Jon 20:1-31
20 Im ke ej jimmarok wõt ilo raan eo m̦oktata ilo wiik eo tok juon,* Meri Magdalini ear etal ñan lõb* eo ke ej emmarokrok wõt, im ear lo bwe em̦õj kõm̦akũt dekã eo jãn mejãn lõb* eo.
2 Kõn men in, ear ettõrl̦o̦k ñan ippãn Saimõn Piter im ri-kal̦oor eo juon, eo im Jesus ej yokwe, im ear ba ñan erro: “Em̦õj bõk Irooj jãn lõb en̦, im kõm jaje ia eo rar likũti ie.”
3 Innem Piter im ri-kal̦oor eo juon rar ilo̦k ñan lõb eo.
4 Erro ar jim̦or ettõrl̦o̦k ak em̦õkaj an ri-kal̦oor eo juon ettõr jãn Piter, im ear tõpar lõb eo m̦okta.
5 Innem ke ear allimõmõ ilo lõb eo, ear lo m̦õttan nuknuk ko rej pãd ijo, bõtab ear jab del̦o̦ñl̦o̦k.
6 Tokãlik, Saimõn Piter ear tõpartok ijo im ear kajjul̦o̦k ñan lowaan lõb eo, im ear lo m̦õttan nuknuk ko.
7 M̦õttan eo rekar kũtimi bõran Jesus kake ear jab pãd ippãn m̦õttan nuknuk ko jet ak ear pãd makel̦o̦k iaan im em̦õj limi.
8 Ri-kal̦oor eo juon me ear tõpar lõb eo m̦okta ear bar del̦o̦ñl̦o̦k, im ear lo men kein im tõmak men ko ear roñ.
9 Bõtab ilo tõre in, rejjañin mel̦el̦e kõn eoon eo im ej ba bwe ej aikuj jerkak jãn mej.
10 Kõn men in, ri-kal̦oor ro rar jepl̦aak ñan m̦õko im̦weer.
11 Bõtab Meri ear jutak wõt nabõjin lõb eo im jañ. Ke ej jañ, ej allimõmõl̦o̦k im lale lowaan lõb eo,
12 im ear lo ruo enjel̦ rej nuknuk mouj im rej jijet ijo ãnbwinnin Jesus ear pãd ie, juon ijo bõran ear pãd ie im juon ijo neen ear pãd ie.
13 Innem rar ba ñane: “Kõrã en̦, etke kwõj jañ?” Im ear ba ñan er: “Em̦õj aer bõk Irooj eo aõ, im ijaje ia eo rar likũti ie.”
14 Ãlikin an ba men kein, ear oktakl̦o̦k im ear lo Jesus ej jutak ijo, bõtab ear jab kile ke Jesus eo.
15 Jesus ear ba ñane: “Kõrã en̦, etke kwõj jañ? Wõn eo kwõj kappukote?” Innem kõn an l̦õmn̦ak bwe Jesus ej ri-kallib eo, ear ba ñane: “Em̦m̦aan en̦, el̦aññe kwe eo kwaar bõke, kwõn kwal̦o̦k ñan ña ia eo kwaar likũt ãnbwin eo ie, im inaaj etal im bõke.”
16 Im Jesus ear ba ñane: “Meri!” Innem kõrã eo ear oktak likl̦o̦k im ba ñane ilo kajin Hibru: “Rabbonai!” (mel̦el̦ein naan in ej “ri-Kaki!”)
17 Jesus ear ba ñane: “Kwõn bõjrak jãn am̦ dãpij eõ kõnke ijjañin wanlõñl̦o̦k ñan ippãn Jema, ak kwõn ilo̦k im kõnnaanek ri-kal̦oor ro aõ im ba ñan er, ‘Ij wanlõñl̦o̦k ñan ippãn Jema, eo ej bar Jememi, im ñan ippãn aõ Anij, eo ej bar ami Anij.’”
18 Innem Meri Magdalini ear ilo̦k im bõkl̦o̦k ennaan eo ñan ri-kal̦oor ro im ba: “Iar loe Irooj!” Im ear kõnnaanek er men ko Jesus ear ba ñane.
19 Ilo jo̦teenin l̦o̦k raan eo, ejja raan eo m̦oktata ilo wiik eo, ri-kal̦oor ro rar pãd ilowaan juon em̦ im rar l̦ake kõjãm ko kõn aer mijak ri-Ju ro.* Innem Jesus ear wal̦o̦ktok ñan ippãer im jutak iol̦apeer im ear ba: “Aenõm̦m̦an ñan kom̦.”
20 Ãlikin an ba men in, ear kwal̦o̦k pein im katin ñan er, im ri-kal̦oor ro rar m̦õn̦õn̦õ ke rar lo Irooj.
21 Innem Jesus ear bar ba ñan er: “Aenõm̦m̦an ñan kom̦. Ãinwõt an kar Jema jilkintok eõ, ãindein ij bar jilkinl̦o̦k kom̦.”
22 Ãlikin an ba men in, ear ukukl̦o̦k ñan er im ba: “Kom̦win bõk jetõb kwõjarjar.*
23 El̦aññe kom̦ij jol̦o̦k jerawiwi ko an jabdewõt, jerawiwi ko aer renaaj jako. Ak el̦aññe kom̦ij jab jol̦o̦k jerawiwi ko an jabdewõt, jerawiwi ko aer renaaj pãdwõt.”
24 Bõtab Tomas, juon iaan rijjilõk ro 12, eo rekõn ãñinñini im ba Bo eo,* ekar jab pãd ippãer ke Jesus ear wal̦o̦kl̦o̦k ñan er.
25 Kõn men in, ri-kal̦oor ro jet rar ba ñane: “Kõmar lo Irooj!” Bõtab ear ba ñan er: “Iban tõmak m̦ae iien iloe annañin* dila ko ilo pein im jibwi kõn peiũ, im jibwe katin.”
26 Ralitõk raan tokãlik, ri-kal̦oor ro an rar bar pãd ilowaan em̦ im Tomas ear pãd ippãer. Meñe ear l̦ak kõjãm ko, ak Jesus ear wal̦o̦ktok ñan er im jutak iol̦apeer im ba: “Aenõm̦m̦an ñan kom̦.”
27 Innem ear ba ñan Tomas: “Kwõn likũti addiin peim̦ ijo, im lale peiũ, im kwõn letok peim̦ im jibwe katũ. Kwõn bõjrak jãn am̦ pere ak kwõn tõmak.”
28 Im Tomas ear ba ñane: “Aõ Irooj im aõ Anij!”
29 Jesus ear ba ñane: “Kwõj tõmak kiiõ kõn am̦ lo ña ke? Em̦õn̦õn̦õ ro rej tõmak meñe rejjab loe.”
30 Ilo m̦ool, Jesus ear bar kõm̦m̦an elõñ menin bwilõñ* im̦aan mejãn ri-kal̦oor ro an, ak kar jab jei ilo bok lemlem in.
31 Bõtab kar jei men kein bwe kom̦win tõmak bwe Jesus ej Christ, Nejin Anij. Innem ilo ami tõmak, kom̦ maroñ bõk mour kõn wõt ãt eo etan.
Footnotes
^ Eñin ej raan eo jej n̦aetan Sunday. Ippãn ri-Ju ro, eñin ej raan eo m̦oktata ilowaan juon wiik.
^ Kajin Grik, “libõn keememej.”
^ Kajin Grik, “libõn keememej.”
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Ak “Didimõs.”
^ Ak “jenkwan.”
^ Kajin Grik, “kõkal̦l̦e.”
