Jon 21:1-25
21 Ãlikin men in, Jesus ear bar wal̦o̦kl̦o̦k* ñan ri-kal̦oor ro an ke rar pãd ilo Lom̦al̦o in Taibiriõs. Ãindein an kar wal̦o̦kl̦o̦k ñan er.
2 Saimõn Piter, Tomas (eo rekõn ãñinñini im ba Bo eo),* Natanael jãn Cana ilo Galili, l̦õm̦aro nejin Zebedi, im bar ruo iaan ri-kal̦oor ro rar aolep pãd ippãn doon ijo.
3 Saimõn Piter ear ba ñan er: “Ij ilen eo̦ñõd.” Im rar ba ñane: “Kõmij iwõj ippam̦.” Rar ilo̦k im uwe ilo juon wa, bõtab ekar ejjel̦o̦k kun̦aaer aolepen boñõn eo.
4 Bõtab ke ej jino raantak, Jesus ear jutak iparijet, ak ri-kal̦oor ro rar jab kile ke Jesus eo.
5 Innem Jesus ear ikkũrl̦o̦k ñan er im ba: “Ajri ran̦, ewõr ke kijemi m̦õñã?”* Rar uwaak im ba: “Ejjel̦o̦k!”
6 Im ear ba ñan er: “Kom̦win doorlal̦l̦o̦k ok n̦e ilo ituanbwijmaroñin wa n̦e im enaaj lõñ kun̦aami.” Kõn men in, rar doorlal̦l̦o̦k ok eo, bõtab rar jab maroñ kanõk lõñtak kõn an lukkuun obrak kõn ek.
7 Innem ri-kal̦oor eo Jesus ej yokwe ear ba ñan Piter: “Irooj en̦!” Saimõn Piter ej roñ wõt ke Irooj en̦ ak ear kõn̦ake nuknuk eo an kõnke ej lowa wõt,* im ear kajju kãlo̦k lo̦jet.
8 Bõtab ri-kal̦oor ro jet rar itok wõt ilo wa jidikdik eo im rej kanõktok ok eo eobrak kõn ek, kõnke rar jab kanooj ettol̦o̦k jãn ãne, enañin 300 wõt ne* ettol̦o̦kier.
9 Ke rar tõparl̦o̦k ãne, rar lo juon kijeek in mãlle ijo im elõñ ek rej kõmat ioon im ebar wõr pilawã.
10 Jesus ear ba ñan er: “Bõktok jet iaan ek kan̦e kun̦aami.”
11 Innem Saimõn Piter ear uwel̦o̦k ioon wa eo im iper ãnetak ok eo eobrak kõn ek killep, oran ek ko ej 153. Meñe ear lukkuun lõñ ek ak ear jab potak ok eo.
12 Im Jesus ear ba ñan er: “Kom̦win itok im m̦abuñ.” Ejjel̦o̦k juon iaan ri-kal̦oor ro ear peran in kajjitõk ippãn im ba: “Wõn kwe?” kõnke rejel̦ã ke Irooj eo.
13 Innem Jesus ear bõk pilawã eo im lel̦o̦k ñan er, im ear bar bõk ek ko im lel̦o̦k ñan er.
14 Eñin ej alen eo kein kajilu in an Jesus jãdel̦o̦k ñan ri-kal̦oor ro an ãlikin an kar jerkak jãn mej.
15 Ãlikin aer m̦õñã in jibboñ, Jesus ear ba ñan Saimõn Piter: “Saimõn nejin Jon, kwõj ke yokwe* eõ el̦apl̦o̦k jãn men kein?” Ear uwaak im ba: “Aet Irooj, kwõjel̦ã bwe ij yokwe* eok.” Im Jesus eba ñane: “Kwõn naajdik koon in jiip ko nejũ.”
16 Innem ear bar ba ñan Piter: “Saimõn nejin Jon, kwõj ke yokwe* eõ?” Im eba: “Aet Irooj, kwõjel̦ã bwe ij yokwe* eok.” Im eba ñane: “Kwõn lale jiip ko nejũ reddik.”*
17 Ear ba ñane alen eo kein kajilu: “Saimõn nejin Jon, kwõj ke yokwe* eõ?” Piter ear jino bũrom̦õj kõn an kajjitõk ippãn alen jilu im ba: “Kwõj ke yokwe eõ?” Kõn men in, ear ba ñane: “Irooj, kwõjel̦ã men otemjej im kwõjel̦ã bwe ij yokwe* eok.” Innem Jesus eba ñane: “Kwõn naajdik jiip ko nejũ reddik.
18 Ij ba ñan eok bwe ke kwaar dik, kwokõn make ekkõn̦ak am̦ nuknuk im etal ñan jabdewõt jikin kokõn̦aan etal ñane. Bõtab ñe kwõnaaj bwijwol̦ã,* kwõnaaj erl̦o̦ke peim̦ im bar juon enaaj kanuknuk eok im kotak eok ñan ijoko kwõjjab kõn̦aan etal ñani.”
19 Ear ba men in ñan kaalikkar kõn wãween an naaj Piter mej ñan kaiboojoj Anij. Ãlikin an ba men in, ear ba ñane: “Kwõn wõnm̦aanl̦o̦k wõt im l̦oor eõ.”
20 Piter ear reilikl̦o̦k im lo an ri-kal̦oor eo Jesus ej yokwe l̦oore erro. Eñin ri-kal̦oor eo ear atartarl̦o̦k ippãn Jesus ilo iien kõjota eo im ba: “Irooj, wõn eo enaaj ketak eok?”
21 Ke Piter ear lo ri-kal̦oor in, ear kajjitõk ippãn Jesus im ba: “Irooj, ak l̦ein, ta eo enaaj wal̦o̦k ñane?”
22 Jesus ear ba ñane: “El̦aññe ikõn̦aan* bwe en pãdwõt m̦ae iien inaaj itok, etke kwõj aikuj in inepata kake? Kwõn wõnm̦aanl̦o̦k wõt im l̦oor eõ.”
23 Kõn men in, naan kein rar ajeededl̦o̦k ibwiljin rũttõmak ro bwe ri-kal̦oor in eban mej. Bõtab, Jesus ear jab ba bwe eban mej, ak ear ba: “El̦aññe ikõn̦aan bwe en pãdwõt m̦ae iien inaaj itok, etke kwõj aikuj in inepata kake?”
24 Eñin ej ri-kal̦oor eo ej kwal̦o̦k kõn men kein im e in ear je men kein, im jejel̦ã bwe men ko ej kwal̦o̦k kaki rem̦ool.
25 Ilo m̦ool, ebar lõñ men ko jet Jesus ear kõm̦m̦ani, im el̦aññe renaaj kar je tipdikier, ilo aõ baj l̦õmn̦ak edik lal̦ in ñan an pãd aolep bok lemlem kein ie.
Footnotes
^ Ak “kwal̦o̦k e make.”
^ Ak “Didimõs.”
^ Ak “kijemi ek.”
^ Kajin Grik, “ekeelwaan.”
^ Enañin 90 meter. Kajin Grik, “enañin 200 cubit.”
^ Naan eo ilo kajin Grik ej a·ga·pa′o.
^ Naan eo ilo kajin Grik ej phi·le′o.
^ Naan eo ilo kajin Grik ej a·ga·pa′o.
^ Naan eo ilo kajin Grik ej phi·le′o.
^ Ak “Kwõn juon jabõt ñan jiip ko nejũ reddik.”
^ Naan eo ilo kajin Grik ej phi·le′o.
^ Naan eo ilo kajin Grik ej phi·le′o.
^ Ak “l̦al̦l̦ap.”
^ Ak “ej ankilaõ.”
