Jud 1:1-25
1 Jãn Jud, jatin Jemes im juon ri-karejeran Jesus Christ, ñan ro rejitõnbõro ippãn Anij Jemãdwõj ilañ, ro ear kũr er im ej kõjparok er kõnke ren pãd ippãn Jesus Christ:
2 En l̦apl̦o̦k ami bõk tũriam̦o, yokwe, im aenõm̦m̦an.
3 Ro rejitõnbõro, meñe iar lukkuun kõn̦aan jejewaj ñan kom̦ kõn lo̦mo̦o̦r eo adwõj jim̦or, ak ij kile bwe emenin aikuj ñan aõ jejewaj im akwel̦ap bwe kom̦win kanooj kate kom̦ kõn tõmak eo kar letok juon wõt alen* ñan ro rekkwõjarjar.
4 Unin ej kõnke ewõr jet armej rar kõppeljojo waj ibwiljimi, ro naaj ekajete er ãinwõt kar kanaan kake m̦oktal̦o̦k ilo Jeje ko. Armej rein rej ri-jum̦ae Anij, im rej ukote jouj eo el̦ap an Anij bwe en juon kein jekpen ñan aer peran in kõm̦m̦ani men ko renana,* im ealikkar an rein jab m̦ool ñan eo ej make wõt ad karo im Irooj, Jesus Christ.
5 Jekdo̦o̦n ñe el̦ap ami jel̦ã kõn men kein aolep, ak ikõn̦aan kakeememej kom̦ bwe meñe Jeova* ear lo̦mo̦o̦ren armej ro jãn Ijipt, bõtab tokãlik ear ko̦kkure ro rar jab kwal̦o̦k aer tõmak.
6 Bareinwõt, enjel̦ ro im rar jab pãdwõt ijo jikier jãn jinoin, bõtab rar kõjekdo̦o̦ne ijo kar karõke bwe en jikier, em̦õj an Anij liãpe er ñan indeeo ilo marok jilõñlõñ, im rej pãd im kõttar m̦ae iien ekajet eo ilo raan eo el̦ap.
7 Ejjel̦o̦k oktak jãn men eo ear wal̦o̦k ñan Sodom im Gomorra im jikin ko repaake jikin kein, el̦ap aer kar l̦õñ* im l̦oor wõt kõn̦aan ko aer rejekkar ilo kanniõk. Innem kar kaje er ilo kijeek eo ej ñan indeeo, im men in ej juon kein kakkõl ñan kõj.
8 Jekdo̦o̦n ñe menin kakkõl kein rar wal̦o̦k, ak armej rein rej wõnm̦aanl̦o̦k wõt im l̦õmn̦ak kõn men ko renana. Rej kattoon ãnbwinnin ro jet, rej kõjekdo̦o̦n ro ewõr aer maroñ ñan tõl, im rej kõnanaik ro Anij ej kautiej er.
9 Bõtab, ke Maikõl arkenjel̦ eo,* im Tepil̦ eo rar aitwerõk kõn ãnbwinnin Moses, Maikõl ear jab l̦õmn̦ak bwe ekkar ñan an ekajete Tepil̦ eo im kwal̦o̦k naan ko reddo ñane. Ak ear ba: “Jeova* en ekajete eok.”
10 Ijoke elukkuun eddo an armej rein kõnnaan kõn men ko rejjab mel̦el̦e kaki ñan jidik. Rej ãinwõt menninmour ko rejajel̦o̦kjen̦ kõnke aolep mel̦el̦e ko aer rej itok jãn eñjake ko aer make. Rej ko̦kkure er make kõn kõm̦m̦an kein aer.
11 Jerata ñan armej rein kõnke rar l̦oor ial̦ eo an Kein, im rar m̦õkaj in l̦oore ial̦ eo ebõd an Beleam ñan bõk jeraam̦m̦an, im rar bõktok jorrããn ñan er make kõn aer kwal̦o̦k naanin jum̦ae ãinwõt kar Kora!
12 Rej pãd ibwiljimi ilo iien kõjota ko ami bwe ren kwal̦o̦k yokwe ñan rũttõmak ro, bõtab rej ãinwõt wõd ko ren̦ojak ibul̦õn lo̦jet. Rej ãinwõt jabõt ro rej l̦õmn̦ak wõt kõn lo̦jieer im ejjel̦o̦k aer mijak ñan jidik, im ãinwõt kõdo̦ ko ejjel̦o̦k kobbaer im kõto ej pookto pooktak. Rej ãinwõt wõjke ko ejjel̦o̦k leer meñe ej iien aer kalle, im em̦õj totak okraer im relukkuun mej.*
13 Rej ãinwõt n̦o ko rel̦l̦ap ilo̦jet rej buñ im kwal̦o̦ktok men ko rettoon ren kar jook kaki. Im rej ãinwõt iju ko rejebwãbwe, me naaj likũt er ilo marok jilõñlõñ ñan indeeo.
14 Inok, armej eo kein kajimjuon liktak jãn Adam, ear kanaan kõn armej rein im ba: “Jeova* ear itok kõn elõñ to̦ujin ro doon rekkwõjarjar
15 bwe en ekajete aolep armej, im kwal̦o̦k ruõn aolep armej ro renana kõn aer kõm̦m̦ani men ko renana, im kõn an rijjerawiwi ro kwal̦o̦k naan ko reddo n̦ae e.”
16 Armej rein rej rillotaan, rejaje jokwane kõn men ko ewõr ippãer, im rej l̦oor wõt kõn̦aan ko aer renana. El̦ap wõt aer nõbar er make, im riab nõbar ro jet bwe en po kõn̦aan ko aer.
17 Ak kom̦ ro rejitõnbõro, kom̦win keememej naan ko rijjilõk ro an Jesus Christ, ad Irooj, rar ba m̦oktal̦o̦k.*
18 Rein rekõn jiroñ kom̦ im ba: “Ilo raan* ko ãliktata, enaaj wõr ro rej kajjirere, im renaaj l̦oor wõt kõn̦aan ko aer renana.”
19 Errein ej ro rej kõm̦m̦an jepel bõro, rej ãinwõt menninmour ko,* im jetõb kwõjarjar* ejjab pãd ippãer.
20 Ak kom̦ ro rejitõnbõro, kom̦win kõkajoorl̦o̦k kom̦ kõn tõmak eo ami elukkuun kwõjarjar, im jar ikijjeen jetõb kwõjarjar*
21 bwe kom̦win wõnm̦aanl̦o̦k wõt im pãdwõt ilo an Anij yokwe kom̦. Kom̦win kõm̦m̦ane men in ilo ami kõttar an Irooj eo ad, Jesus Christ, naaj kwal̦o̦k tũriam̦o eo ej tõll̦o̦k ñan mour indeeo.
22 Bareinwõt, wõnm̦aanl̦o̦k wõt im kwal̦o̦k tũriam̦o ñan ro rej pere;
23 im lo̦mo̦o̦ren er ilo ami kanõktok er jãn kijeek. Kom̦win wõnm̦aanl̦o̦k wõt im kwal̦o̦k tũriam̦o ñan ro jet, ijo wõt ke kom̦win ekkõl ilo ami kõm̦m̦ane men in, im kom̦win dike nuknuk ko remããr itok wõt jãn jerbal ko an kanniõk.
24 Innem ñan eo emaroñ kõjparok kom̦ jãn ami buñ im kõm̦m̦an bwe en ejjel̦o̦k lippijinjin ippemi ilo ami jutak im̦aan aiboojoj eo an kõn el̦ap lañlõñ,
25 en tõllo̦kũn bõk nõbar, aiboojoj, kajoor im maroñ jãn indeeo, kiiõ, im ñan indeeo. E eo ej make wõt Anij im ad ri-Lo̦mo̦o̦r ikijjeen Jesus Christ, ad Irooj. Amen.
Footnotes
^ Ak “juon wõt alen im ej ñan indeeo.”
^ Naan eo ilo kajin Grik ej a·sel′gei·a, ej jitõñl̦o̦k ñan juon eo ej lukkuun rupe kien ko an Anij im ejjab jook im kea ñan jidik.
^ Lale “Jeova” ilo Kõmel̦el̦e Ko.
^ Lale ““L̦õñ” ilo Kõmel̦el̦e Ko.
^ Mel̦el̦ein, “jeban enjel̦ ro.” Lale “Arkenjel̦” ilo Kõmel̦el̦e Ko.
^ Lale “Jeova” ilo Kõmel̦el̦e Ko.
^ Kajin Grik, “ruo alen aer mej.”
^ Lale “Jeova” ilo Kõmel̦el̦e Ko.
^ Ak “rar kanaan kaki.”
^ Kajin Grik, “iien.”
^ Ak “rej l̦õmn̦ak wõt kõn men ko an kanniõk.”
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
