Jon 5:1-47
5 Ãlikin men in, ekar wõr juon kwõjkwõj an ri-Ju ro, im Jesus ear etal ñan Jerusalem.
2 Ilo Jerusalem, ekar wõr juon l̦we iturin kõjãm eo etan Kõjãmin Jiip, im elõñ jikin etetal im joor ipel̦aakin. Etan l̦we in ilo kajin Hibru ej Beth·za′tha.*
3 Ekar wõr juon jarlepju in ro renañinmej, ro repilo, ro rejaje etetal, im ro emej neer ak peier rar pãd ijin im babu.
4 *——
5 Bareinwõt, ear wõr juon em̦m̦aan ijin ear nañinmej ium̦win 38 iiõ.
6 Jesus ear lo an babu ijo, im ear jel̦ã bwe eto an nañinmej, innem ear ba ñane: “Kokõn̦aan ke bwe kwõn mour?”
7 Em̦m̦aan eo enañinmej ear uwaak im ba: “Likao en̦, ejjel̦o̦k en̦ ej jipañ bõkl̦o̦k ña ñan ilowaan l̦we en̦ ñe ej lim̦aajn̦on̦o. Ak ñe ij kajjioñ etal in tuwaak, bar juon ej m̦õkajl̦o̦k im̦aõ.”
8 Innem Jesus ear ba ñane: “Kwõn jutak! Bõk men n̦e kiniem̦ im etetal.”
9 Im em̦m̦aan eo ear kajju mour ilo iien eo wõt, im ear bõk men eo kinien im jino etetal.
Men in ear wal̦o̦k ilo raanin Jabõt.*
10 Kõn men in, ri-Ju ro rar ba ñan em̦m̦aan eo emour im ba: “Emo̦ am̦ ineeke men n̦e kiniem̦ bwe Jabõt men in.”
11 Ak ear ba ñan er: “Armej eo ear kõmour eõ ear ba ñan ña, ‘Bõk men n̦e kiniem̦ im etetal.’”
12 Rar kajjitõk ippãn im ba: “Wõn armej n̦e ear ba bwe kwõn bõk men n̦e im etetal?”
13 Bõtab l̦eo ear jaje wõn eo kõnke Jesus ear jakol̦o̦k ibul̦õn jarlepju in armej ro ijo.
14 Tokãlik Jesus ear iioone em̦m̦aan eo ilo tampel̦ eo, im ear ba ñane: “Lale m̦õk, em̦m̦an am̦ mour. Jab bar kõm̦m̦ani men ko renana,* bwe en jab wal̦o̦k ñan eok juon men enanal̦o̦k.”
15 Innem em̦m̦aan eo ear ilo̦k im kõnnaanek ri-Ju ro bwe Jesus eo ear kõmouri.
16 Kõn men in, ri-Ju ro rar jino jum̦aik Jesus kõn an kar kõm̦m̦ani men kein ilo raanin Jabõt.
17 Bõtab ear ba ñan er: “Jema ej jerbal wõt ñan kiiõ, im ña, ij bar wõnm̦aanl̦o̦k wõt im jerbal.”
18 Eñin unin ear l̦apl̦o̦k wõt an ri-Ju ro pukot kilen aer m̦ane. Ejjab kõn wõt aer kar l̦õmn̦ak bwe ear rupe kien Jabõt, ak kõn an bar ba bwe Anij ej Jemãn, im ilo an ba men in rej l̦õmn̦ak ej kõm̦m̦an bwe en joñan wõt juon ippãn Anij.
19 Innem Jesus ear ba ñan er: “Ij ba ñan kom̦ juon men em̦ool. Nejin ejjab maroñ kõm̦m̦ane jabdewõt men kõn maroñ eo an make, bõtab ej kõm̦m̦ani wõt men ko ej lo an Jemãn kõm̦m̦ani. Jabdewõt men Jemãn ej kõm̦m̦ane, Nejin ej bar kõm̦m̦ane ilo ejja wãween eo wõt.
20 Jemãn ej yokwe Nejin, im ej kwal̦o̦k ñane aolep men ko ej kõm̦m̦ani, im enaaj kappeiki kõn jerbal ko rel̦l̦apl̦o̦k jãn men kein bwe kom̦win lukkuun bwilõñ.
21 Bwe ãinwõt an Jemãn kõjerkak ro rar mej im kõmour er, Nejin ej bar kõmour jabdewõt eo ekõn̦aan.
22 Jemãn ejjab ekajete jabdewõt, ak ear kappeiki Nejin bwe e eo en ekajet
23 kõnke aolep ren kautieje Nejin ãinwõt aer kautiej Jemãn. Jabdewõt eo ejjab kautiej Nejin, ejjab bar kautiej Jemãn, eo ear jilkintoke.
24 Ij ba ñan kom̦ bwe jabdewõt eo ej roñjake naan ko aõ im tõmak Eo ear jilkintok eõ, armej in enaaj bõk mour indeeo. Bareinwõt, eban bõk ekajet, bõtab enaaj ãinwõt juon armej eo ear mej im bar mour.
25 “Ij ba ñan kom̦ bwe ej itok wõt iien eo, jino jãn kiiõ, ñe ro remej renaaj roñ ainikien Nejin Anij, im ro rar roñjake im pokake renaaj mour.
26 Ãinwõt an Jemãn wũnjãn mour, ãindein ear lel̦o̦k ñan Nejin maroñ eo bwe en lel̦o̦k mour.
27 Im ear lel̦o̦k maroñ eo ñane bwe en ekajet, kõnke e Nejin armej.*
28 Kom̦win jab bwilõñ kõn men in, kõnke ej itok wõt iien eo ñe aolep ro rej pãd ilo lõb ko* renaaj roñ ainikien
29 im diwõjtok. Ro rar kõm̦m̦an em̦m̦an renaaj jerkakpeje ñan mour, im ro rar kõm̦m̦ani men ko renana renaaj jerkakpeje ñan bõk ekajet.
30 Ijjab maroñ kõm̦m̦an jabdewõt men kõn maroñ e aõ make. Ij ekajet ekkar ñan ta eo Jema ej ba, im ij ekajet ilo jim̦we* kõnke ijjab kõm̦m̦an ekkar ñan ankilaõ ak ij kõm̦m̦an ekkar ñan ankilaan eo ear jilkintok eõ.
31 “El̦aññe ña wõt ij kwal̦o̦k kõn ña make, innem men ko ij ba rejjab m̦ool.
32 Ebar wõr juon ej kwal̦o̦k kõn ña, im ijel̦ã bwe men ko ej kwal̦o̦ki kõn ña rem̦ool.
33 Kom̦ar ijjilõkl̦o̦k armej ñan ippãn Jon, im ear kwal̦o̦k kõn m̦ool eo.
34 Bõtab, ijjab aikuji an jabdewõt armej kwal̦o̦k kõn ña, ak ij ba men kein bwe kom̦win maroñ bõk lo̦mo̦o̦r.
35 Jon ear ãinwõt juon l̦aam̦ ej urur im meram, im jidik wõt iien ami kar lukkuun m̦õn̦õn̦õ kõn meram eo an.
36 Ewõr aõ kein kam̦ool im el̦apl̦o̦k jãn men eo Jon ear kwal̦o̦ke. Jerbal ko Jema ear jitõñ eõ ñan kadedel̦o̦ki, jerbal kein ij kõm̦m̦ani kiiõ, rej kam̦ool bwe Jema ear jilkintok eõ.
37 Bareinwõt, Jema make ear kam̦ool bwe e eo ear jilkintok eõ. Ejjel̦o̦k iien en̦ kom̦ nañin kar roñ ainikien ak lo mejãn,
38 im naan ko an rejjab pãd ilo bũruomi kõnke kom̦ij jab tõmak eo ear jilkintok.
39 “Kom̦ij etali Jeje ko kõnke kom̦ij l̦õmn̦ak bwe renaaj lewaj mour indeeo ñan kom̦, bõtab Jeje kan̦e rej kwal̦o̦k kõn ña.
40 Meñe ãindein ak kom̦ij jab kõn̦aan itok ñan ippa bwe kom̦win maroñ mour.
41 Ijjab kõn̦aan bõk nõbar jãn armej,
42 ak kõn kom̦, ilukkuun jel̦ã bwe ejjel̦o̦k yokwe Anij ilo bũruomi.
43 Iar itok ilo etan Jema, ak kom̦ij jab tõmak eõ. Bõtab el̦aññe juon enaaj kar itok ilo etan make, kom̦ naaj kar tõmake.
44 Enaaj ewi wãween ami tõmak ke kom̦ij bõk nõbar jãn doon ak kom̦ij jab pukot nõbar jãn Anij eo ej make wõt?
45 Kom̦win jab l̦õmn̦ak bwe inaaj kinaakl̦o̦k kom̦ ñan Jema. Moses, eo kom̦ij likũt ami kõjatdikdik ippãn, e eo ej kinaakl̦o̦k kom̦.
46 Ilo m̦ool, el̦aññe kom̦ar tõmak Moses, kom̦win kar bar tõmak ña, kõnke ear jeje kõn ña.
47 Bõtab el̦aññe kom̦ij jab tõmak men ko ear jei, enaaj ewi wãween ami tõmak men ko ij ba?”
Footnotes
^ Jet bok lemlem in etto kõn Baibõl̦ rej ba, “Bethsaida” ak “Betesda.”
^ Meñe ewal̦o̦k eoon in ilo jet ukokin Baibõl̦, bõtab ejjab wal̦o̦k ilo elõñ iaan bok lemlem in etto ko ilo kajin Grik.
^ Lale “Jabõt” ilo Kõmel̦el̦e Ko.
^ Kajin Grik, “jerawiwi.”
^ Lale “Nejin armej” ilo Kõmel̦el̦e Ko.
^ Kajin Grik, “libõn keememej.”
^ Kajin Grik, “wãnõk.”
