Luk 18:1-43
18 Innem ear wõnm̦aanl̦o̦k wõt im kwal̦o̦k juon waanjoñak ñan er kõn aorõkin aer aikuj jar iien otemjej im jab ebbeer.
2 Ear ba: “Ilo juon jikin, ear wõr juon ri-ekajet ejjab mijak Anij im ejjab kautiej armej.
3 Ekar bar wõr juon kõrã ilo jikin in emej l̦eo pãleen. Ejjab bõjrak an kõrã in etal ñan ippãn ri-ekajet eo im ba, ‘Kwõn lale bwe en jim̦we am̦ ekajete eõ im eo ej jum̦ae eõ ilo jikin ekajet.’
4 Ilo jinoin em̦m̦aan in ear m̦akoko, bõtab tokãlik ear make ba ilo bũruon, ‘Meñe ijjab mijak Anij im ijjab kautiej jabdewõt armej,
5 ak kõn an kõrã in jab bõjrak jãn an kabõn̦õn̦õik eõ, inaaj lale bwe en jim̦we aõ ekajete bwe en jab bar itok im kam̦õk eõ kõn kajjitõk en̦ an.’”
6 Im Irooj ear ba: “Meñe ri-ekajet in enana, ak kom̦ij ke kile ta in ej ba?
7 El̦aññe ãindein, ta Anij eban jipañ ro ear kããlõt er im rej akwel̦ap ñane raan im boñ bwe en kwal̦o̦k ekajet jim̦we ñan er ke? Bareinwõt, Anij enaaj kwal̦o̦k wõt an kijenmej ippãer.
8 Ij ba ñan kom̦ bwe enaaj m̦õkaj im kwal̦o̦k ekajet jim̦we ñan er. Bõtab ñe Nejin armej* enaaj itok, enaaj ke lo jabdewõt en̦ ewõr an tõmak rot in ilo lal̦ in?”
9 Ear bar kwal̦o̦k juon waanjoñak ñan ro rej kõwãnõk er make im rej watõk ro jet bwe ejjel̦o̦k tokjãer. Ear ba:
10 “Ruo em̦m̦aan rar etal ñan tampel̦ eo bwe ren jar, juon iaaer ej juon Parisi im eo juon ej ri-tõltõl eowõj.
11 Parisi eo ear jutak im jino jar ilo bũruon im ba, ‘O Anij, ij kam̦m̦oolol eok bwe ijjab ãinwõt armej ro jet. Ijjab ãinwõt ri-ko̦o̦t ro, ri-nana ro, ri-lejãn* ro, im ijjab ãinwõt ri-tõltõl eowõj in.
12 Ij jitlo̦k ruo kõttan ilo juon wiik, im ij lel̦o̦k juon m̦õttan joñoul in aolep men ko m̦weiõ.’
13 Bõtab ri-tõltõl eowõj eo ear jutak ettol̦o̦k im ear jab kõn̦aan reilõñl̦o̦k ñan lañ, ak el̦akkar deñdeñõte ubõn im ba, ‘O Anij, kwõn tũriam̦okake eõ bwe ña ij juon rijjerawiwi.’
14 Ij ba ñan kom̦ bwe ke em̦m̦aan in ear ro̦o̦l ñan m̦weo im̦õn, el̦apl̦o̦k an wãnõk jãn Parisi eo. Jabdewõt eo ej kautiej e make naaj kajooke. Bõtab jabdewõt eo ej kõttãik e make naaj kautieje.”
15 Armej ro rar bõktok ajri ro* nejier ñan ippãn bwe en likũt pein ioer,* ak ri-kal̦oor ro rar luuki armej ro.
16 Bõtab Jesus ear kũrtok ajri ro ñan ippãn, im ear ba: “Kom̦win kõtl̦o̦k an ajri ran̦e itok ñan ippa, im kom̦win jab kabõjrak er kõnke ro rej ãinwõt ajri rein renaaj jolõt Aelõñ eo an Anij.*
17 Ij ba ñan kom̦ bwe el̦aññe jabdewõt armej ejjab kaorõk Aelõñ eo an Anij ãinwõt juon ajri, armej in eban del̦o̦ñe Aelõñ in ñan jidik.”
18 Innem juon iaan ri-tõl ro an ri-Ju ro ear kajjitõk ippãn im ba: “Ri-Kaki Em̦m̦an, ta eo ij aikuj kõm̦m̦ane bwe in maroñ jolõt mour indeeo?”
19 Im Jesus ear ba: “Etke kwõj ba bwe ña juon eo em̦m̦an? Ejjel̦o̦k juon en̦ em̦m̦an, Anij wõt.
20 Kwõjel̦ã kõn kien kein: ‘Kwõn jab lejãn, kwõn jab uror, kwõn jab ko̦o̦t, kwõn jab riab n̦ae bar juon, im kwõn kautiej jem̦am̦ im jinõm̦.’”
21 Im ear ba: “Iar pokake aolep kien kan̦e jãn ke iar dik.”
22 Ke Jesus ear roñ uwaak eo an, ear ba ñane: “Ej wõr wõt juon men kwõjjañin kõm̦m̦ane. Kwõn wiakake aolep men kan̦ m̦weiõm̦, im ajeji tõprak ko ñan ro rejeram̦õl im kwõnaaj m̦weiie ilañ. Innem kwõn itok im l̦oor eõ.”*
23 Ke em̦m̦aan eo ear roñ men in, ear lukkuun bũrom̦õj kõnke ear kanooj in m̦weiie.
24 Jesus ear reilo̦k ñane im ear ba: “Enaaj kanooj in pen an ro rem̦weiie del̦o̦ñel̦o̦k Aelõñ eo an Anij!
25 Ilo m̦ool, epidodol̦o̦k an juon kamel̦ del̦o̦ñ ilo ro̦ñin juon nitõl̦in keke jãn an juon ri-m̦weiie del̦o̦ñ ilo Aelõñ eo an Anij.”
26 Ro rar roñ men in rar ba: “Ñe ãindein, wõn emaroñ mour?”
27 Ear ba: “Men ko armej rebani, Anij emaroñi.”
28 Bõtab Piter ear ba: “Kõmar ilo̦k jãn men ko otemjej m̦weiem im l̦oor eok.”
29 Im Jesus euwaak im ba: “Ij ba ñan kom̦ bwe jabdewõt eo ear ilo̦k jãn m̦weo im̦õn, ak kõrã eo pãleen, ak ro jein ak ro jatin, ak jinen im jemãn, ak ro nejin kõn wõt Aelõñ eo an Anij,
30 enaaj l̦apl̦o̦k an bũki men kein kiiõ. Innem ilo jukjukun pãd* eo ej itok wõt, armej in enaaj bõk mour indeeo.”
31 Innem ear bõk rijjilõk ro 12 im ear ba ñan er: “Jej ilo̦k ñan Jerusalem, im aolep men ko ri-kanaan ro rar jeje kaki kõn Nejin armej renaaj jejjet kũtieer.
32 Ñan waanjoñak, renaaj liaakel̦o̦k ñan armej in aelõñ ko im renaaj kõm̦m̦an kõjak kake im kajooke im kaplouki.
33 Im ãlikin aer naaj deñl̦o̦ke, renaaj m̦ane. Bõtab ilo raan en̦ kein kajilu, enaaj bar mour.”
34 Ak rijjilõk ro rar jab jel̦ã ta mel̦el̦ein men kein kõnke em̦õj n̦ooje mel̦el̦ein naan kein jãn er.
35 Ke Jesus ear epaakel̦o̦k Jeriko, ekar wõr juon em̦m̦aan epilo ear jijet iturin ial̦ eo im ej owar.
36 Ke ear roñ ainikien an juon jarlepju etal iturinl̦o̦k, ear jino kajjitõk ippãn armej ro kõn ta eo ej wal̦o̦k.
37 Im rar ba ñane: “Jesus ri-Nazeret n̦e tok!”
38 Innem ear lam̦õj im ba: “Jesus, Nejin Devid,* kwõn tũriam̦okake eõ!”
39 Ak armej ro rej pãd im̦aan rar luuki im ba bwe en jab keroro, bõtab ear kõl̦l̦aajl̦o̦k wõt ainikien im ba: “Nejin Devid, kwõn tũriam̦okake eõ!”
40 Im Jesus ear bõjrak im ba bwe ren bõktok em̦m̦aan eo ñan ippãn. Ke em̦m̦aan eo ear itok, Jesus ear kajjitõk ippãn im ba:
41 “Ewõr ta imaroñ kõm̦m̦ane ñan kwe?” Ear uwaak im ba: “Irooj, kwõn kõm̦m̦an bwe in bar lol̦o̦kjen̦.”
42 Im Jesus eba ñane: “Kwõn lol̦o̦kjen̦. Am̦ tõmak ear kõmour eok.”
43 Innem ilo iien eo wõt, em̦m̦aan eo ear bar lol̦o̦kjen̦, im ear jino l̦oore Jesus im nõbar Anij. Bareinwõt, ke armej ro rar lo men in, er aolep rar nõbar Anij.
Footnotes
^ Lale “Nejin armej” ilo Kõmel̦el̦e Ko.
^ Lejãn ej ñe juon eo em̦õj an m̦are ej babu ak pãd ippãn juon eo ejjab pãleen.
^ Kajin Grik, “niñniñ ko.”
^ Ak “bwe en kõjeraam̦m̦an er.”
^ Ak “Kien eo an Anij.” Lale “Aelõñ eo an Anij” ilo Kõmel̦el̦e Ko.
^ Lale “Jukjukun pãd” ilo Kõmel̦el̦e Ko.
^ Lale “Nejin Devid” ilo Kõmel̦el̦e Ko.
