Luk 21:1-38
21 Jesus ear reilo̦k im loe an ri-m̦weiie ro likũt menin lel̦o̦k ko aer ilo jikin jaba ko.
2 Innem ear bar lo juon kõrã ejeram̦õl im emej l̦eo pãleen ej jaba kõn ruo jããn jiddik,*
3 im ear ba: “Ij ba ñan kom̦ bwe el̦apl̦o̦k joñan eo kõrã in ejeram̦õl im emej l̦eo pãleen ear likũti jãn aolep armej rein.
4 Armej rein rar jaba kõn bween men ko m̦weieer. Bõtab kõrã in, meñe ejeram̦õl ak ear jaba kõn aolepen men ko enaaj kar mour kaki.”
5 Tokãlik, ke jet armej rar kõnono kõn tampel̦ eo, kõn an aiboojoj kõn dekã ko rem̦m̦an im men ko kar aji ñan Anij,
6 ear ba: “Ikijjeen men kein kom̦ij loi kiiõ, juon iien naaj rupi aolep dekã kein im ejjel̦o̦k juon iaaer enaaj pãd ioon bar juon.”
7 Innem rar kajjitõk im ba: “Ri-Kaki, ñããt eo men kein renaaj wal̦o̦k, im ta kõkal̦l̦e eo enaaj kaalikkar bwe men kein rej pojakin wal̦o̦k?”
8 Ear uwaak im ba: “Kom̦win lale bwe ren jab m̦on̦e kom̦ kõnke elõñ renaaj itok ilo eta im ba, ‘Ña Christ,’ im renaaj bar ba, ‘Epaaktok iien eo.’ Kom̦win jab l̦oor armej rein.
9 Bareinwõt, ñe kom̦ naaj roñ kõn tarin̦ae ko im poktak* ko, kom̦win jab lõl̦ño̦ñ. Men kein rej aikuj wal̦o̦k m̦okta, bõtab ejjab mel̦el̦ein bwe enaaj kajju itok jem̦l̦o̦kin.”
10 Innem ear bar ba ñan er: “Juon lal̦ enaaj tarin̦aeik bar juon lal̦, im aelõñ ko renaaj tarin̦aeik doon.
11 Bareinwõt, enaaj wõr m̦akũtkũt lal̦ ko rel̦l̦ap, im enaaj wõr ñũta im nañinmej ko rekapopo ilo elõñ jikin ko. Enaaj wal̦o̦k men ko rekaamijak, im kõkal̦l̦e ko rel̦l̦ap renaaj wal̦o̦k ilañ.
12 “Bõtab m̦okta jãn an men kein aolep wal̦o̦k, armej renaaj jibwe kom̦ im kaeñtaan kom̦, im renaaj liaakel̦o̦k kom̦ ñan im̦õn kabuñ ko kab jikin kalbuuj ko. Bareinwõt, renaaj bõkl̦o̦k kom̦ ñan im̦aan kiiñ ro im kom̦ja* ro kõn wõt eta.
13 Ilo wãween in, kom̦ naaj maroñ kwal̦o̦k naan ñan ro jet.
14 Kõn men in, kom̦win jek ilo bũruomi bwe kom̦ ban kõmmãlmel l̦o̦k im̦aan kõn wãween ami naaj jojomare kom̦ make.
15 Inaaj lewaj mãlõtlõt ñan kom̦ im kwal̦o̦k ta ko kom̦win ba, im aolep ro rej jum̦aik kom̦ reban kõjekdo̦o̦ni men kein ak akwããle kom̦ kaki.
16 Meñe ro jememi im jinemi kab ro jeimi im jatimi im ro nukũmi im m̦õttami, ak renaaj liaakel̦o̦k* kom̦. Innem naaj m̦an jet iaami im kom̦ naaj mej,
17 im armej otemjej renaaj dike kom̦ kõn wõt eta.
18 Ijoke ejjel̦o̦k juon iaan kool̦an bõrami enaaj jako.
19 El̦aññe kom̦ij kijenmej, kom̦ naaj lo̦mo̦o̦ren mour ko ami.
20 “Bõtab, ñe kom̦ naaj lo an jarin tarin̦ae ko kaapool̦e Jerusalem, kom̦ naaj jel̦ã bwe epaaktok iien an jeepepl̦o̦k.
21 Innem ro ilo Judia ren jino ko ñan tol̦ ko, ro rej pãd ilo Jerusalem ren ilo̦k jãne, im ro rej jokwe ilo bukwõn ko repaake ren jab etal ñane,
22 kõnke raan kan̦e rej raanin kaje* bwe en jejjet kũtien aolep men ko kar je.
23 Ejerata wõt kõrã ro rebõro̦ro im kõrã ro rej kanninnin ilo tõre en̦! Enaaj l̦ap eñtaan ilo ãnin im naaj kaje armej ro ie.
24 Renaaj mej kõn jãje, im naaj bõk er ñan aelõñ ko jet im kajipo̦kweik er, im armej in aelõñ ko* renaaj jujuuri Jerusalem m̦ae iien ejem̦l̦o̦k iien ko* an ri-aelõñ ko.
25 “Bareinwõt, enaaj wal̦o̦k kõkal̦l̦e ko ilo al̦, allõñ im iju ko. Aelõñ ko ilo lal̦ in renaaj pãd ilo eñtaan kõnke rejaje ren etal ia l̦o̦k kõn wõt an l̦ap ainikien an lo̦jet ñũrñũr im lim̦aajn̦on̦o.
26 Armej renaaj l̦otl̦o̦k kõn aer lõl̦ño̦ñ im kõn aer ekkõljake ta ko renaaj wal̦o̦k ilo lal̦ in, kõnke kajoor ko ilañ renaaj em̦m̦akũtkũt.
27 Innem renaaj lo an Nejin armej* itok ilo juon kõdo̦ kõn kajoor im aiboojoj el̦ap.
28 Bõtab ñe men kein renaaj jino wal̦o̦k, kom̦win jutak im reilõñl̦o̦k kõnke epaaktok iien lo̦mo̦o̦ren kom̦.”
29 Innem ear kwal̦o̦k juon waanjoñak ñan er im ba: “L̦õmn̦ak m̦õk kõn wõjke fig im aolep wõjke ko jet.
30 Ñe ejino wal̦o̦k bwilikeer, kom̦ naaj loi im jel̦ã bwe epaaktok iien mããn̦ãn̦.*
31 Ilo ejja wãween in wõt, ñe kom̦ij lo an men kein wal̦o̦k, kom̦win jel̦ã bwe epaaktok Aelõñ eo an Anij.*
32 Ij jiroñ kom̦ bwe epepen in eban jako m̦ae iien men kein aolep renaaj wal̦o̦k.
33 Lañ im lal̦ renaaj jako bõtab naan ko aõ rejjãmin jako.
34 “Kom̦win kõjparok kom̦ make bwe bũruomi en jab obrak kõn tõr,* kadek, im inepata ko an mour in, ñe eaab kom̦ naaj ilbõk ñe raan eo enaaj itok ilo jidimkij
35 ãinwõt juon aujiid. Enaaj itok ioon aolep armej ro rej jokwe ilo aolepen lal̦ in.
36 Kom̦win ruj wõt, im kom̦win akwel̦ap ñan Anij iien otemjej bwe kom̦win maroñ el̦l̦ã jãn men kein renaaj aikuj in wal̦o̦k, im bwe kom̦win maroñ jutak im̦aan mejãn Nejin armej.”
37 Ñe ej raan, Jesus ej katakin armej ro ilo tampel̦ eo, bõtab ñe ej boñ ej etal ñan tol̦ eo etan Tol̦ Olive im pãd ie.
38 Innem aolep armej ro rekõn etal in jibboñtata ñan ippãn ilo tampel̦ eo bwe ren roñjake.
Footnotes
^ Kajin Grik, “ruo lepta.” Ruo lepta ej on̦ããn juon ri-jerbal ñe ej jerbal ium̦win 10 minit. Lale “Lepton” ilo Kõmel̦el̦e Ko.
^ Ak “kiojal̦jal̦.”
^ Ak “kabna.”
^ Ak “ketake.”
^ Ak “idenon̦e.”
^ Ak “ri-Gentile,” ro rejjab ri-Ju.
^ Kajin Grik, “iien ko kar karõke.”
^ Lale “Nejin armej” ilo Kõmel̦el̦e Ko.
^ Ak “iien rak.”
^ Ak “Kien eo an Anij.” Lale “Aelõñ eo an Anij” ilo Kõmel̦el̦e Ko.
^ Ak “l̦e jãn joñan m̦õñã.”
