Luk 23:1-56
23 Aolepen jar eo rar jutak im ilo̦k, im rar bõkl̦o̦ke Jesus ñan ippãn Pail̦at.
2 Innem rar jino aer n̦aruon im ba: “Kõmar jibwe an l̦ein kajjioñ in kõm̦m̦an bwe armej ren jum̦aik kien. Ej kõmo̦ik an armej kõl̦l̦ã eowõj ñan Sizar, im ej make ba bwe e Christ, juon kiiñ.”
3 Innem Pail̦at ear kajjitõk ippãn im ba: “Kwe ke Kiiñ eo an ri-Ju?” Im ear uwaak im ba: “Ejim̦we am̦ ba.”
4 Im Pail̦at ear ba ñan bũrij ro reutiej im jarlepju eo: “Ijjab lo ruõn em̦m̦aan in.”
5 Ak rar akwel̦ap im ba: “Ej kõm̦m̦an poktak kõn men ko ear katakin armej ro kaki ilo aolepen Judia. Ear jino tok jãn Galili im kiiõ etõpartok ijin.”
6 Ke Pail̦at ear roñ men in, ear kajjitõk el̦aññe em̦m̦aan eo ej juon ri-Galili.
7 Im ke ear jel̦ã bwe ej itok jãn ijo Herod ej tõl ie, ear jilkinl̦o̦k ñan ippãn Herod, eo ear bar pãd ilo Jerusalem ilo tõre ko.
8 Ke Herod ear lo Jesus, ear kanooj m̦õn̦õn̦õ kõnke eto an kar kõn̦aan loe kõn wõt an lõñ men ko ear roñ kaki kõn e. Ear kõjatdikdik bwe enaaj loe an Jesus kõm̦m̦an menin bwilõñ.*
9 Kõn men in, Herod ear jino kwal̦o̦k elõñ kajjitõk ñane, ak ear jab uwaake.
10 Bõtab ear jab bõjrak an bũrij ro reutiej im skraib ro jutak im n̦aruon ilo aer illu.
11 Innem Herod im rũttarin̦ae ro an rar kajejtokjãn Jesus, im Herod ear kõm̦m̦an kõjak kake ilo an kar ba bwe ren kanuknuki kõn juon nuknuk elukkuun em̦m̦an. Ãlikin men in, ear kõjepl̦aake ñan ippãn Pail̦at.
12 Herod im Pail̦at rar jino m̦õttãik doon jãn kar iien in. M̦oktal̦o̦k, erro kõn kõjdate doon.
13 Pail̦at ear ko̦kweilo̦ktok bũrij ro reutiej, ri-tõl ro, im armej ro
14 im ear ba: “Kom̦ar bõktok em̦m̦aan in ñan ña im ba bwe ej kairuj armej ro bwe ren kõm̦m̦an poktak. Bõtab ij ba ñan kom̦ bwe em̦õj aõ etale im̦aan mejãmi im ijjab lo ruõn kõn men kein kom̦ij n̦aruon kaki.
15 Ilo m̦ool Herod ear jab bar ellolo ruõn, im ear bar kõjepl̦aaktok ñan ippãd. Ij ba ñan kom̦ bwe ejjel̦o̦k men en̦ em̦m̦aan in ear kõm̦m̦ane bwe en aikuj in mej.
16 Kõn men in, inaaj kajeiki im karõl̦o̦ke.”
17 *——
18 Bõtab aolepen jarlepju eo ear lam̦õj im ba: “M̦an l̦õn̦e,* im kwõn karõl̦o̦k Barabbas ñan kõm!”
19 (Rar kalbuuji em̦m̦aan in kõn an kar jum̦ae kien ilo jikin in im m̦anm̦an armej.)
20 Innem Pail̦at ear bar kõnnaan ñan armej ro kõnke ear kõn̦aan karõl̦o̦k Jesus.
21 Bõtab rar jino lam̦õj im ba: “Dilaiki ilo jurõn al̦al̦! Dilaiki ilo jurõn al̦al̦!”
22 Innem ear bar kajjitõk ippãer alen kein kajilu im ba: “Etke? Ta eo enana em̦m̦aan in ear kõm̦m̦ane? Ijjab lo jabdewõt men ear kõm̦m̦ane bwe en aikuj in mej. Kõn men in, inaaj kajeiki im karõl̦o̦ke.”
23 Bõtab rar kal̦apl̦o̦k wõt ainikieer im lukkuun akwel̦ap ñane bwe ren m̦ane,* im ear tõprak men eo rar akwel̦ap kake.
24 Innem Pail̦at ear kõm̦m̦ane pepe eo bwe en jejjet kõn̦aan eo aer.
25 Ear karõl̦o̦ke em̦m̦aan eo rar kajjitõke, l̦eo me ear kalbuuj kõn an kar jum̦ae kien im m̦anm̦an armej. Bõtab ear kõtl̦o̦k Jesus ñan er bwe ren kõm̦m̦an ñane ekkar ñan aer kõn̦aan.
26 Ke rar ãñini Jesus jãn ijo, juon em̦m̦aan in Sairine etan Saimõn ej jibadektok jikin eo. Innem rar jibwe im door al̦al̦ in eñtaan* eo ñan ioon bwe en ineeke ilikinl̦o̦k Jesus.
27 Ekar wõr juon jarlepju in armej rar l̦oorel̦o̦k, ekoba kõrã ro me rar jañũti im deñdeñõte ubeer kõn aer kanooj in bũrom̦õj.
28 Jesus ear oktakl̦o̦k ñan kõrã ro im ba: “Kõrã in Jerusalem ran̦, kom̦win bõjrak jãn ami jañũt ña. Kom̦win jañũti kom̦ make im ajri ro nejimi
29 kõnke ij ba ñan kom̦ bwe ej itok wõt iien eo ñe armej renaaj ba, ‘Em̦õn̦õn̦õ wõt kõrã ro rejjab maroñ nãje im ro rar jab kõl̦l̦otak im ro rar jab kanninnin!’
30 Innem renaaj ba ñan tol̦ ko rekkillep, ‘Kom̦win pineje kõm!’ im ñan tol̦ ko reddik, ‘Kom̦win n̦ooje kõm!’
31 El̦aññe rej kõm̦m̦ani men kein ilo iien eo wõjke eo ej mour, innem ta eo enaaj wal̦o̦k ilo iien eo enaaj aemedl̦o̦k?”
32 Ekar bar wõr ruo em̦m̦aan rekar ãñin er bwe ren m̦an er ippãn, l̦õm̦arein ruo rej ri-nana.
33 Innem ke rar tõparl̦o̦k jikin eo etan L̦atin Bar, rar dilaiki n̦a ilo jurõn al̦al̦ eo iturin ri-nana ro ruo, juon ituanmoon̦in im eo juon ituanmiiñin.
34 Bõtab Jesus ear ba: “Jema, kwõn jol̦o̦k aer bõd kõnke rejaje ta eo rej kõm̦m̦ane.” Bareinwõt, rar kũbween kijdik bwe ren ajeji nuknuk ko an.
35 Armej ro rar jutak im kalimjeke, ak ri-tõl ro rar kõm̦m̦an kõjak kake im ba: “Ejel̦ã lo̦mo̦o̦ren ro jet. El̦aññe e Christ, eo Anij ear kããlõte, eokwe kõtl̦o̦k bwe en lo̦mo̦o̦ren e make.”
36 Rũttarin̦ae ro rar bar kõm̦m̦an kõjak kake, im rar itok ñan ippãn im lel̦o̦k limen wain meo̦
37 im ba: “El̦aññe kwe Kiiñ an ri-Ju, kwõn lo̦mo̦o̦ren eok make.”
38 Bareinwõt, rekar likũti juon jain itulõñin bõran ej ba: “Eñin ej Kiiñ eo An Ri-Ju.”
39 Innem juon iaan ri-nana ro rej ettoto iturin ear jino an kajjirere kake im ba: “Ta ejjab kwe Christ ke? Kwõn lo̦mo̦o̦ren eok make im bar kõm̦ro!”
40 Bõtab eo juon ear kauweiki im ba: “Kwõjjab mijak Anij ñan jidik ke? Kwõj bõk ejja kaje eo wõt an em̦m̦aan n̦e,
41 im ejim̦we aer kaje kõjro kõnke eñin ej leen kõm̦m̦an ko arro. Bõtab em̦m̦aan n̦e, ejjel̦o̦k men en̦ enana ear kõm̦m̦ane.”
42 Innem ear ba: “Jesus, kwõn kab keememej ña ñe kwõnaaj pãd ilo Aelõñ eo am̦.”*
43 Im ear ba ñane: “Ij kallim̦ur ñan kwe rainin, kwõnaaj pãd ippa ilo Pedetaij.”
44 Ilo iien in, ear 12 awa jim̦a ilo raelep,* bõtab ear jok marok ioon aolepen ãneo l̦o̦k ñan 3 awa jim̦a* ãlikin raelep
45 kõnke ear jako meramin al̦. Innem katiiñ eo ilowaan jikin eo eokkwõjarjar ilo tampel̦ eo ear potak ñan ruo m̦õttan.
46 Im Jesus ear lam̦õj kõn juon ainikien el̦ap im ba: “Jema, ij likũt mour* e aõ n̦a ilo̦piden peim̦.” Ãlikin an ba men in, ear mej.*
47 Ke kapen eo an jarin tarin̦ae eo ear lo men ko rar wal̦o̦k, ear jino an nõbar Anij im ba: “Lukkuun m̦ool ke em̦m̦aan in ej juon ri-wãnõk.”
48 Elõñ armej rar kobatok ñan iien in, im ke rar loe men kein rar wal̦o̦k, rar jepl̦aak ñan m̦õko im̦weer bõtab rej deñdeñõte ubeer kõn aer bũrom̦õj.
49 Aolep ro m̦õttan, ekoba kõrã ro rar l̦oore jãn Galili, rar jutak ilo juon jikin ettol̦o̦k im lo men kein.
50 Ekar wõr juon em̦m̦aan etan Josep, juon armej em̦m̦an im ewãnõk, im ear juon iaan ro uwaan Im̦õn Ekajet eo El̦ap an ri-Ju ro.
51 (Em̦m̦aan in ear jab errã ilo pepe im m̦akũtkũt ko aer.) L̦ein ej jãn Arimatia, juon jikin an ri-Judia, im ear kõttare Aelõñ eo an Anij.
52 Em̦m̦aan in ear jãdel̦o̦k ñan ippãn Pail̦at im kajjitõk an bõk ãnbwinnin Jesus.
53 Innem ear doorlal̦l̦o̦k ãnbwin eo im kũtimi kõn juon m̦õttan nuknuk* ekanooj em̦m̦an. Ãlikin, ear likũti ãnbwin eo ilo juon lõb* kar kõm̦m̦ane itõrerein juon tol̦, im ejjañin wõr en̦ enañin kõjerbale.
54 Ilo tõre in, ekar raanin Kõppojak,* im ej jotal̦o̦k wõt bwe en jino raanin Jabõt.*
55 Ak kõrã ro me rar itok ippãn Jesus jãn Galili rar etal im lale lõb* eo im ijo rar likũt ãnbwin eo ie,
56 innem rar jepl̦aak bwe ren kõppooj tol̦aj* im weil̦ ñaj. Bõtab rar kakkije ilo raanin Jabõt, ekkar ñan Kien eo.
Footnotes
^ Kajin Grik, “kõkal̦l̦e.”
^ Meñe ewal̦o̦k eoon in ilo jet ukokin Baibõl̦, bõtab ejjab wal̦o̦k ilo elõñ iaan bok lemlem in etto ko ilo kajin Grik.
^ Kajin Grik, “Bõk l̦õn̦e jãn jen̦e.”
^ Ak “m̦ane ilo aer dilaiki ilo jurõn al̦al̦.”
^ Lale “Al̦al̦ in eñtaan” ilo Kõmel̦el̦e Ko.
^ Ak “Kien eo am̦.” Lale “Aelõñ eo an Anij” ilo Kõmel̦el̦e Ko.
^ Kajin Grik, “awa eo kein karatimjuon.”
^ Kajin Grik, “enañin awa eo kein kajiljino.”
^ Naan eo ilo kajin Grik ej pneu′ma. Lale “Pneu′ma” ilo Kõmel̦el̦e Ko.
^ Ak “ear jol̦o̦k kũtuon.”
^ Ak “juon linen.”
^ Kajin Grik, “libõn keememej.”
^ Lale “Raanin Kõppojak” ilo Kõmel̦el̦e Ko.
^ Lale “Jabõt” ilo Kõmel̦el̦e Ko.
^ Kajin Grik, “libõn keememej.”
^ Rekõn kõjerbal bo̦uta ak bõlõk im weil̦ ñan kõpooj juon ãnbwin m̦okta jãn aer kalibwini.
