Luk 2:1-52
2 Ilo kar tõre eo, Sizar Augõstõs ear kõm̦m̦ane juon kien bwe aolep armej ro ium̦win kien eo an* ren je etaer ilo iien bõnbõn oran armej.
2 (Iien bõnbõn in m̦oktata ear wal̦o̦k ke Sairiniõs ear kom̦ja* ilo aelõñin Siria.)
3 Im aolep armej rar etal ñan ijoko jikier kajjojo bwe ren je etaer.
4 Innem Josep ear etal jãn Galili, jãn jikin eo etan Nazeret, ñan ijo jikin Devid etan Betleem, ilo Judia. Ear ilo̦k ñan jikin in kõnke ej jãn baam̦le eo an Devid,
5 im ear bõk Meri ippãnl̦o̦k bwe en je etaerro. Ilo tõre in, em̦õj aerro m̦are im Meri ej pojakin kõl̦l̦otak.
6 Ke rar pãd ijo, ear jejjet iien an Meri kõl̦l̦otak.
7 Innem Meri ear keotak juon nejin l̦addik, eñin ej m̦aanje eo nejin, im ear kũtimi ajri eo kõn m̦õttan nuknuk im kõbabuuki ilo juon jikin m̦õñã an menninmour.* Rar pãd ijin kõnke eobrak jikin jokwe ko an ri-lotok ro.
8 Ekar wõr jet ri-lale jiip ilo jikin in im rar pãd ilo mel̦aaj ko im emmej aolepen boñõn eo bwe ren lale jiip ko nejier.
9 Innem ilo idiñ, juon enjel̦ an Jeova* ear wal̦o̦ktok ñan er, im meramin aiboojoj eo an Jeova* ear rome er aolep, im rar kanooj mijak.
10 Bõtab enjel̦ eo ear ba ñan er: “Kom̦win jab mijak, kõnke iar itok bwe in kwal̦o̦k ñan kom̦ kõn juon ennaan em̦m̦an im enaaj bõktok el̦ap lañlõñ ñan armej otemjej.
11 Rainin, em̦õj an l̦otak juon ami ri-lo̦mo̦o̦r ilo ijo jikin Devid. E Christ im Irooj.
12 Eñin ej kõkal̦l̦e eo bwe kom̦win jel̦ã: Kom̦ naaj lo juon niñniñ em̦õj kũtimi kõn m̦õttan nuknuk im ej babu ilo jikin m̦õñã an menninmour.”
13 Innem ilo ejja iien eo wõt, ear bar wal̦o̦ktok elõñ enjel̦, ãinwõt juon jarin tarin̦ae, im rar nõbar Anij im ba:
14 “Nõbar en ilo̦k ñan Anij ilo ijo eutiejtata, im aenõm̦m̦an en pãd ippãn armej ro ioon lal̦ in me ebuñbũruon kake er.”
15 Ãlikin an enjel̦ ro jepl̦aak ñan lañ, ri-lale jiip ro rar kõnnaan ippãn doon im ba: “Jen m̦õkajl̦o̦k ñan Betleem im lale men in Jeova* ear kwal̦o̦ke ñan kõj.”
16 Innem rar m̦õkaj im etal, im rar lo Meri im Josep, im rar lo niñniñ eo ej babu ilo jikin m̦õñã eo an menninmour.
17 Ke rar lo niñniñ eo, rar kwal̦o̦k kõn ennaan eo enjel̦ eo ear ba ñan er kõn ajri eo.
18 Aolep ro rar roñ men kein ri-lale jiip ro rar ba rar kanooj bwilõñ,
19 bõtab Meri ear likũti aolep men kein ilo bũruon, im ear kanooj kõl̦mãnl̦o̦kjen̦ kõn mel̦el̦eir.
20 Innem ri-lale jiip ro rar jepl̦aak ñan ippãn jiip ko nejier, im rar kam̦m̦oolol im nõbar Anij kõn aolep men ko rar roñ im loi ãinwõt an kar ba ñan er.
21 Ilo raan eo kein karalitõk, ke ej jejjet iien an ajri eo m̦wijm̦wij, rekar n̦aetan Jesus. Eñin ej ãt eo enjel̦ eo ear kwal̦o̦ke m̦okta jãn an kar Meri etta.
22 Bareinwõt ke ej jejjet raan eo ñan aer karreoiki er ekkar ñan Kien Moses, rar bõk ajri eo ippãerl̦o̦k ñan Jerusalem bwe ren kwal̦o̦ke im̦aan Jeova,*
23 ãinwõt kar je ilo Kien eo an Jeova* im ba: “Aolep l̦adik ro rej m̦aanje naaj aikuj kõjenolo̦k er ãinwõt juon men eokkwõjarjar ñan Jeova.”*
24 Innem rar lel̦o̦k menin katok ko aer ekkar ñan Kien eo an Jeova,* eo ej ba: “Kom̦win katok kõn ruo m̦ul̦e, ñe ejjab ruo pigeon jiddik.”
25 Ekar wõr juon em̦m̦aan ilo Jerusalem etan Simeon ear kõttar iien eo Anij enaaj kaenõm̦m̦an armej in Israel. Em̦m̦aan in ej juon eo ewãnõk im el̦ap an kautiej Anij, im jetõb kwõjarjar* ear pãd ippãn.
26 Bareinwõt, Anij ear kwal̦o̦k ñane ikijjeen jetõb kwõjarjar* bwe m̦okta jãn an mej, enaaj loe Christ, eo Jeova* ear jilkintok.
27 Innem jetõb kwõjarjar* ear tõl Simeon bwe en etal ñan tampel̦ eo. Ke Meri im Josep rar bõkl̦o̦k Jesus, niñniñ eo nejierro, ñan tampel̦ eo bwe ren kõm̦m̦ane men eo Kien eo ej ba,
28 Simeon ear bõk ajri eo im jiburlepe, im ear nõbar Anij im ba:
29 “Irooj Bõtata, kiiõ eo karejeram̦ emaroñ mej ilo aenõm̦m̦an ãinwõt am̦ kar kallim̦ur,
30 kõnke em̦õj aõ loe eo enaaj bõktok lo̦mo̦o̦r,
31 eo kwaar kõpooje bwe armej otemjej ren loe.
32 E ej juon meram im enaaj jol̦o̦ke marok eo ej kalbubuuk armej in aelõñ ko, im ej juon meram eo enaaj rome armej in Israel ro doom̦.”
33 Jinen im jemãn ajri eo rar kanooj bwilõñ kõn men ko Simeon ear ba kõn ajri eo.
34 Bareinwõt, Simeon ear kõjeraam̦m̦an er im ear kõnnaan ñan Meri, jinen ajri eo im ba: “Roñjake m̦õk! Kõn wõt ajri in, elõñ armej ilo Israel renaaj buñ im elõñ renaaj bar jerkak, im enaaj juon menin an armej ro kõnono n̦ae,
35 bwe en alikkar l̦õmn̦ak ko aer ilo bũrueer. (Ak ñan kwe, kwõnaaj kanooj eñtaan ãinwõt ñe rej wãkar eok kõn juon jãje aetok.)”
36 Ilo tõre in, ekar wõr juon ri-kanaan etan Anna, nejin Panuel jãn bwijjin Aser. Anna ear kanooj rũtto im jimjuon wõt iiõ in aerro kar l̦eo pãleen mour ippãn doon ãlikin aerro kar m̦are,
37 ak l̦eo pãleen ear mej. Lel̦l̦ap in ear 84 an iiõ, im aolep iien ekõn pãd ilo tampel̦ eo im jerbal ñan Anij ilo an jitlo̦k im niknik in jar im akwel̦ap. Ejjel̦o̦k iien en̦ ear jab ilo̦k ñan tampel̦ eo.
38 Ilo iien eo wõt, lel̦l̦ap in ear itok ñan iturier im kam̦m̦oolol Anij, im ear kõnnaan kõn ajri eo ñan aolep ro rar kõttare iien eo Anij enaaj lo̦mo̦o̦ren Jerusalem.
39 Innem ke ear m̦õj aer* kõm̦m̦ani aolep men ko rar aikuj kõm̦m̦ani ekkar ñan Kien eo an Jeova,* rar jepl̦aak ñan ijo jikier ilo Galili etan Nazeret.
40 Ajri eo ear rũttol̦o̦k im kajoorl̦o̦k, im ear l̦apl̦o̦k wõt an mãlõtlõt, im ear jab bõjrak an Anij buñbũruon kake.
41 Iiõ otemjej jinen im jemãn rekõn etal ñan Jerusalem ñan iien Kwõjkwõjin Kijoone* eo.
42 Ke ear 12 an Jesus iiõ, rar etal* ñan iien kwõjkwõj eo ilo Jerusalem ãinwõt aer kõn kõm̦m̦ane aolep iien.
43 Ke ear jem̦l̦o̦k raan ko ilo kwõjkwõj eo im rar jepl̦aak, Jesus ear pãdwõt ilo Jerusalem, bõtab jinen im jemãn rar jab jel̦ã.
44 Rar l̦õmn̦ak bwe epãd ibwiljin jarlepju in armej ro me rar jim̦or ippãn doon im etal. Ãlikin aer kar ilo̦k ium̦win juon raan eiio, rar kappukote ippãn ro nukwier im armej ro jet.
45 Bõtab ke rar jab loe, rar bar ro̦o̦l ñan Jerusalem im kappukote aolep jikin.
46 Ãlikin jilu raan, rar loe ibwiljin ri-kaki ro ilo tampel̦ eo, ej jijet im roñjake er im kwal̦o̦k kajjitõk ko ñan er.
47 Aolep ro rar roñjake rar lukkuun bwilõñ kõn uwaak ko an im kõn joñan an l̦ap an mel̦el̦e.
48 Ke jinen im jemãn rar loe, rar bwilõñ, im jinen ear ba ñane: “Nejũ, etke kwõj ãindein ñan kõm̦ro? Eto am̦ro kar jem̦am̦ inepata im pukpukot eok.”
49 Ak ear ba ñan erro: “Etke kom̦ar pukot eõ? Kom̦ij jab jel̦ã ke bwe ij aikuj pãd ilo m̦wiin im̦õn Jema?”
50 Bõtab, erro ar jab jel̦ã ta mel̦el̦ein an ba men kein ñan erro.
51 Innem Jesus ear ilo̦k ippãerl̦o̦k im rar jepl̦aak ñan Nazeret, im ear wõnm̦aanl̦o̦k wõt im pokake er.* Bõtab jinen ear likũt aolep men kein ilo bũruon.
52 Jesus ear rũttol̦o̦k wõt im l̦apl̦o̦k wõt an mãlõtlõt, im ear bar l̦apl̦o̦k wõt an armej ro im Anij buñbũrueer kake.
Footnotes
^ Ak “aolep armej ro ilo lal̦ in.”
^ Ak “kabna.”
^ Ak “menjer.”
^ Lale “Jeova” ilo Kõmel̦el̦e Ko.
^ Lale “Jeova” ilo Kõmel̦el̦e Ko.
^ Lale “Jeova” ilo Kõmel̦el̦e Ko.
^ Lale “Jeova” ilo Kõmel̦el̦e Ko.
^ Lale “Jeova” ilo Kõmel̦el̦e Ko.
^ Lale “Jeova” ilo Kõmel̦el̦e Ko.
^ Lale “Jeova” ilo Kõmel̦el̦e Ko.
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Ak “kajoor eo an.” Lale “Jetõb kwõjarjar” ilo Kõmel̦el̦e Ko.
^ Lale “Jeova” ilo Kõmel̦el̦e Ko.
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Mel̦el̦ein, “Josep im Meri.”
^ Lale “Jeova” ilo Kõmel̦el̦e Ko.
^ Lale “Kwõjkwõjin Kijoone” ilo Kõmel̦el̦e Ko.
^ Kajin Grik, “wanlõñl̦o̦k.”
^ Ak “kõttãik e ñan er.”
