Jon 14:1-31
14 “Bũruomi en jab inepata. Kom̦win kwal̦o̦k ami tõmak ilo Anij, im kom̦win bar kwal̦o̦k ami tõmak ilo ña.
2 Elõñ jikin jokwe ilo m̦weo im̦õn Jema, ñe en kar ejjel̦o̦k, inaaj kar ba ñan kom̦. Ij etal im kõpooj juon jikimi.
3 Bareinwõt, ñe inaaj etal im kõpooj juon jikimi, inaaj bar jepl̦aaktok im bõk kom̦ ippa bwe ijo ij pãd ie, kom̦win bar pãd ie.
4 Kom̦ jel̦ã kõn ial̦ eo ñan ijo ij etal ñane.”
5 Innem Tomas ear ba ñane: “Irooj, ewi wãween ammim jel̦ã kõn ial̦ eo ke kõm jaje ia n̦e kwõj etal ñane?”
6 Jesus ear ba ñane: “Ña ij ial̦ eo im m̦ool eo im mour eo. Ejjel̦o̦k en̦ ej ilo̦k ñan ippãn Jema el̦aññe ejjab kõn ña.
7 El̦aññe kom̦ jel̦ã kajjieõ, innem kom̦ jel̦ã bar kajjien Jema. Jãn kiiõ m̦aanl̦o̦k, kom̦ jel̦ã kajjien im em̦õj ami loe.”
8 Im Pilip ear ba: “Irooj, kwõn kwal̦o̦k Jem̦am̦ ñan kõm, im enaaj bwe men in ñan kõm.”
9 Jesus ear ba ñane: “Pilip, ekanooj in to aõ pãd ippemi ak kwõjjañin jel̦ã kajjieõ ke? Jabdewõt eo em̦õj an lo ña, em̦õj an bar lo Jema. Ak kiiõ, etke kwõj ba, ‘Kwõn kwal̦o̦k Jem̦am̦ ñan kõm’?
10 Kwõjjab tõmak ke bwe ña ij bõro wõt juon ippãn Jema im Jema ej bõro wõt juon ippa? Men ko ij ba ñan kom̦ rejjab itok jãn ña make, bõtab jerbal kein rej an Jema, eo ej bõro wõt juon ippa.
11 Kom̦win tõmak ña ilo aõ ba bwe ij bõro wõt juon ippãn Jema im Jema ej bõro wõt juon ippa. El̦aññe ejjab, kom̦win tõmaki jerbal ko iar kõm̦m̦ani.
12 Ij ba ñan kom̦ bwe jabdewõt eo ej kwal̦o̦k an tõmak ilo ña, enaaj bar kõm̦m̦ani jerbal kein ij kõm̦m̦ani. Innem enaaj kõm̦m̦ani jerbal ko rel̦l̦apl̦o̦k jãn men kein, kõnke ña ij etal ñan ippãn Jema.
13 Bareinwõt, jabdewõt men ko kom̦ij kajjitõk kaki ilo eta, inaaj kõm̦m̦ani bwe Jema en maroñ bõk aiboojoj kõn Nejin.
14 El̦aññe kom̦ naaj kajjitõk kõn jabdewõt men ilo eta, inaaj kõm̦m̦ane.
15 “El̦aññe kom̦ij yokwe eõ, kom̦ naaj pokake kien ko aõ.
16 Inaaj kajjitõk ippãn Jema im enaaj lewaj bar juon rijjipañ* bwe en pãd ippemi ñan indeeo.
17 Rijjipañ in ej jetõb kwõjarjar,* eo me ej rejetake m̦ool eo. Lal̦ in ejjab maroñ bõke men in kõnke ejjab loe im ejaje kake. Kom̦ jel̦ã kake kõnke ej pãdwõt ippemi im ej pãd ilo kom̦.
18 Iban kõtl̦o̦k bwe kom̦win make iaami,* ak inaaj bar jepl̦aaktok ñan ippemi.
19 M̦õttan wõt jidik lal̦ in eban bar lo eõ, bõtab kom̦ naaj lo eõ, kõnke ij mour im kom̦ naaj mour.
20 Ilo raan en̦ kom̦ naaj jel̦ã bwe ij bõro wõt juon ippãn Jema, im kom̦ij bõro wõt juon ippa im ij bõro wõt juon ippemi.
21 Jabdewõt eo epãd kien ko aõ ippãn im ej pokaki, armej in ej yokwe eõ. Innem jabdewõt eo ej yokwe eõ, Jema ej bar yokwe, im inaaj yokwe armej in im inaaj kaalikkar ña make ñane.”
22 Judas, ejjab Judas Iskariõt, ear ba ñane: “Irooj, etke kokõn̦aan kaalikkar eok make ñan kõm im jab ñan armej in lal̦ in?”
23 Innem Jesus ear uwaake im ba: “El̦aññe jabdewõt ej yokwe eõ enaaj pokake naan ko aõ, im Jema enaaj yokwe e im kõm̦ro naaj itok ñan ippãn im jokwe ippãn.
24 Jabdewõt eo ejjab yokwe eõ ejjab pokaki naan ko aõ. Naan kein kom̦ij roñjaki rejjab aõ, ak rej an Jema, eo ear jilkintok eõ.
25 “Kiiõ ke ij pãd ippemi, em̦õj aõ ba men kein ñan kom̦.
26 Bõtab jetõb kwõjarjar,* rijjipañ eo me Jema enaaj jilkintok ilo eta, enaaj katakin kom̦ men otemjej im kõm̦m̦an bwe kom̦win keememej aolep men ko iar ba ñan kom̦.
27 Ij likũt aenõm̦m̦an ippemi, im ij lewaj aenõm̦m̦an eo aõ ñan kom̦. Ijjab lewaje ilo wãween eo lal̦ in ej lewaje. Bũruomi en jab inepata im kom̦win jab kõtl̦o̦k bwe en ebbeer kõn an mijak.
28 Kom̦ar roñ aõ jiroñwaj kom̦ im ba, ‘Ij etal im inaaj bar jepl̦aaktok ñan ippemi.’ El̦aññe kom̦ij yokwe eõ, kom̦ naaj kar m̦õn̦õn̦õ bwe ij etal ñan ippãn Jema, kõnke Jema eutiejl̦o̦k jãn ña.
29 Ij ba ñan kom̦ men in kiiõ m̦okta jãn an wal̦o̦k, kõnke ñe enaaj wal̦o̦k, kom̦win kab tõmak naan kein aõ.
30 Eban aetokl̦o̦k aõ kõnnaan ippemi kõnke ri-tõl eo an lal̦ in ej itok wõt, im ejjel̦o̦k an maroñ ioõ.
31 Ij kõm̦m̦ani men ko Jema ear jiroñ eõ bwe in kõm̦m̦ani kõnke lal̦ in en jel̦ã ke ij yokwe Jema. Kom̦win jutak im jen etal jãn ijin.
Footnotes
^ Ak “ri-kaenõm̦m̦an.”
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Ak “ãinwõt ajri ro ejjel̦o̦k jineer im jemãer.”
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
