete. Naan eo iar kwal̦o̦ke enaaj ekajete ilo raan eo ãliktata.
49 Iar jab kõnono kõn ankilaõ make, ak Jema, eo ear jilkintok eõ, ear jiroñtok eõ* kõn ta eo in ba im ta eo in kõnnaan kake.
50 Im ijel̦ã bwe naanin jiroñ in an* ej tõll̦o̦k ñan mour indeeo. Kõn men in, jabdewõt men ij ba, ij kõnono ekkar ñan ta eo Jema ear jiroñ eõ bwe in ba.”
Footnotes
^ Ak “jijet ilo tebõl̦ eo.”
^ Nard ej juon kain menin eddek ebwiin mãlu.
^ Mel̦el̦ein, bo̦un eo an ri-Rom, enañin 327 gram (11.5 aunij).
^ Lale “Jeova” ilo Kõmel̦el̦e Ko.
^ Emaroñ jitõñl̦o̦k ñan Jerusalem, eo ear pãd ilo Tol̦ Zaion.
^ Kajin Grik, “libõn keememej.”
^ Kajin Grik, “kõkal̦l̦e.”
^ Lale “Nejin armej” ilo Kõmel̦el̦e Ko.
^ Kajin Grik, “dike.”
^ Ak “totoik.”
^ Kajin Grik, “kõkal̦l̦e.”
^ Lale “Jeova” ilo Kõmel̦el̦e Ko.
^ Ak “men eo kõmar kwal̦o̦ke.”
^ Lale “Jeova” ilo Kõmel̦el̦e Ko.
^ Kajin Grik, “pein.”
^ Kajin Grik, “letok juon kien.”
^ Kajin Grik, “kien in an.”
