Jon 9:1-41
9 Ke ear etal, ear lo juon em̦m̦aan ear pilo jãn ke ear l̦otak.
2 Innem ri-kal̦oor ro an rar kajjitõk ippãn im ba: “Rabbai,* wõn eo ear jerawiwi im kõm̦m̦an bwe em̦m̦aan in en l̦otaktok im pilo, e ke ak jemãn im jinen?”
3 Jesus ear uwaak im ba: “Em̦m̦aan in kab jemãn im jinen rar jab kõm̦m̦an jerawiwi, bõtab men in ear wal̦o̦k bwe armej ro ren maroñ lo jerbal ko an Anij.
4 Jej aikuj kõm̦m̦ani jerbal ko an Eo ear jilkintok eõ ke ejja raan kiiõ. Ñe enaaj boñ, ejjel̦o̦k en̦ enaaj jerbal.
5 Ña ij meram eo an lal̦ in toon wõt aõ pãd ilo lal̦ in.”
6 Ãlikin an ba men kein, ear kaplouk bwidej eo im iiõke, innem ear iri mejãn em̦m̦aan eo kake
7 im ear ba ñane: “Kwõn etal im kwal̦ mejam̦ ilo l̦we en̦ etan Siloam” (mel̦el̦ein naan in ñe jej ukote ej, “Dãn Ej To̦o̦rl̦o̦k”). Innem ear etal im kwal̦ mejãn, im ke ear jepl̦aaktok ear lol̦o̦kjen̦.
8 Kõn men in, ro ri-turin im ro rekõn lo an owar rar ba: “Ejjab ke em̦m̦aan eo in ekõn jijet im owar?”
9 Jet rar ba: “Aet, em̦m̦aan eo in.” Ro jet rar ba: “Ejjab e n̦e ak eitõn ãinwõt.” Bõtab em̦m̦aan eo el̦akkar ba: “Ña eo.”
10 Innem rar kajjitõk ippãn im ba: “Ewi wãween am̦ kar maroñ lol̦o̦kjen̦?”
11 Im eba: “Em̦m̦aan eo etan Jesus ear iiõk bwidej im iri meja kake im ba, ‘Kwõn etal ñan Siloam im kwal̦ mejam̦.’ Innem iar etal im kwal̦ meja im iar lol̦o̦kjen̦.”
12 Im rar ba ñane: “Ewi em̦m̦aan n̦e?” Im eba: “Ijaje.”
13 Innem armej ro rar ãñinl̦o̦k em̦m̦aan in ekar pilo ñan ippãn Parisi ro.
14 Raanin Jabõt* men eo Jesus ear iiõke bwidej eo im kõm̦m̦an bwe em̦m̦aan eo en lol̦o̦kjen̦.
15 Kiiõ Parisi ro rar jino kajitũkini em̦m̦aan eo kõn wãween an kar maroñ lol̦o̦kjen̦. Innem ear ba ñan er: “Ear iri meja kõn bwidej eo ear iiõke, im iar kwal̦e meja im kiiõ ij lol̦o̦kjen̦.”
16 Innem jet iaan Parisi ro rar jino ba: “L̦een̦ ejjab jãn Anij kõnke ejjab kõjparok raanin Jabõt.” Ak ro jet rar ba: “Ñe rijjerawiwi em̦m̦aan en̦, innem etke emaroñ kõm̦m̦an menin kabwilõñlõñ* rot in?” Kõn men in, ear wõr jepel ikõtaer.
17 Innem rar bar ba ñan em̦m̦aan eo ear pilo: “Ta am̦ l̦õmn̦ak kõn l̦een̦ ke ear kõm̦m̦an bwe kwõn lol̦o̦kjen̦?” Im em̦m̦aan eo ear ba: “E juon ri-kanaan.”
18 Bõtab ri-Ju ro rar jab tõmak bwe em̦m̦aan eo ear pilo im kiiõ ej lol̦o̦kjen̦. Kõn men in, rar kũrtok jinen im jemãn em̦m̦aan eo,
19 im rar kajjitõk ippãerro im ba: “L̦eo ke nejimiro in me komiro ej ba bwe ear l̦otaktok im pilo? Ak kiiõ etke emaroñ lol̦o̦kjen̦?”
20 Jinen im jemãn rar uwaak im ba: “Kõm̦ro jel̦ã bwe l̦eo nejũm̦ro in im bwe ear l̦otaktok im pilo.
21 Bõtab kõm̦ro jaje ekõjkan bwe en kar maroñ lol̦o̦kjen̦ kiiõ, im kõm̦ro jaje wõn eo ear kõm̦m̦an bwe en maroñ lol̦o̦kjen̦. Kom̦win kajjitõk ippãn bwe erũtto, ej aikuj make uwaak.”
22 Jinen im jemãn rar ba men kein kõn aer mijak ri-Ju* ro kõnke em̦õj an ri-Ju ro kõm̦m̦ane juon pepe bwe el̦aññe jabdewõt armej ej ba bwe Jesus ej Christ, renaaj jol̦o̦k armej in jãn im̦õn kabuñ eo.
23 Eñin unin an kar jinen im jemãn ba: “Erũtto kiiõ, kom̦win kajjitõk ippãn.”
24 Kõn men in, rar bar kũrtok em̦m̦aan eo ear pilo im ba ñane: “Kwõn lel̦o̦k nõbar ñan Anij.* Kõm jel̦ã bwe em̦m̦aan en̦ ej juon rijjerawiwi.”
25 Im ear ba: “Ijaje ñe ej juon rijjerawiwi. Men eo dein ijel̦ã ej bwe iar pilo, ak kiiõ ij lol̦o̦kjen̦.”
26 Innem rar ba ñane: “Ta eo ear kõm̦m̦ane ñan kwe? Ewi wãween an kar kõm̦m̦an bwe kwõn lol̦o̦kjen̦?”
27 Ear uwaake er im ba: “Em̦õj aõ ba ñan kom̦ ak kom̦ar jab roñjake. Etke kom̦ kõn̦aan bar roñ? Ta kom̦ kõn̦aan erom ri-kal̦ooran ke?”
28 Kõn men in, rar illu ilo aer kõnnaan ñane im ba: “Kwe ri-kal̦ooran l̦een̦ ak kõm ri-kal̦ooran Moses.
29 Kõm jel̦ã bwe Anij ear kõnono ñan Moses, ak l̦een̦, kõm jaje ej itok jãn ia.”
30 Im em̦m̦aan eo ear ba ñan er: “Eokwe menin bwilõñ ñe kom̦ jaje ej itok jãn ia ak ear kõm̦m̦an bwe in lol̦o̦kjen̦.
31 Jejel̦ã bwe Anij ejjab roñjake rijjerawiwi, ak el̦aññe jabdewõt armej ej mijak Anij im kõm̦anm̦an ankilaan, innem Anij ej roñjake.
32 Jejjañin roñ jãn kar etto ke ewõr en̦ ear kõm̦m̦an bwe juon eo ear l̦otaktok im pilo en maroñ lol̦o̦kjen̦.
33 El̦aññe em̦m̦aan en̦ ejjab jãn Anij, innem eban kar maroñ kõm̦m̦ane jabdewõt men.”
34 Im rar ba ñane: “Kwe kwaar l̦otaktok im obrak kõn jerawiwi, ak m̦ool ke kwõj katakin kõm ke?” Innem rar bõke jãn ijo im jol̦o̦ke!*
35 Jesus ear roñ bwe em̦õj aer jol̦o̦ke em̦m̦aan eo, innem ke ear loe, ear ba ñane: “Kwõj ke likũt am̦ tõmak ilo Nejin armej?”*
36 Im em̦m̦aan eo ear uwaak im ba: “Kwõn jouj im kwal̦o̦k ñan ña wõn e bwe in maroñ likũt aõ tõmak ilo e.”
37 Im Jesus ear ba ñane: “Em̦õj am̦ loe, ilo m̦ool, e in kwõj kõnono ippãn.”
38 Innem ear ba: “Irooj, ij likũt aõ tõmak ilo kwe.” Im ear kwal̦o̦k kautiej* ñane.
39 Jesus ear ba: “Unin aõ kar itok ñan lal̦ in ej bwe Anij en ekajete armej ro bwe ro repilo ren maroñ lol̦o̦kjen̦ im ro rej lol̦o̦kjen̦ ren pilo.”
40 Parisi ro me rar pãd ijo rar roñ an ba men kein, im rar ba ñane: “Ta kõm bar pilo ke?”
41 Jesus ear ba ñan er: “Ñe kom̦win kar pilo, enaaj kar ejjel̦o̦k ami jerawiwi.* Ak kõn ami ba, ‘Kõmij lol̦o̦kjen̦,’ jerawiwi ko ami rej pãdwõt.”*
Footnotes
^ Ak “Ri-Kaki.”
^ Lale “Jabõt” ilo Kõmel̦el̦e Ko.
^ Kajin Grik, “kõkal̦l̦e.”
^ Ak “Kwõn kwal̦o̦k m̦ool im̦aan mejãn Anij.”
^ Emaroñ kar jãn im̦õn kabuñ eo.
^ Lale “Nejin armej” ilo Kõmel̦el̦e Ko.
^ Ak “buñpedo.”
^ Ak “enaaj kar ejjel̦o̦k ruomi.”
^ Ak “ewõr ruomi.”
