Luk 15:1-32
15 Innem aolep ri-tõltõl eowõj ro im rijjerawiwi ro rar jab bõjrak aer kepaakel̦o̦k bwe ren roñjake.
2 Im Parisi ro im skraib ro rel̦akkar wũnojidikdik n̦ae e im ba: “L̦ein ej karwaineneik rijjerawiwi ran̦ im ej m̦õñã ippãer.”
3 Innem Jesus ear kwal̦o̦k waanjoñak in im ba:
4 “Wõn iaami ñe en kar wõr 100 nejin jiip im ejako* juon iaaer eban kar likũti jiip ko 99 ilo mel̦aaj* im etal im pukote jiip eo ejako m̦ae iien eloe?
5 Im ilo iien eo ej loe, elukkuun m̦õn̦õn̦õ im ej kotake im likũti ioon aeran.
6 Im ke ej tõpar m̦weo im̦õn, ej kũrtok ro m̦õttan im armej ro rej jokwe iturin im ba ñan er, ‘Kom̦win lañlõñ ippa bwe em̦õj aõ loe jiip eo nejũ ekar jako.’
7 Ij ba ñan kom̦ bwe ilo ejja wãween in wõt, ñe juon rijjerawiwi ej ukel̦o̦k enaaj l̦apl̦o̦k lañlõñ ilañ jãn aer lañlõñ kõn 99 ro rewãnõk me rejjab aikuj in ukel̦o̦k.
8 “Ak ñe ewõr joñoul jããn jelba* ippãn juon kõrã im ejako juon iaaer, ta eban tile l̦aam̦ eo an im burum̦i m̦weo im̦õn im lukkuun pukote ñan ñe eloe ke?
9 Im ke ej loe, ej kũrtok lim̦aro jet m̦õttan im armej ro rej jokwe iturin im ba ñan er, ‘Kom̦win lañlõñ ippa bwe em̦õj aõ loe jããn jelba* eo aõ ear jako.’
10 Ij ba ñan kom̦ bwe ilo ejja wãween in wõt, enjel̦ ro an Anij rej lañlõñ ñe juon rijjerawiwi ej ukel̦o̦k.”
11 Innem Jesus ear ba: “Ewõr juon em̦m̦aan me ewõr ruo nejin l̦addik.
12 L̦eo edik ear ba ñan jemãn, ‘Jema, kwõn letok kõj eo aõ jãn men ko m̦weiõm̦.’ Kõn men in, em̦m̦aan eo ear ajeji men ko m̦weien ñan l̦õm̦aro nejin.
13 Jet raan tokãlik, l̦eo edik ear bõk aolep men ko m̦weien im em̦m̦akũt ñan juon aelõñ ettol̦o̦k, im ear jerwaani men ko m̦weien ilo an kõm̦m̦ani men ko rejekkar.
14 Ke ear maat aolepen jããn ko an, ear wal̦o̦k juon ñũta ilo aolepen aelõñ eo im ear pãd ilo aikuj.
15 Im ear etal ñan ippãn juon iaan armej in aelõñ eo bwe armej eo en kõjerbale. Innem armej eo ear jilkinl̦o̦ke ñan mel̦aaj eo an bwe en lale piik ko nejin.
16 Joñan an kwõle, ear kõn̦aan kañi men ko kijen piik ko, ak ejjel̦o̦k en̦ ear lel̦o̦k kijen ñan jidik.
17 “Kiiõ ear iañaktok an im ear ba, ‘Elukkuun lõñ kijen ri-jerbal ro an jema m̦õñã ak ña itõn mej kõn aõ kwõle n̦a ijin!
18 Inaaj jepl̦aak ñan ippãn jema im ba ñane: “Jema, iar jerawiwi n̦ae Anij* im n̦ae kwe.
19 Ejej tokja ñan am̦ watõk eõ nejũm̦, ak kwõn kõm̦m̦an bwe in am̦ ri-jerbal.”’
20 Kõn men in, ear jepl̦aak ñan ippãn jemãn, im ke ej ettol̦o̦k wõt, jemãn ear reilo̦k im loe im ear tũriam̦okake. Innem ear ettõrl̦o̦k im atbo̦kwõji l̦eo nejin im mejenmaiki.
21 Im l̦eo nejin ear ba ñan jemãn, ‘Jema, iar jerawiwi n̦ae Anij im n̦ae kwe. Ejej tokja ñan am̦ watõk eõ nejũm̦.’
22 Bõtab jemãn ear jiroñl̦o̦k ri-karejar* ro an im ba, ‘Kom̦win kaiur im bõktok juon nuknuk ej make wõt em̦m̦antata im kanuknuki kake, im kom̦win kõl̦aak juon riiñ ilo pein im kajuujuji.
23 Bareinwõt kom̦win bõktok juon koon in kau ematõk im m̦ane bwe jen m̦õñã im lañlõñ ippãn doon,
24 kõnke l̦adik in nejũ ear mej ak kiiõ em̦õj an bar mour, ear jako ak em̦õj bar loe.’ Innem rar jino aer lañlõñ ippãn doon.
25 “Ilo iien in, l̦eo erũtto ear pãd ilo jikin kallib eo. Ke ear jepl̦aak im ej epaakel̦o̦k m̦weo, ear roñ ainikien kõjañjañ im aer eb.
26 Kõn men in, ear kũrl̦o̦k juon iaan ri-jerbal ro im kajjitõk ta eo rej kõm̦m̦ane.
27 Innem ear uwaak im ba, ‘Em̦õj an ro̦o̦ltok l̦eo jatũm̦, im jem̦am̦ ear m̦an juon koon in kau ematõk kõnke ero̦o̦ltok ñan ippãn im em̦m̦an an mour.’*
28 Kõn men in, l̦eo erũtto ear illu im m̦akoko in del̦o̦ñl̦o̦k. Innem jemãn ear diwõjl̦o̦k im akwel̦ap ñane bwe en del̦o̦ñ,
29 ak ear ba ñan jemãn, ‘Kwõjel̦ã, aolepen iiõ ko in aõ jerbal ñan kwe, ijjañin kar bwilo̦ke juon am̦ naan, bõtab kwõjjañin kar letok juon koon in koot bwe in m̦õñã im lañlõñ ippãn ro m̦õtta.
30 Ak ej itok wõt l̦ein nejũm̦ me ear jerwaani* men ko m̦weiõm̦ ñan ippãn kõrã ro rekijoñ, ak kwõkajju m̦ane juon koon in kau ematõk ñane.’
31 Innem eba ñane, ‘Nejũ, kwaar pãdwõt ippa, im aolep men ko m̦weiõ rej am̦.
32 Ijoke jej aikuj in m̦õn̦õn̦õ ippãn doon kõnke jatũm̦ ear mej ak em̦õj an bar mour, ear jako ak em̦õj bar loe.’”
Footnotes
^ Ak “ejebwãbwe.”
^ Kajin Grik, “ãne jem̦aden.”
^ Kajin Grik, “joñoul drachma.” On̦ããn juon ri-jerbal ñe ej jerbal ium̦win joñoul raan.
^ Kajin Grik, “jããn drachma.”
^ Kajin Grik, “lañ.”
^ Ak “ri-kõm̦akoko.”
^ Ak “ejjel̦o̦k jorrããn ewal̦o̦k ñane.”
^ Kajin Grik, “kajju kamaati.”
